Spajtzebꞌal Tet Mac Chi Jijen Swa Kꞌane Dios
56
Chi yalon pax Jehová jaxca tiꞌ: Bꞌeybꞌalnewej sjichanil,asanne ojabꞌ swatxꞌilal che yunne, yutol janicꞌxane catuꞌ oj jex wakꞌon jajcha eloj. Yin eymanil oj jin txꞌox wipalil ey jex, yet chex jin colon eloj.
2 Caw tzalacꞌulal yet ebꞌ ánima chi sjije wan chejbꞌanile tiꞌ, cꞌal sbꞌeybꞌalneni, cꞌal sjijen pax scꞌual xewilal, cꞌam chi yun comon mulnail yet tuꞌ, cꞌam chi ecꞌbꞌantoj yibꞌan. Tol chi steyne sbꞌa, cꞌam junoj spenail chi el yuneni, ẍi Dios.
3 Ta ey junoj txꞌoj conobꞌal chi yaoc sbꞌa yul jin kꞌabꞌ, cꞌam ojabꞌ niꞌoj tzet chi yal jaxca tiꞌ: Jaꞌ Jehová cꞌam chin ẍaꞌoc yin eyilal xol ebꞌ sconobꞌ, man ojabꞌ ẍi oj. Yetoj ebꞌ winaj tol cꞌam ix chi yiꞌle catuꞌ cꞌam cꞌaltaꞌ yuninal,a cꞌam ojabꞌ chi yal ebꞌ jaxca tiꞌ: Jain tiꞌ laan jin jaxca junoj tajin teꞌ, man ojabꞌ ẍi oj ebꞌ.
4 Jain Jehová jin chi wal jaxca tiꞌ: Ta tol miman yeloc apnoj scꞌual xewilal yul sat ebꞌ winaj tol cꞌam cꞌaltaꞌ yistil, catuꞌ chi sjijen ebꞌ tzet chi woche, chi yaon oc jin wa kꞌane ebꞌ yin scꞌul,
5 jaꞌ swatxꞌilal oj wakꞌ tet ebꞌ, ecꞌbꞌan yeloc apnoj ebꞌ yintaj junoj cꞌaale cꞌal cutzꞌine. Cꞌam bꞌakꞌin oj qꞌueyel sbꞌina ecꞌ sbꞌi ebꞌ bꞌey jin templo, cꞌal xol ebꞌ jin conobꞌ. Cꞌam bꞌakꞌin oj joꞌole qꞌuey sbꞌi ebꞌ tuꞌ.
6 Chi wal cꞌal pax tet ebꞌ txꞌoj conobꞌal chi yaoc sbꞌa yul jin kꞌabꞌ, yu jin yakꞌon servil, cꞌal yoc ebꞌ yin eyilal ey jin yin camcꞌulal, ta oj sjije scꞌual xewilal ebꞌ, catuꞌ tecꞌan wal oj yute sbꞌa ebꞌ yin jin wa kꞌane,
7 jain oj wiꞌtej ebꞌ bꞌey jun wonan tol wet yeocoj, catuꞌ oj wakꞌon wal tzalabꞌoj scꞌul ebꞌ bꞌey snail bꞌey chi oc txa ey jin. Oj jin chaꞌ xaambꞌal, cꞌal yofrenda ebꞌ oj yakꞌ yibꞌan jun yet xaambꞌal tol wet yeocoj, yutol jaꞌ jin templo tiꞌ, oj al-le yin tol snail txa yeoc yu masanil conobꞌ.
8 Jain Jehová jin, jain chi walaꞌ tol oj jin yambꞌa pax tej ebꞌ Israel eycantoj jaxca presowom bꞌey wan txꞌoj conobꞌal. Oj wiꞌ pax tej wanxa ebꞌ man yetbꞌi oj sbꞌa yetoj ebꞌ, oj jin yambꞌa oc ebꞌ, yet watxꞌ junxane chi yun can ebꞌ yetoj ebꞌ jin conobꞌ, ẍi Dios.
Jaꞌ Spena Naꞌbꞌal Ebꞌ Syaawil Conobꞌ
9 Chi yalon Dios jaxca tiꞌ: Tit ojabꞌ ebꞌ conobꞌlaj jaxca noꞌ chiꞌwawom noꞌ. Tit ojabꞌ ebꞌ jaxca chi yun stit noꞌ xol-laj teꞌal noꞌ yet chi chiꞌle eytoj noꞌ meꞌ.
10 Yutol jaꞌ ebꞌ eyoc steynemaloj jin conobꞌ, jaxca tol cꞌam chi skeꞌ yilwi ebꞌ, cꞌamxa chi naꞌcha el niꞌoj yu ebꞌ, laan ebꞌ jaxca junoj noꞌ txꞌiꞌ cꞌam chi el yaw. Tol telan cꞌal ey ebꞌ sweyi chi ecꞌ cꞌu. Asan weyan chi yoche ebꞌ chi yunne.
11 Laan ebꞌ jaxca noꞌ txꞌiꞌ ey cꞌal swail, cꞌam bꞌakꞌin chi noel scꞌul ebꞌ. Jaꞌ ebꞌ eyoc yilomaloj jin conobꞌ, cꞌam chi naꞌcha el niꞌoj yu ebꞌ. Asan cꞌal tzet chi yoche scꞌul ebꞌ, jaꞌ chi sey yunne.
12 Chi yalon ebꞌ jaxca tiꞌ: Toonwej cu sey vino, jaꞌ ojabꞌ teꞌ an caw jow chi kucꞌwej eytoj, yet watxꞌ chi too an tuꞌ yul cu jolom; jacꞌalaꞌ quey pax tuꞌ chi kunwej yet yecal yabꞌ jaxca tiꞌ, ma xin yel xacꞌal oj ecꞌbꞌantoj yibꞌan kuqꞌuen yet yecal tuꞌ, ẍi ebꞌ.