2 Ilaꞌ naj je yichmam Abraham, cꞌal ix je txutx ixnam Sara, cꞌam yuninal ebꞌ, asan chꞌan ebꞌ scawanil yet jix wawten ebꞌ. Jain jix wakꞌ jin yaxilal tet ebꞌ, yuxan manxa jantajoj sbꞌisil jix yun yicꞌaal ebꞌ.

3 Queytuꞌ oj yun wakꞌon jin yaxilal yibꞌan ebꞌ a Sión, jaꞌton ebꞌ caan bꞌey conobꞌ uchbꞌil eyoj. Jaꞌ masanil txꞌotxꞌ cusiltaj txꞌotxꞌ, laan xacꞌal oj yun can el txꞌotxꞌ jaxca junoj txꞌotxꞌ manxa jantajoj swatxꞌil awo chi el sat, ma jaxca yili jun awo jix waw bꞌey Edén. Jaꞌ tituꞌ, asanxane tzalacꞌulal ey, asanxane bꞌit cꞌal alo watxꞌ kꞌane ey jin, oj ocoj.

4 Jex jin conobꞌ, majwej je yabꞌ tzet oj walaꞌ: Tol oj walel chejbꞌanile, cꞌal cuybꞌanile oj ijbꞌan ebꞌ conobꞌ, laan jaxca junoj sajkꞌinal yeoc xol ebꞌ.

5 Cawilxa sjul scꞌual wakꞌon spajtzebꞌal, jaꞌton scꞌual yet chin colwai. Jaꞌ yetoj masanil wopiso oj wakꞌ yaawil yibꞌan junjun conobꞌ. Jaꞌ wan conobꞌlaj eyecꞌ bꞌey stiꞌlaj jaꞌ mar, oj yaoc snaꞌbꞌal ebꞌ win. Oj yaoc wipalil ebꞌ yipoj scꞌul.

6 Aanwejtoj tꞌanan bꞌey satcan, catuꞌ eyanwej cꞌal pax tꞌanan sat txꞌotxꞌ tiꞌ. Jaꞌ satcan tuꞌ, oj qꞌueycan a jaxca wal chi yun sqꞌueya mucꞌ, jaxa sat txꞌotxꞌ txꞌotxꞌ tiꞌ oj ichambꞌoj jaxca chi yun yichambꞌi an pichile. Jaxca chi yun scam noꞌ us, queytuꞌ oj yun scam ebꞌ ánima bꞌey sat txꞌotxꞌ txꞌotxꞌ tiꞌ. Jal pax colbꞌanile chi wakꞌa, ey cꞌal ecꞌ yin tobꞌalkꞌinal, jaꞌ jin colwal tuꞌ cꞌam bꞌakꞌin oj lawoj.

7 Jantaj jex je yotaj xa sjichanil, jex che yaoc jin chejbꞌanil yin je cꞌul, abꞌwej tzet chi walaꞌ. Cꞌam ojabꞌ chex xiw yu ebꞌ chi bꞌuchwa je yin; cꞌam ojabꞌ che yakꞌ caabꞌcꞌulal yu pena kꞌane chi yal ebꞌ je yin,

8 yutol oj lawoj el ebꞌ jaxca junoj an icham pichile tol iitaj xa, ma jaxca an lana pichile tol iitaj xacꞌal. Jal pax jin colwal cꞌal jin jichanil, ey cꞌal ecꞌ yin tobꞌalkꞌinal, ẍi Jehová.

9 Jaach Jehová cu Diosal, colwaan ketoj jon, titan yetoj ja wipalil, jaxca jix yun ja colwa ketoj yet peyxa. Jaꞌ yet peyxa tuꞌ, jaach ton jix ja wakꞌ qꞌueyle el jun noꞌ chi yij Rahab, jaꞌton noꞌ dragón ey yul jaꞌ. Chi yal yeloc apnoj, jaꞌton conobꞌ Egipto.

10 Jaach jix ja wakꞌ tantoj jaꞌ mar, jaꞌ bꞌey snaatil yich jaꞌ mar tuꞌ, jaxca xacꞌal bꞌe jix ja wute cantoj yet jix ecꞌtoj ebꞌ colbꞌil el ja wu.

11 Queyton tuꞌ oj yun smeltzo ebꞌ colbꞌilxa el ja wu jaach jin Diosal. Chi bꞌitni ebꞌ, catuꞌ oj jul ebꞌ bꞌey Sión, tuxa cꞌal oj tzeetzon sat ebꞌ yu tzalacꞌulal; jantaj okꞌilal cꞌal bꞌiscꞌulal oj qꞌueycan eloj.

