2-3 Tol oj yakꞌ chꞌibꞌ yuneꞌ ix yul skꞌap na, cꞌam cꞌal bꞌey oj xiw yakꞌon chꞌibꞌ xꞌanil skꞌap na, tol caw oj yute smakꞌon eytoj yestacail xiquinlaj spat, jaxca tuꞌ smoo chi yun conobꞌ Jerusalén, yutol miman oj yun yel leeoj sbꞌisil yuninal bꞌey swatxꞌ cꞌal bꞌey sqꞌuexan. Jaꞌ ebꞌ yicꞌaal yet bꞌakꞌin oj majon oc txꞌotxꞌ txꞌotxꞌ yet wanxa conobꞌlaj, catuꞌ oj caey ecꞌ ebꞌ bꞌey wan conobꞌ tol cꞌam ánima.

4 Jex a Jerusalén, cꞌam ojabꞌ chex xiwi. Manxa oj el je qꞌuixwil, manxa yin oj yeynajilal oj jex uteleoj. Manxa oj je naꞌtej qꞌuixwilal jix yun je conobꞌ yet peyxa, yet jix jin je bꞌejon canoj jaxca junoj ix ix camnajxa yichamil.

5 Yutol jain jix jex jin waꞌne, jaxca tol ichamile weoc je yu. Jain Jehová jin tiꞌ Yaaw jin yibꞌan masanil. Je Colomal weocoj, je Diosal jin, yutol Asanxane jin, cꞌam junojxa. Oj al-le win tol sDiosal jin masanil ebꞌ ánima bꞌey yul yibꞌankꞌinal tiꞌ.

6 Laan wal yeoc je conobꞌ jaxca junoj ix kꞌopo ix tol bꞌejbꞌil can yu yichamil, tol eyoc yin cuscꞌulal, queytuꞌ je yeocoj. Jal tinaniꞌ xin, chi awtele yu yichamil junelxa.

7 Jex a Jerusalén, txenne tiempoal jix jex jin bꞌejcanoj, jal pax tinaniꞌ, yetoj wal jin camcꞌulal je yin catuꞌ chex jin chaꞌon jul junelxa.

8 Junne txolan jix tit jin jowal, ma jin txꞌox jin sat ey jex; jain ton Jehová je Colomal jin chi walaꞌ, tol chi okꞌ pax jin cꞌul je yin, yuxan chex jin camcꞌulne.

9 Jaxca wal jix yun wakꞌon can jin tiꞌ tet naj Noé yet jix jul jun miman yaax nabꞌ, tol cꞌamxa bꞌakꞌin oj yakꞌ junojxa miman yaax nabꞌ yet chi yetnentoj tzetyetal bꞌey yul yibꞌankꞌinal tiꞌ, queytuꞌ chi yun wakꞌon can jin tiꞌ ey jex tinaniꞌ, tol manxa oj tit jin jowal je yin junelxa, tam wal oj to jex jin tzuꞌ junelxa.

10 Jain caw Jehová jin, tol caw ey jin camcꞌulal je yin. Caxcꞌal mi chi qꞌuexchatoj yili txꞌotxꞌ mimej wonan, catuꞌ chi eyqꞌuey bꞌulna txꞌotxꞌ tzalquiltaj, jal jin camcꞌulal je yin cꞌam bꞌakꞌin oj lawoj, tam wal oj lawoj jin wa kꞌane walnaj can je yetoj, yutol ey cꞌal watxꞌcꞌulal cu xol je yetoj, ẍi Dios.

12 Jaꞌ yetoj chꞌen rubíes oj jin waꞌne a storreal, jaxa yetoj chꞌen berilo oj waoc yin satlaj smuroal bꞌey chi oc smajil je conobꞌ tuꞌ, jaꞌ yetoj masanil chꞌen chꞌen caw watxꞌ yili oj waoc yin smuroal oj oc joyan yinlaj.

13 Jain oj jin cuy masanil ebꞌ je yuninal, tol watxꞌ oj eloc ebꞌ masanil wu an.

14 Yutol oj je bꞌeybꞌalne sjichanil cꞌal swatxꞌilal, yu jun tuꞌ, yuxan cꞌamxa cꞌal xiwcꞌulal snan je xol, tam wal eyto mactxequel oj jex etnen oj, cꞌamxa cꞌal junoj tzetyetal oj jex xibꞌtenoj.

15 Ta eyto mac oj yakꞌ jowal je yin, manxa jain oj chi wute, jaꞌ ebꞌ oj yakꞌ jowal je yetoj man oj jex eyqꞌuey yu ebꞌ.

16 Ilaꞌ tol jain jix jin waꞌne naj waꞌnem chꞌen, chi yaoc skꞌakꞌal stzakꞌakꞌ naj, jaꞌ yetoj kꞌakꞌ tuꞌ chi swaꞌne masanil mitxꞌkꞌabꞌe yet jowal. Jain jix jin waꞌne cꞌal pax naj chi skeꞌ mitxꞌkꞌabꞌnen chꞌen chꞌen yet jowal tuꞌ, yet chi yakꞌon lawoj ánima yetoj wan mitxꞌkꞌabꞌe tuꞌ.

17 Jal jex jaex tiꞌ xin, cꞌam junoj mitxꞌkꞌabꞌe yet jowal oj skeꞌ jex yakꞌon lawoj. Jaꞌ ebꞌ chex akꞌon queja, cꞌamxa tzet oj yal ebꞌ je yin. Jain chi wute jaxca tuꞌ, yu je watxꞌiloj jaex chin je yakꞌ servil tiꞌ. Jain oj jex jin coleloj, ẍi Jehová.