2 ¿Tzet wal yu, yuxan che yakꞌ lawoj ey je tumin sqꞌuexeloj tzetyetal tol man loꞌbꞌeoj? ¿Tzet wal yu, yuxan che qꞌueyel je tumin yin tzetyetal tol cꞌam chi no je cꞌul yu? Ta chi cam je yabꞌeni, cꞌal je jijen tzet chi walaꞌ, watxꞌ loꞌbꞌe oj je loꞌ, tol oj je yakꞌ tzalabꞌoj je cꞌul je loꞌon tzetyetal tol caw watxꞌ.

3 Titanwej, watxꞌ ojabꞌ che yute je majon je yabꞌe cꞌal je jijen tzet chi walaꞌ, yet watxꞌ chex a can junelxa. Oj jin waꞌne jun jin wa kꞌane je yetoj tol ey cꞌal ecꞌ yin tobꞌalkꞌinal.^a Oj wakꞌ jin watxꞌcꞌulal ey jex, jaxca jix yun wakꞌon jin watxꞌcꞌulal tet naj rey David.^b

4 Jain jix waoc naj rey David tuꞌ yin testigoal bꞌey masanil nacionlaj yet chi yijbꞌani, cꞌal yakꞌon yaawil xol conobꞌ.

5 Jaꞌ yet bꞌakꞌin, oj je yawte ebꞌ ánima man je yotaj oj, jaꞌ ebꞌ ánima man otajnen jex, yin xacꞌal eymanil oj yun sjul lemna ebꞌ je cꞌatan. Jain Jehová je Diosal jin jaex Israel jex tiꞌ, Jain chex wiꞌa can yetoj je conobꞌ, ẍi Dios.

6 Awej oc je bꞌa yul skꞌabꞌ Jehová, yajbꞌan chito skeꞌ jex ẍaꞌoni. Awanwej tet, yutol cawil eyecꞌoj.

7 Jaex penawom jex tiꞌ, bꞌejwej can spenail tuꞌ, jaex pena je naꞌbꞌal bꞌejwej can je pena naꞌbꞌal tuꞌ. Meltzaanwej oc yul skꞌabꞌ Jehová yutol caw chi okꞌ scꞌul Naj je yin. Meltzaanwejtej bꞌey cu Diosal, jaꞌ oj akꞌon tan je penail, catuꞌ oj yakꞌon mimancꞌulal yin je penail tuꞌ, yutol yel xacꞌal miman yeoc scamcꞌulal.

8 Jaꞌ Jehová chi alon jaxca tiꞌ: Jaꞌ tzet chin naꞌ jain tiꞌ, man laan oj jaxca tzet che naꞌ jaex ánima jex tiꞌ, cꞌal tzet chi wunne, man laan oj jaxca tzet che yun jaex tiꞌ.

9 Jaxca wal snaatil yeatoj satcan bꞌey yibꞌan txꞌotxꞌ txꞌotxꞌ tiꞌ, queytuꞌ yeoc jin naꞌbꞌal, cꞌal tzet chi wunne, yel xacꞌal miman yeloc apnoj yintaj je yet.

10 Jaꞌ yaax nabꞌ, cꞌal chꞌen sajbꞌacom chi tit bꞌey satcan, man tucꞌal oj chi meltzo jaxca tuꞌ, yutol caw chi yaaxbꞌi el sat txꞌotxꞌ txꞌotxꞌ yu, yuxan chi aol masanil sat awo chi awle ey yul txꞌotxꞌ, yet watxꞌ chi yakꞌ jinat yet chi skeꞌ yawle junelxa, chi yakꞌon cꞌal pax sloꞌbꞌe ebꞌ ánima.

11 Queyton tuꞌ yeoc jin kꞌane, man oj meltzo yin tol cꞌam tzet oj swaꞌne, yutol oj yiꞌ sbꞌa yu tzet naꞌbꞌil wu, jaxca chi yoche jin cꞌul.

12 Yin tzalacꞌulal oj yun je yel bꞌey ey jex ecꞌ yin presowomal tuꞌ, yin tzalacꞌulal oj jex meltzo bꞌey je conobꞌ. Masanil wonanlaj, cꞌal txꞌotxꞌ tzalquiltaj, yetoj teꞌ teꞌ, cꞌal yetoj masanil tzettaj yetal ey je cawilal, jaxca wal tol oj stzꞌakꞌoꞌtane skꞌabꞌ yu tzalacꞌulal.

13 Jaꞌ teꞌ kꞌuꞌta oj chꞌibꞌa sqꞌuexeloj teꞌ qꞌuix, jaxa teꞌ arrayán oj chꞌibꞌ cꞌal pax a sqꞌuexeloj an cajin qꞌuix. Jaꞌ wan tiꞌ oj wunne yet chi bꞌinale jin bꞌi jain Jehová jin tiꞌ, cꞌal yu jin naꞌletej, ẍi Dios.