12 Yu jun tuꞌ, chi yalon Jehová jaxca tiꞌ: Jain toni, jain chex jin mimancꞌulne, ¿macto wal bꞌey oj jex xiwoj? ¿Ma jaꞌ tet ebꞌ ánima tol cambꞌeal yeocoj, tol laan ebꞌ jaxca cꞌal an cꞌultaj?

13 Jain Jehová jin tiꞌ, jain jix jin waꞌne masanil tzetyetal, jain jix jin jenbꞌatoj satcan catuꞌ jix jin waꞌne ey txꞌotxꞌ txꞌotxꞌ tiꞌ. ¿Tumi jix jin to qꞌueycꞌulal je yu, yuxan che yakꞌ xiwa je cꞌul tet mac chex etneni, jun chi ochen chex qꞌueyon eloj? Cꞌam ojabꞌ chex xiwi, jain oj jin qꞌueyel sjowal scꞌul jun chex etnen tuꞌ.

14 Jaꞌ mac chi yabꞌ syaꞌil bꞌey chi etnele tuꞌ, eyman oj col-le eloj. Man oj cam ebꞌ yul preso, tam wal oj lawoj a sloꞌbꞌe ebꞌ.

15 Jain Jehová je Diosal jin, jaꞌ jin bꞌi tuꞌ jaꞌton; Jehová Naj Yaaw yibꞌan Masanil. Jain chi wakꞌ bꞌilwoj sat jaꞌ mar yet chi smakꞌon ey sbꞌa jaꞌ.

16 Jain jix jin jenbꞌatoj satcan, catuꞌ jix jin waꞌnen ey txꞌotxꞌ txꞌotxꞌ tiꞌ. Jain chi wakꞌ al-le el jin kꞌane, catuꞌ chex jin colon el yetoj wipalil, catuꞌ chi walon tet Sión jaxca tiꞌ: Jaex tiꞌ jin conobꞌ jex, jin chi, ẍi Jehová.

17 Jex a Jerusalén, iꞌwej el je weyan, aanwej waanoj. Tol jix je yabꞌ syaꞌil yu sjowal scꞌul Jehová, jaxca wal mac chi uqꞌuen an, masantaꞌcꞌal chi qꞌueycan el scꞌul yu teꞌ an.

18 Jaꞌ jantaj ebꞌ je yuninal, cꞌam junoj ebꞌ jix jex ijbꞌan ecꞌoj. Cꞌal masanil ebꞌ unin jix je yil chꞌibꞌoj, cꞌam junoj ebꞌ jix jex ketzon bꞌeyoj.

19 Jaꞌton caabꞌ tzetyetal jix tit je yibꞌan tiꞌ: Tol jix uchle lawoj je conobꞌ, jix tokꞌle ecꞌ jantaj tzetyetal ey yul je kꞌabꞌ. Miman ebꞌ ánima jix cam yu wail, cꞌal yu jowal. ¿Macto wal ebꞌ oj okꞌ scꞌul je yin? ¿Macto wal ebꞌ oj akꞌon smimanil je cꞌul?

20 Tuxa jix pax yip ebꞌ je yuninal, tuxa jix eyqꞌuey ebꞌ jaxca noꞌ scꞌultajil che chi can yul txꞌan yaal, tuxa cꞌal jix cancan telan ebꞌ bꞌey xiquinlaj scalleal conobꞌ. Yasiltaj xacꞌal ebꞌ yu sjowal scꞌul Jehová, yutol jaꞌ chi akꞌon cuenta ebꞌ.

21 Jex a Jerusalén, caw wal che yetne je cꞌul sicꞌlebꞌil, jaxca xacꞌal tol uqꞌuem jex an, man pax uqꞌuem oj jex an.

22 Jaꞌ Jehová Naj cu Diosal, jaꞌton Naj cu Colomal, chi alon jaxca tiꞌ: Oj wiꞌ can ecꞌ yechbꞌal sjowal jin cꞌul je yibꞌan, cꞌamxa bꞌakꞌin oj je yabꞌ syaꞌil yu junelxa.

23 Jaxa tet ebꞌ jix jex etneni, jaꞌ tuꞌ oj wa cantoj syaꞌilal, jaꞌton ebꞌ jix alon ey jex jaxca tiꞌ: Eyanwej telan sat txꞌotxꞌ, tol oj cu ecꞌ el je yibꞌan, ẍi ebꞌ. Eynaj jex telan sat txꞌotxꞌ tuꞌ yu ebꞌ, jix ecꞌ tecꞌton ebꞌ je yibꞌan jaxca chi yun cu tecꞌontoj pojoj, ẍi Jehová.