2 Jaꞌ jin kꞌane chi walaꞌ, laan jaxca chꞌen espada tol eel yee, jix jin scꞌubꞌa yalan yenel skꞌabꞌ. Jix jin yute jaxca junoj julbꞌal tol caw eel xaam, catuꞌ jix jin scꞌubꞌan jaxca chi yun yeytoj chꞌen julbꞌal yul stzꞌuumal.

3 Jix yalon ey jin jaxca tiꞌ: Jaach yicꞌaal Israel, tol jin chejabꞌ jaach, yutol ja wu, yuxan oj jin al-le watxꞌil, ẍi Jehová ey jin.

4 Jix jin naꞌ jaxca tiꞌ: Caw naꞌbꞌacꞌal jix jin mulnai, cꞌam niꞌoj tzet jix wiꞌ yin. Naꞌbꞌacꞌal jix el wip, tumi ey tzet jix wiꞌ yin, jin chi. Asan xin, wotaj tol txequel yeoc masanil jin mulnail sattaj Jehová, jaꞌ jin pajtzebꞌal yu jin mulnail eyoc yul skꞌabꞌ Dios.

5 Jaꞌ tinaniꞌ xin, tuxa jix wotajne eloj tol miman weloc apnoj sattaj Jehová jin Diosal, yutol jaꞌ Naj chi akꞌon wip. Jaꞌ Naj jix jin akꞌon chꞌibꞌ yin jin txutx, yet watxꞌ chin oc ẍejabꞌoj, yu wiꞌon meltzo ebꞌ Israel tet junelxa, jaꞌton ebꞌ yicꞌaal Jacob.

6 Jix yalon Naj ey jin jaxca tiꞌ: Jin chejabꞌ jaach toni, yet watxꞌ chi jichlo oc snaꞌbꞌal ebꞌ yicꞌaal Jacob, catuꞌ cha wiꞌon meltzo ebꞌ iquisto ecꞌ bꞌey Israel, yu cꞌal jaach waon pax oc yin sajkꞌinalil snan xol wanxa nación, masantaꞌcꞌal bꞌey slawubꞌal yul yibꞌankꞌinal tiꞌ, yu ja wiꞌontoj colbꞌanile chi wakꞌa, ẍi Naj ey jin, ẍi jun ẍejabꞌ Jehová tuꞌ.

7 Jaꞌ Jehová, Naj sColomal conobꞌ Israel, jaꞌton Naj miman yeloc apnoj, jaꞌ chi alon jaxca tiꞌ tet jun tol intajnebꞌil eloj, cꞌal tol yaabꞌil el yu masanil nacionlaj, jaꞌton jun ẍejabꞌ yeoc xol ebꞌ rey: Jaꞌ yet oj jaach yilon ebꞌ rey cꞌal ebꞌ yaaw, oj a waan ebꞌ, catuꞌ oj ey noan ebꞌ ja sattaj, yutol jain Jehová, sDiosal jin Israel, tol miman weloc apnoj, jain jix jaach jin sicꞌ eloj, catuꞌ chi wunen cꞌal bꞌey jix wakꞌcan jin tiꞌ, ẍi Dios.

9 Cha walon tet ebꞌ tol presowom yeoc jaxca tiꞌ: Elanwejtej, ja chi; cꞌal tet ebꞌ caan ecꞌ bꞌey xol kꞌejkꞌinal: Elanwejtej bꞌey sajkꞌinal, ja chi tet ebꞌ. Jaꞌ ebꞌ jin conobꞌ, laan oj yun ebꞌ jaxca noꞌ meꞌ cꞌal noꞌ wacax chi ecꞌ teynele low stiꞌlaj bꞌe, cꞌal bꞌey sjolomlaj wonan bꞌey cꞌam steꞌal sat txꞌotxꞌ.

10 Cꞌamxa wail cꞌal tajin tiꞌal, cꞌamxa syaꞌtajil oj yabꞌ ebꞌ yu sjowal skꞌakꞌal yajan cꞌu, yutol ey jin camcꞌulal yin ebꞌ. Oj wijbꞌa ebꞌ, catuꞌ oj wiꞌontoj ebꞌ bꞌey jaꞌ snukꞌjaꞌlaj.

11 Oj jin waꞌnetoj junoj bꞌe bꞌey sjolomlaj wonan, caw watxꞌ xacꞌal oj yun jin waꞌnen sbꞌeal jin conobꞌ, ẍi Dios.

12 Ilwej ton abꞌi, tol oj tit ebꞌ jin conobꞌ caw naat eycantoj, ey mac chi tit bꞌey norte, ey cꞌal pax wanxa chi tit bꞌey chi too cꞌu, yetoj cꞌal pax wanxa chi tit bꞌey wan conobꞌ yul yet Asuán.

13 El ojabꞌ yaw satcan cꞌal txꞌotxꞌ txꞌotxꞌ tiꞌ yu tzalacꞌulal. Yetoj txꞌotxꞌ mimej wonan, el ojabꞌ yaw txꞌotxꞌ yin tzalacꞌulal, yutol jaꞌ Jehová lalan smimancꞌulnen ebꞌ sconobꞌ; lalan yokꞌ scꞌul Naj yin ebꞌ eyoc yin syaꞌilal.

14 Chi yalon ebꞌ a Sión jaxca tiꞌ: Jix cu bꞌejlecan yu Jehová, jix jon too qꞌueycꞌulal yu Naj Kaawil, ẍi ebꞌ.

15 Chi yalon pax Jehová jaxca tiꞌ: ¿Tumi ey junoj ix txutxe chi too qꞌueycꞌulal yuneꞌ yu? Caxcꞌal mi chi too qꞌueycꞌulal yuneꞌ ix ix tuꞌ yu, jal jin jain tiꞌ, cꞌam bꞌakꞌin oj jex toj qꞌueycꞌulal wu an.

16 Jaxca tol tzꞌibꞌ yeoc sbꞌi conobꞌ Sión yul jin kꞌabꞌ, yuxan naꞌan cꞌal jun conobꞌ tuꞌ wu an.

17 Jaꞌ ebꞌ oj caꞌ waꞌnen a smuroal conobꞌ tuꞌ, yin eymanil oj yun sjul ebꞌ, jal pax ebꞌ je cajat jix uchon ey je conobꞌ tuꞌ, lalanxa yela ebꞌ.

18 Il ton abꞌi, chach ecꞌ tꞌananoj ja winlaj, catuꞌ cha wiloni tol lalan syambꞌan sbꞌa ebꞌ toonaj can jaxca presowomal, tol lalan sjul ebꞌ ja cꞌatan.

Jain Jehová jin tiꞌ, ey jin cꞌal ecꞌoj, chi wakꞌ jin tiꞌ ey jaach, tol oj ja meyne je bꞌa yu ebꞌ ja wet conobꞌ, jaꞌton ebꞌ lalan sjul ja cꞌatan, jaxca chi yun smeynen sbꞌa junoj ix ix watxꞌ xacꞌal yeoc yelawil spichil yet lalan snupi ix.

19 Yutol jaꞌ ja conobꞌ tol uchbꞌil eyoj, tzꞌinini xacꞌal ye canoj. Jaxa tinaniꞌ xin, manxa oj yabꞌ txꞌotxꞌ txꞌotxꞌ bꞌey oj caey ecꞌ ebꞌ ánima. Jaꞌ ebꞌ jix uchon lawoj tuꞌ, naat tacꞌal oj tojcan ebꞌ.

20 Jaꞌ ebꞌ je yuninal jix ali bꞌey txꞌoj conobꞌal, oj yal ebꞌ ey jex jaxca tiꞌ: Caw txenne jun txꞌotxꞌ bꞌey caan jon ecꞌ tiꞌ, akꞌ mimanbꞌoj niꞌojxa cu majul txꞌotxꞌ bꞌey chi cu caey ecꞌoj, ẍi ebꞌ oj yalon ebꞌ.

21 Jaex tiꞌ, oj je yalon yin je naꞌbꞌal jaxca tiꞌ: ¿Mac ey yuninal wan tiꞌ? Yutol jaꞌ ebꞌ ket jix lawi ey ebꞌ, cꞌamxa pax kuninal chi ali, yutol ujtebꞌil jon eloj, ecꞌabꞌwom jon bꞌey junojxa conobꞌ. ¿Mac wal txequel jix ilon chꞌibꞌ wan ebꞌ tiꞌ xin? Yutol bꞌejbꞌil jon can cu txꞌojli. ¿Bꞌeytuꞌ jix caꞌ stitoc wan ebꞌ tiꞌ? je chi, oj mi je yaloni.

22 Jain Jehová jin, oj wal tet nacionlaj, catuꞌ oj wiꞌon a jin bandera yil ebꞌ, catuꞌ oj yiꞌontej je yuninal ebꞌ tol winaj unin; jal ebꞌ ix je cutzꞌin xin, tol oj sjolomxicꞌneletej ebꞌ ix yu ebꞌ.

23 Jaꞌ ebꞌ naj rey oj ilon chꞌibꞌ ebꞌ je yuninal yetoj ebꞌ ix reina, jaxa ebꞌ ix scutzꞌin rey oj ijon ecꞌ ebꞌ; oj ey noan ebꞌ yaaw tuꞌ sat txꞌotxꞌ, yel xacꞌal yeynajil oj yute sbꞌa ebꞌ je sattaj. Jaꞌ yet tuꞌ, oj je yotajne eloj tol jain ton Jehová jin. Jaꞌ mac chi yaoc scꞌul win, man oj yakꞌ sqꞌuixwiloj ebꞌ, ẍi Dios.

24 Jaꞌ junoj winaj caw ey yip, jaꞌ tzetyetal chi yiꞌ yin jowal. ¿Tumi oj skeꞌ yiꞌle ecꞌ junoj tzetyetal tet? Yetoj pax oj, ¿tumi oj skeꞌ yiꞌle ecꞌ junoj presowom tet junoj yaaw caw jow?

25 Jaꞌ Jehová chi alon jaxca tiꞌ: Jaꞌ tet junoj winaj caw wal ey yip, oj iꞌle ecꞌ junoj presowom, jaꞌ tet junoj yaaw tol caw jow, oj iꞌle ecꞌ tzetyetal jix yiꞌ yin jowal. Yutol jain oj wakꞌ jowal yetoj ebꞌ je cajat. Jain wal caw oj jin colcan el ebꞌ je yuninal tuꞌ.

26 Jain oj waoc yin snaꞌbꞌal ebꞌ tol oj smakꞌle cam sbꞌa ebꞌ chex etnen tuꞌ, jaxca xacꞌal uqꞌuem an oj yun ebꞌ yu chichoncꞌulal, jaxca tol oj yucꞌle eytoj ẍiqꞌuil junjun ebꞌ. Yu jun tuꞌ xin, masanil ánima oj otajne eloj tol jain ton Jehová je Colomal jin, jain chex wakꞌ jajcha eloj. Jain ton sDiosal jin Jacob, tol chi skeꞌ wu masanil, ẍi Jehová.