2 ¡Man jaxca oj tuꞌ! Jaꞌ je penail jaꞌ chi aon ey je nan yetoj Dios, jaꞌ je mul tuꞌ chi oc jenan je nan je xol yetoj Naj, yu jun tuꞌ, yuxan cꞌamxa chi yoche Naj chi takꞌwi ey jex.

3 Yutol jaex tiꞌ, caw jix oc je penail yu je makꞌom cam je yet animail. Jix el ẍiqꞌuil ebꞌ je yu yet che makꞌon yaso ánima. Asanxane cꞌal lekꞌtiꞌal cꞌal spenail che yalaꞌ.

4 Cꞌam junoj jex che waꞌne el junoj je kꞌane bꞌey sattaj ebꞌ yaaw yin sjichanil. Man yin oj xolilal chi yun je bꞌeybꞌalne sjichanil. Che naꞌ tzet chi yun je yakꞌon eyqꞌuey ebꞌ ánima yetoj je kꞌane cꞌam yeloc apnoj, cꞌal lekꞌtiꞌal. Asan cꞌal spenail eyoc yin je naꞌbꞌal je yuneni, catuꞌ che yunen xacꞌal tzet che yoche ocoj.

5 Jaꞌ tzet che naꞌ je yunen tuꞌ, laan jaxca sjos noꞌ xutx labꞌa, yutol jaꞌ junoj mac chi loꞌon eytoj wan jos tuꞌ, tol tꞌinan cꞌal scami. Jaꞌ yet chi makꞌle poꞌo noꞌ jos tuꞌ, labꞌa xa chi elol yul.

6 Jaꞌ tzet che naꞌ yu yoc je watxꞌiloj yul je yet, laan jaxca xꞌanil yal stiꞌ noꞌ xim, tumi oj skeꞌ swaꞌnele junoj an pichile yu yoc je majiloj. Yuxan asan cꞌal spenail, makꞌwal, cꞌal elkꞌan che yunne.

7 Jun txolan chex too lemna yin spenail, yin eymanil chex too je makꞌon cam ebꞌ cꞌam spenail. Asan yin spenail eyoc je naꞌbꞌal, yal cꞌal bꞌey chex eqꞌui che yetne cantoj, cꞌal je yakꞌon lawoj ey tzettaj yetal.

8 Asan cꞌal jowal che yunne, cꞌam niꞌoj sjichanil yin je bꞌeybꞌal. Junelne tol man watxꞌoj je bꞌeybꞌal. Jaꞌ mactxequel chi oc tzajan je yintaj, cꞌam niꞌoj tzalacꞌulal chi yiꞌ ebꞌ je yin.

9 Yu jun tuꞌ, che yalon jaxca tiꞌ: Jaꞌ tinaniꞌ chi naꞌcha el ku, tzet yu, yuxan cꞌam chi cu col-le el yul skꞌabꞌ ebꞌ chi cu etneni. Chi to wal kechbꞌane sajkꞌinal; cꞌam cꞌal, asanxane kꞌejkꞌinal joyan oc kinlaj. Chi tocꞌal kechbꞌane cu jajcha eloj, cꞌam cꞌal chi cu col-le eloj.

10 Tuxa cꞌal chi cu matxtene ecꞌ bꞌey chi cu eqꞌui, jaxca yet tol cꞌam sbꞌakꞌ cu sat. Chuman wal cꞌu chi cu telcꞌotoj, jaxca wal tol akꞌbꞌalil. Caxcꞌal mi tol caw ey kip chi yun cu naꞌoni, jaxca tol camnaj jon eloj.

11 Ey bꞌey chi tit jowal, caxcꞌal chi nilili yul cu nukꞌ jaxca noꞌ oso, jaxa pax yet junxa txolan xin, tuxa cꞌal chi nil-labꞌi yel kaw jaxca noꞌ paramuch. Chi kechbꞌane cꞌal cu colcha eloj, cꞌam cꞌal chi cu col-le pax eloj. Chi kechbꞌane cꞌal cu jajcha eloj, cꞌam bꞌakꞌin oj cu jajcha eloj.

