Colbꞌil El Jerusalén Xol Syaꞌilal Yu Dios
52
Jex a Sión, jex sconobꞌ Dios, tecꞌbꞌawej je bꞌa,jex a Jerusalén, tol sconobꞌ jex Dios. Txꞌoxwej el je yopiso akꞌbꞌil ey jex yu Dios, cꞌamxa bꞌakꞌin oj octoj ebꞌ txꞌoj conobꞌal tol txꞌoj sdiosal bꞌey je conobꞌ tuꞌ, yin jex yakꞌon eyqꞌuey ebꞌ junelxa.
2 Jex conobꞌ Jerusalén, aanwej waan xol pojoj eyoc je yin, chaꞌwej je yopiso yin je yakꞌon yaawilal, jex caan bꞌey Sión. Iꞌwej el jun cadena yet yakꞌomal servil tol kꞌalbꞌil oc yin je nukꞌ.
3 Jaꞌ Jehová chi alon jaxca tiꞌ: Cꞌam tumin jix jin chaꞌ je yin yet jix jex iꞌletoj yin yakꞌomal servilal. Jacꞌalaꞌ tinaniꞌ, cꞌam cꞌal pax tumin oj wakꞌ yet chex wiꞌon meltzo junelxa.
4 Yutol jaxca tiꞌ jix yun yalon Jehová Naj Yaaw: Jaꞌ ebꞌ jin conobꞌ tiꞌ jix iꞌletoj ebꞌ bꞌey Egipto yet peyxa, jix eecꞌ ebꞌ tituꞌ yin ecꞌabꞌwom animail. Jix lawi tuꞌ, catuꞌ jix etex ebꞌ yu ebꞌ Asiria yin tol cꞌam tzet yual.
5 Jaxa tinaniꞌ xin ¿Tzet oj wute jin bꞌa jain Jehová jin tiꞌ? Tucꞌal comon jix iꞌletoj ebꞌ jin conobꞌ bꞌey Babilonia. Jaꞌ ebꞌ chi akꞌon yaawil yibꞌan ebꞌ, caw chi smeyne sbꞌa ebꞌ, cꞌam cꞌal chi sbꞌej jin sbꞌuchon ebꞌ.
6 Yu jun tuꞌ xin, oj aapnoj scꞌual, catuꞌ oj jin yotajnen el ebꞌ jin conobꞌ tiꞌ, tol jain ton Jehová jin chin kꞌanabꞌ tet ebꞌ, catuꞌ ey jin cꞌal ecꞌ yetoj ebꞌ, ẍi Jehová.
7 Jaꞌ yet chi kilon bꞌey sjolomlaj wonan, txꞌojxa swatxꞌil yili yet chi jul naj chi alon el watxꞌ kꞌane, jaꞌ skꞌaneal watxꞌcꞌulal iꞌbꞌil oc yu, jaꞌton chi alon el skꞌaneal colbꞌanile, catuꞌ chi yalon jaxca tiꞌ: Jex a Sión, jaꞌ je Diosal eyxa oc yin Reyal, ẍi.
8 Abꞌwej, jaꞌ ebꞌ chi teynen je conobꞌ, chi el yaw ebꞌ. Jun laan chi yun ya bꞌulna ebꞌ yel yaw yu tzalacꞌulal, yutol jaꞌcaw ebꞌ chi iloni, tol tuxa oj meltzo pax Jehová bꞌey Sión.
9 Jex caan jex bꞌey Jerusalén, jex tol uchquiltaj xacꞌal yeoc je conobꞌ, bꞌitnanwej yin tzalacꞌulal, yutol jaꞌ Jehová tuxa wal jix okꞌ scꞌul je yin, oj yakꞌon colbꞌanile bꞌey Jerusalén junelxa.
10 Yutol jaꞌ Jehová oj xꞌox yipalil sattaj masanil nacionlaj. Masanil ebꞌ ánima bꞌey yul yibꞌankꞌinal tiꞌ, oj yotajne el ebꞌ tol jaꞌ Dios chi colon el sconobꞌ.
11 Elanwej, elanwej bꞌey Babilonia, jex iꞌnentoj mitxꞌkꞌabꞌe yet Jehová. Cꞌam ojabꞌ che mitxꞌ tzettaj yetal tol man watxꞌoj, yet watxꞌ cꞌam che yatoj je bꞌa xol spenail.
12 Man yin oj xacꞌal eymanil oj yun je yeli, man tucꞌal oj, oj jex elaoj, yutol jaꞌ Jehová je Diosal bꞌabꞌel stoo je sattaj, tzajan cꞌal pax je yintaj, catuꞌ teynebꞌil jex yu.
Syaꞌilal Jun Ẍejabꞌ Dios
13 Jix yalon pax Jehová jaxca tiꞌ: Jaꞌ jun jin chejabꞌ tiꞌ oj skeꞌ cꞌal yu, yel xacꞌal oj bꞌinale yin yopiso.
14 Ecꞌal mac oj qꞌueya scꞌul yiloni, caw tol txꞌojxa yili oj yil ebꞌ, yutol caw jix makꞌlei. Manxa ánima oj yun yili, yu tzet oj uteleoj.
15 Caw ecꞌal nación oj qꞌuey scꞌul yilon ocoj. Quey pax tuꞌ ebꞌ rey, caw oj qꞌuey scꞌul ebꞌ yiloni, cꞌamxa cꞌal tzet oj yal ebꞌ yu, yutol oj yil ebꞌ, cꞌal snaꞌcha el yu ebꞌ tzetyetal tol cꞌam cꞌaltaꞌ bꞌey jix yabꞌ skꞌumal ebꞌ yet peyxa, ẍi Jehová.