2 Jaꞌ Jehová chi yoche scꞌul tol jaꞌ jun ẍejabꞌ tiꞌ chi chꞌibꞌ jaxca chi yun ẍꞌibꞌ swol junoj teꞌ teꞌ chi tit yin jun xeꞌ yul txꞌotxꞌ caw sat. Jaꞌ jun tuꞌ, man ochebꞌiloj yili, yutol cꞌam swatxꞌil yili ocoj.

3 Bꞌuchbꞌil el Naj yu ebꞌ ánima, jix intajnele el yu ebꞌ yet animail. Jix ale oc syaꞌilal yibꞌan, caw jix yetne scꞌul. Jaxca tol man smoo oj chi il-le oc yin. Cꞌam yeloc apnoj yul cu sat, jix kintajne eloj.

4 Jix cu naꞌ jaon tiꞌ tol jaꞌ Dios jix aon oc syaꞌilal yibꞌan, caw yeynajilal jix utelei, caw man smoo oj queytuꞌ jix utelei. Ilaꞌ tol jaꞌ cu yaꞌilal jix ale cantoj yibꞌan, jaꞌ jix yabꞌ syaꞌil cu qꞌuexeloj.

5 Jix yasitoj smimanil yu cu mul, jix yabꞌen cꞌal pax syaꞌil yu cu penail. Jaꞌ yu jun miman syaꞌilal jix oc yibꞌan tuꞌ, jaꞌ jix iꞌon jul watxꞌcꞌulal snan cu xol yetoj Dios. Yu cꞌal tol jix yabꞌ syaꞌil smimanil Naj cu yaꞌiloj, yuxan jix akꞌle cu kꞌinal jaon tiꞌ.

6 Jaon ánima jon tiꞌ, tol sajleminaj kecantoj cu masanil jaxca noꞌ meꞌ, junjun jon cꞌal chi cu too bꞌey chi ẍaꞌ cu cꞌul; ilaꞌ pax tol jaꞌcaw Jehová jix aon cantoj masanil cu penail yibꞌan jun ẍejabꞌ tuꞌ.

7 Caw wal jix bꞌuchlei, caw yeynajil jix utelei, ma spajtze sbꞌa. Jix iꞌletoj jaxca chi yun yiꞌletoj noꞌ meꞌ bꞌey chi makꞌle camoj. Cꞌam cꞌal tzet jix yalaꞌ. Tzꞌin cꞌal ẍi jaxca noꞌ meꞌ yet chi tzujle eloj.

8 Jix iꞌletoj preso, man yin oj xolilal jix yun snaꞌle oc yin, man smooaliloj jix yun smakꞌle camoj. Cꞌam junoj ebꞌ yet conobꞌ jix oc yin bꞌiscꞌulal yu. Jix iꞌle el bꞌey yul yibꞌankꞌinal yu cu penail jaon ánima jon tiꞌ. Jix yabꞌ syaꞌil yu cu penail cu masanil. Ma naꞌcha el yu ebꞌ ta tol ku, yuxan jaxca tuꞌ jix yunne.

9 Caxcꞌal cꞌam junoj spenail jix el yuneni, tam wal ey junoj lekꞌtiꞌal kꞌane jix yalaꞌ. Caxcꞌal mi jaxca tuꞌ, jaꞌ snaꞌon ebꞌ ánima tol jaꞌ bꞌey mujan ebꞌ penawom jatuꞌ oj mujleoj; jaxa jix yunne tol jaꞌ bꞌey mujan ebꞌ bꞌeom, jatuꞌ jix mujlei.

10 Jaꞌ Jehová jix aon oc syaꞌilal yibꞌan, yutol queytuꞌ jix yun snaꞌoni. Jix yakꞌon sbꞌa Naj yin xaambꞌalil yu yakꞌle lawoj spenail masanil ánima. Yuxan jaꞌ tinaniꞌ, iquis cꞌal ecꞌ Naj. Caw miman oj yun sbꞌisil ebꞌ yicꞌaal, catuꞌ oj eloc tzet naꞌbꞌil yu Jehová yibꞌan.

11 Jaꞌ yet jix lawi ecꞌ jun miman syaꞌilal tuꞌ yibꞌan, jix tzalabꞌi a scꞌul yiloni, tol man naꞌbꞌacꞌal oj jix yabꞌ syaꞌil. Yuxan jix yal Jehová yin jaxca tiꞌ: Jaꞌ jun jin chejabꞌ tiꞌ, caw ecꞌal mactxequel oj oc can yin swatxꞌilal yu, yutol jaꞌ oj iꞌon el spenail ebꞌ.

12 Yuxan oj waoc yopiso xol ebꞌ miman yeloc apnoj. Ey yalon yet yetoj ebꞌ jix akꞌon eyqꞌuey jowal, yutol jix yaoc sbꞌa yul skꞌabꞌ camich, caw jix etnele jaxca chi utele ebꞌ penawom. Caw jix yaoc sbꞌa yalan spenail masanil ánima, jix txali yu ebꞌ yet chi akꞌle tan spenail ebꞌ.