12 Jaach Jehová jin Diosal, yel xacꞌal jix kaoc cu penail ey jaach. Jaꞌ yu cu penail tuꞌ jon, yuxan jix tit can kibꞌan. Jaꞌ tzet jix kun tuꞌ jon, cꞌam chi too qꞌueycꞌulal ku, catuꞌ kotaj jantaj yeoc cu penail ey jaach.

13 Jaach Jehová cu Diosal, caw wal jix oc cu pital ey jaach, caw ma yoche cu cꞌul jix cu oc tzajan ja wintaj. Asanne cꞌal yin etne ánima eyoc cu naꞌbꞌal jon, caw pena tzet chi cu naꞌ yin ebꞌ jon.

14 Jantaj watxꞌ bꞌeybꞌale chi yun ebꞌ ket animail jon, caw cꞌam yeloc apnoj yul cu sat jon. Jaꞌ junoj kꞌane tol yel, junelne cꞌam yeloc apnoj bꞌey chi syambꞌa sbꞌa ebꞌ ánima. Yu jun tuꞌ, jaꞌ sjichanil, manxa txequeloj yeoc yul cu sat jon.

15 Cꞌamxa junoj mac chi alon kꞌane tol yel, jaꞌ ebꞌ chi bꞌejon can spenail, chi tokꞌle ecꞌ tzettaj yetal ebꞌ. Jaꞌ Dios caw jow yutol cꞌam chi naꞌle oc yin ebꞌ ánima yin sjichanil.

16 Tuxa cꞌal chi qꞌueycan a scꞌul Dios yiloni, yutol cꞌamxa junoj chi colon el ebꞌ chi etexi. Yu jun tuꞌ, jaꞌcaw Dios oj yaoc sbꞌa yet chi swaꞌnen eloj, oj colwa yin ebꞌ yetoj yipalil.

17 Jaꞌ sjichanil tuꞌ, laan jaxca smajil xaamscꞌul ebꞌ soldado chi too yin jowal. Jaꞌ colbꞌanile chi akꞌle tet ebꞌ ánima, laan jaxca junoj chꞌen kꞌoxkꞌome cꞌam bꞌakꞌin chi jolchatoj. Jaxca junoj soldado eyoc chꞌen pichile yet jowal yu, queytuꞌ oj yun sjul Jehová yetoj sjowal scꞌul, yu spajtzen yu ebꞌ chi etexi.

18 Jaꞌ oj pajtzen tet junjun, jatacꞌalaꞌ tzet jix sbꞌeybꞌalne; oj yaoc syaꞌilal ebꞌ chi jowi oc yin. Jaꞌ ebꞌ chi chichon oc scꞌul yin, oj spajtze tet ebꞌ jaxca wal smooalil, jantaj cꞌal wan conobꞌlaj caan bꞌey junxa skꞌaxepal jaꞌ mar.

19 Masanil ebꞌ ánima bꞌey yul yibꞌankꞌinal tiꞌ, bꞌey chi aol cꞌu masantaꞌcꞌal bꞌey chi too cꞌu, caw miman yeloc apnoj Jehová yul sat ebꞌ, yet oj yilon oc jantaj stzejejial cꞌal yipalil Dios ebꞌ. Yutol oj jul Naj, jaxca chi yun sjul junoj elom jaꞌ tol eyoc cajxuchum kaꞌeꞌ xol.

20 Jaꞌcaw Jehová chi aloni tol oj juloj, yu scolon el conobꞌ Sión yul skꞌabꞌ syaꞌilal, jaꞌton masanil ebꞌ yicꞌaal Jacob tol chi snaꞌ sbꞌa scꞌul yin spenail.

21 Yu jun tuꞌ, jix yalon Jehová jaxca tiꞌ: Jaꞌton jun jin wa kꞌane chin waꞌne je yetoj tiꞌ, catuꞌ chi wakꞌon jin tiꞌ yin. Jaꞌ Wespíritu eyoc je yin, cꞌal cuybꞌanile jix wakꞌ ey jex, cꞌamxa bꞌakꞌin oj el je yin, tam wal yin ebