50
Jaꞌ Jehová chi alon tet sconobꞌ jaxca tiꞌ:Jex Israel; ¿tumi che naꞌ tol jain chex wujte ecꞌ jaxca junoj winaj chi yujte ecꞌ yistil? Ta tol jaxca tuꞌ, ¿bꞌeytuꞌ eyoc junoj yuunal yet poꞌolebꞌail chi alon tinaniꞌ? Ta tol jain jix jex jin txontoj yin yakꞌomaloj servilal ¿Mactxequel bꞌey ey jin jec, yuxan tol jix jex jin txoneloj? Jaex tiꞌ jix jex iꞌletoj yin yakꞌomaloj servilal; man tzet oj yu, yu cꞌal je mul cꞌal yu je penail, yuxan jix jex iꞌletoj.
2 ¿Tzet yu, jaꞌ yet jix jin juli, cꞌam mactxequel jix ilcha wu, jaꞌ yet jix jex wawteni, cꞌam mactxequel jix takꞌwi ey jin? ¿Chim je naꞌ tol cꞌam chi skeꞌ wu jex jin colon can eloj? ¿Chim je naꞌ cꞌal pax oj, tol man oj skeꞌ wu jex wakꞌon jajcha eloj? Kꞌojbꞌil cꞌal asan junoj kꞌane chi walaꞌ, catuꞌ chi tantoj jaꞌ mar, cusiltaj xacꞌal mi chi yun cantoj sbꞌe jaꞌ mimej jaꞌ chi bꞌeyi. Jaxam scam can el noꞌ pescado yu tajin tiꞌal tuꞌ, catuꞌ chi kꞌaꞌtoj noꞌ, yu cꞌamxa jaꞌ jaꞌ.
3 Jain chi wakꞌ kꞌejbꞌoj el satcan, cusiltaj xacꞌal chi yun cantoj wu, ẍi Jehová.
Sjijemal Jun Ẍejabꞌ Jehová
4 Jaꞌ jun ẍejabꞌ Jehová chi alon jaxca tiꞌ: Jaꞌ Jehová Naj Yaaw jix jin akꞌon jelanbꞌoj yin jin kꞌanabꞌi, yet watxꞌ chi skeꞌ wakꞌon smimanil scꞌul ebꞌ eyoc yin cuscꞌulal. Junjun cꞌal skꞌinibꞌalil chi woche chi wabꞌ tzet chi yakꞌ jin cuyuꞌ.
5 Jaꞌ Jehová chi akꞌon sjelanil jin naꞌbꞌal, yet watxꞌ, man pit oj chi wute jin bꞌa, tam wal ey bꞌey jix jin el txꞌuman tet.
6 Jix jin jacbꞌatoj wichin yet jix jin smakꞌon ebꞌ jin cajat, bꞌejan jin cꞌul yet jix stzujle el xil jin tiꞌ yu ebꞌ. Ma webꞌa el jin sat tet ebꞌ jix jin sbꞌuchon ebꞌ cꞌal yet jix stzubꞌli oc ebꞌ yin jin sat.
7 Jaꞌ Jehová Naj Waawil chi colwa wetoj. Yu jun tuꞌ, yuxan ma wakꞌ caabꞌcꞌulal yu tzet jix jin yute ebꞌ. Yuxan tecꞌan jin cꞌal jaxca junoj chꞌen miman nachꞌen, Wotaj tol man oj el jin qꞌuixwil.
8 Jaꞌ Naj chin colon eloj, cawil cꞌal eyecꞌ Naj jin cꞌatan. ¿Mac wal txequel oj skeꞌ yoc akꞌo cꞌule win? Ta ey mac chi yaoc junoj tzetyetal wibꞌan, oj toj wal jin bꞌa yetoj sattaj Naj juez, ¿Mactxequel junoj chi jowi oc win? Tit ojabꞌ jin cꞌatan, catuꞌ chi yaloni.
9 Jaꞌ Jehová Naj Yaaw, jaꞌ chi colwa wetoj. ¿Mactxequel oj skeꞌ yaon oc junoj tzetyetal wibꞌan? Masanil ebꞌ chi jowi oc win, oj lawoj ey ebꞌ jaxca junoj an icham pichile tol iitaj xacꞌal.
10 Jaꞌ mac jex tol ey yeloc apnoj Jehová yul je sat, catuꞌ che yabꞌen tzet chi yal ẍejabꞌ: Ta tol xol kꞌejkꞌinal chex bꞌeyi, jaxca tol cꞌam niꞌoj je tzejtebꞌal, awej oc Jehová yipoj je cꞌul, ocanwej cꞌal mitxꞌan yin cu Diosal.
11 Jaxa mactxequel jex che yaoc kꞌakꞌ, cꞌal je waꞌnen junoj je tzejtebꞌal yul je yet, bꞌeyanwej yetoj je tzejtebꞌal tuꞌ kilaꞌ. Jaꞌ Jehová oj aontej spajtzebꞌal je yibꞌan; tuxa cꞌal oj jex ey can telan xol miman syaꞌilal yu.