2 Jaꞌ ebꞌ asan cꞌal swatxꞌilal jix sbꞌeybꞌalne, jaꞌ yet chi cam ebꞌ tol chi xew ebꞌ, catuꞌ chi apni oc ebꞌ bꞌey cꞌamxa bꞌiscꞌulal.

4 ¿Mac yin chex bꞌuchwa che naꞌ? ¿Mac yin chex etzꞌwai? Jaex tiꞌ caw penawom jex, lekꞌtiꞌ jex pax oj.

5 Jaꞌ bꞌey yichlaj teꞌ jii bꞌey yaax xaj teꞌ, jatuꞌ che yun amulal, catuꞌ che yiꞌon a can sbꞌi wan comon dios che yalon je diosaloj, catuꞌ che yakꞌon ebꞌ je yuninal yin xaambꞌalil xol-laj chꞌen chꞌen bꞌey stiꞌlaj jaꞌ.

6 Chi yalon pax Jehová jaxca tiꞌ: Jaꞌ jaex Israel jex tiꞌ, caw chi ẍaꞌ je cꞌul chex oc yin eyilal tet chꞌen chꞌen ey yul-laj jobꞌe. Jaꞌ wan tuꞌ jix je sicꞌ can el je diosaloj. Jaꞌ bꞌey che sec ey teꞌ an yin xaambꞌalil, cꞌal je yakꞌon masanil satlaj je yawo ¿Chi tom la je naꞌ tol chin tzala yu jun tuꞌ, chim je naꞌ tol oj wakꞌ mimancꞌulal je yin?

7 Jaꞌ bꞌey jun wonan caw naat yea steel, jatuꞌ che waꞌne je weyubꞌ, jaꞌ tituꞌ chex a cꞌal pax toj je yakꞌon je xaambꞌal.

8 Jaꞌ bꞌey yintaj smajil je na, jatuꞌ che yaoctoj yechel je diosal tol yaabꞌetaj yul jin sat. Jal pax jin jain tiꞌ, chin toocan qꞌueycꞌulal je yu. Che tꞌirbꞌan el je bꞌa tituꞌ, chex ey telan sat jun je miman txꞌat. Che yakꞌon je wa kꞌane yetoj ebꞌ winaj chi yoche je cꞌul che yun mul yetoj, catuꞌ chex oc tꞌanan yin yechel wan comon dios tuꞌ.

9 Che yiꞌontoj aceite cꞌal perfume, catuꞌ chex too lemna bꞌey yechel jun comon dios chi yij Moloc. Chi lawi tuꞌ, che chejontoj ebꞌ je chejabꞌ naat, yet chi too seyletej wanojxa je diosal, masantaꞌcꞌal chi apni oc ebꞌ bꞌey ey spixan ebꞌ camom.

10 Caw chex cꞌuumbꞌi a sicꞌlebꞌil, yutol naat chex eqꞌui, cꞌam chi naꞌcha el niꞌoj je yu, ta tol cꞌam niꞌoj yopiso tzet che waꞌne tuꞌ. Yutol ey tzet caw ujtebꞌil oc je yu, yuxan cꞌam cꞌal chex oc tucan je yeqꞌui, yutol akꞌbꞌil je loꞌbꞌe.

11 ¿Mactxequel wan comon dios bꞌey chex xiwi, catuꞌ caw miman yeloc apnoj yul je sat, jain tiꞌ manxa naꞌanoj jin je yu, yutol jix jin to qꞌueycꞌulal je yu? ¿Yu mi tol cꞌam tzet chi walaꞌ, cꞌam cꞌal bꞌey chex jin tzuꞌ, yuxan cꞌamxa weloc apnoj yul je sat?

12 Jal tinaniꞌ xin, oj jin txꞌoxeloj cꞌal walon el je bꞌeybꞌal xol-laj ánima, jaꞌ je naꞌoni tol caw watxꞌ je bꞌeybꞌal, cꞌam niꞌoj tzet oj je yiꞌ yin wan je diosal jix je waꞌne tuꞌ.

13 Jaꞌ yet oj el je yaw je kꞌanon jin colwal, colwa ojabꞌ jun bꞌulan je diosal tuꞌ je yetoj. Jaꞌ masanil wan tuꞌ, tuxa cꞌal oj xuꞌletoj ebꞌ yu kaꞌeꞌ, tucꞌal oj xuꞌle qꞌueya ebꞌ. Jal pax mactxequel chi yaoc scꞌul win xin, oj caey cꞌal ecꞌ bꞌey jun conobꞌ tiꞌ, catuꞌ oj eecꞌal ecꞌ bꞌey jun wonan bꞌey chi oc eyilal ey jin, ẍi Jehová.

15 Yutol jaꞌ jun caw miman yeloc apnoj, jaꞌton Dios, Naj tol iquis cꞌal ecꞌ yin tobꞌalkꞌinal, jaꞌ chi alon jaxca tiꞌ: Jain tiꞌ, caan jin bꞌey yel xacꞌal can eya tol wet yeocoj; ey jin cꞌal pax ecꞌ yetoj ebꞌ tol yeynajil chi yute sbꞌa, jaꞌton ebꞌ chi snaꞌ sbꞌa scꞌul; catuꞌ chi wakꞌon pax smimanil scꞌul ebꞌ.

16 Manxa jowoj jin yin ebꞌ jin conobꞌ tiꞌ, manxa jowoj jin cꞌal yin ebꞌ masanil tiempo, cꞌamxa chi yoche jin cꞌul chi yakꞌ caabꞌcꞌulal ebꞌ ánima tiꞌ win, yutol jain jix jin waꞌne ebꞌ.

17 Jaꞌ yu spenail ebꞌ Israel jix yaocoj, yuxan jow jin yin ebꞌ jun tiempoal. Jix waoc syaꞌilal yibꞌan ebꞌ, jix jin bꞌejon can ebꞌ, jix spitne cꞌal sbꞌa ebꞌ, jix sbꞌeybꞌalne tzet chi yoche scꞌul ebꞌ.

18 Jix jin oc wal tꞌanan yin sbꞌeybꞌal ebꞌ, jix jin naꞌoni, tol oj wante ebꞌ. Oj wijbꞌa ebꞌ, catuꞌ oj jin mimancꞌulnen ebꞌ chi cus scꞌul yu spenail.

19 Queyton wal tuꞌ oj yun yalon watxꞌ kꞌane ebꞌ ey jin. Oj walon jaxca tiꞌ: Jantaj ebꞌ naat ey, yetoj cꞌal ebꞌ cawil ey, ey ojabꞌ watxꞌcꞌulal sna xol ebꞌ, yutol jain oj wante ebꞌ jin conobꞌ tiꞌ, jin chi.

20 Jal pax ebꞌ penawom xin, laan wal ebꞌ jaxca chi yun ya pomna sat jaꞌ mar, tol cꞌamxa chi skeꞌ yoc tucanoj, catuꞌ chi yiꞌon cꞌaltej jantaj tzetyetal tol tzꞌiltaj.

21 Jaꞌ ebꞌ penawom, cꞌam niꞌoj watxꞌcꞌulal oj yil ebꞌ, ẍi Dios.