Jaꞌ Yet Chi Kijlen Nocha Cu Bꞌa
58
Jix yalon Jehová ey jin jaxca tiꞌ:Ael ja waw yetoj masanil ja wip, yelcꞌulal ojabꞌ chi el yaw yul ja nukꞌ jaxca wal yokꞌ junoj chꞌen trompeta. Akꞌ yotajne el ebꞌ jin conobꞌ, jaꞌton ebꞌ yicꞌaal Jacob, tol caw jix oc spenail ebꞌ jin sattaj.
2 Junjun cꞌal ebꞌ chi oc yin eyilal ey jin yaloni. Chi yalon ebꞌ tol caw chi yoche ebꞌ chi yotajne el jin bꞌeybꞌal. Laan xacꞌal chi yute sbꞌa ebꞌ jaxca junoj conobꞌ tol watxꞌ sbꞌeybꞌal. Cꞌam bꞌey chi yiꞌel snaꞌbꞌal ebꞌ yin jin chejbꞌanil. Caw chi yoche ebꞌ chi yotajne el jin chejbꞌanil yin sjichanil, chi xꞌoxon el ebꞌ, tol ey stzalacꞌulal ebꞌ chi oc yin eyilal ey jin an, chi xij yaloni.
3 Yu jun tuꞌ, yuxan chi yal ebꞌ ey jin jaxca tiꞌ: Naꞌbꞌacꞌal chi kijle nocha cu bꞌa jon, cꞌam pax chon ja wilaꞌ. Naꞌbꞌacꞌal chi kiꞌey cu bꞌa ey jaach, cꞌam pax keloc apnoj yul ja sat, ẍi ebꞌ. Yel toni, yutol jaꞌ yet scꞌual yet che yijle nocha je bꞌa tuꞌ, yelcꞌulal che yun tzet chi ẍaꞌ je cꞌul, cꞌal je yetnen ebꞌ ánima chi mulna je yetoj.
4 Jaꞌ yet scꞌual yet che yijle nocha je bꞌa, jaxa teelebꞌail cꞌal jowal che yunne, catuꞌ yelcꞌulal tol che makꞌle je bꞌa yetoj je yet animail. ¿Chim la je naꞌ tol oj jin chaꞌ je txa yet che yijle nocha je bꞌa jaxca tuꞌ?
5 Jaꞌ yet ey jex oc yin je yijle nocha je bꞌa, jaex cꞌal oc che yetne je bꞌa, tuxa cꞌal chi ey cotxan je nukꞌ jaxca junoj teꞌ aa, chex ey telan yibꞌan coẍtal, catuꞌ nonaj el yibꞌan yu stikꞌakꞌil taan. ¿Tumi jaꞌ jun tuꞌ smoo che yun yet che yijle nocha je bꞌa? ¿Chim la je naꞌ tol oj ẍaꞌ jin cꞌul wan tuꞌ?
6 Yuxan chi wal ey jex jaxca tiꞌ: Jaꞌ yet che yijle nocha je bꞌa, man xolilaloj jaxca tuꞌ. Jaꞌ tzet sowalil che yunne yet che yijle nocha je bꞌa jin sattaj, jaꞌton wan tiꞌ: Tol che colel ebꞌ je yet animail eyoc yul skꞌabꞌ ebꞌ pena snaꞌbꞌal, cꞌam ojabꞌxa che yaoc mulnail yibꞌan ebꞌ, che jajon el ebꞌ ánima eyoc yin etnecꞌulal.
7 Che poꞌon cꞌal pax ecꞌ je loꞌbꞌe snan xol ebꞌ ey swail; jaꞌ ebꞌ cꞌam sna, che yakꞌ sposada ebꞌ bꞌey je na, che yakꞌon spichil ebꞌ cꞌam spichil, catuꞌ cꞌam cꞌal che bꞌej je colwai tet ebꞌ je yet conobꞌ.
8 Ta jaxca tuꞌ oj je yunne, jaꞌ jin watxꞌcꞌulal oj txeclo a je yin jaxca chi yun sajbꞌi el yet skꞌinibꞌalil. Yin eymanil oj yun jin colwa je yin yet chi waꞌxi je cꞌul yet chi jul junoj syaꞌilal je yin. Jaꞌ je jichanil bꞌabꞌel stoo je sattaj; jaxa wipalil tzajan oc je yintaj yu jex jin teyneni.
9 Jaꞌ yet chex txali ey jin, oj jin takꞌwoj ey jex, jaꞌ yet che kꞌanon jin colwal, oj jin takꞌwoj ey jex jaxca tiꞌ: Ti ey jin, jin chi ey jex. Ta tol che qꞌueycan el masanil spenail je xol, ta cꞌamxa che yetne junoj je yet animail, tam wal che naꞌa kꞌane yibꞌan ebꞌ,
10 ta tol che yakꞌ je bꞌa yin je yakꞌon servil ebꞌ ey swail, catuꞌ chex colwa tet ebꞌ chi cus scꞌul yu mebꞌail. Ta tol jaxca tuꞌ oj je yunne, oj txeclo a je watxꞌilal snan xol ánima, jaxca chi yun xeclo a sajkꞌinal xol kꞌejkꞌinal yet chuman cꞌu.
11 Ta jaxca tuꞌ oj je yute je bꞌa, jain xa Jehová jin tiꞌ oj jex jin quetz bꞌeyoj. Caw oj yakꞌ sobra je loꞌbꞌe oj wakꞌ ey jex bꞌey txꞌotxꞌ cusiltaj txꞌotxꞌ. Oj wakꞌon yip je mimanil, laan oj je yun jaxca junoj awo tol ey cꞌal oc yal. Laan jex jaxca junoj jaꞌ tol chi aol snukꞌ, tol cꞌam bꞌakꞌin chi tantoj.
12 Oj je caꞌ waꞌne a je conobꞌ uchbꞌil ey yet tax peyxa, jaꞌton yibꞌan yich waꞌnebꞌil cꞌaltaꞌ ey yet tax cꞌal peyxa tuꞌ. Oj al-le je yin tol caꞌ waꞌnem jex a smuroal cꞌal na stiꞌlaj scalleal conobꞌ.
Kꞌane Yin Scꞌual Xewilal
13 Jaꞌ Jehová chi alon jaxca tiꞌ: Ta tol che naꞌ tol jaꞌ scꞌual xewilal wet yeoc je yu, cꞌam ojabꞌ che waꞌne junoj tujan je mulnail yet jun cꞌual tuꞌ, ta chex tzalai yu cꞌal tol ey yeloc apnoj jun cꞌu tuꞌ yul je sat, cꞌam ojabꞌ che sey tzet che yun yet jun cꞌual tuꞌ, cꞌam ojabꞌ che yal junoj pena kꞌane cꞌam yeloc apnoj,
14 ta jaxca tuꞌ oj je yunne, oj ilcha tzalacꞌulal je yu win an. Jain oj walaꞌ tol caw ey je yeloc apnoj yibꞌan masanil conobꞌ bꞌey yul yibꞌankꞌinal tiꞌ, catuꞌ oj wakꞌon tzalabꞌoj je cꞌul yin je majon oc txꞌotxꞌ txꞌotxꞌ jix je chaꞌ je majuloj yu je yichmam Jacob. Jain Jehová jin chi wakꞌ jin tiꞌ, ẍi Dios.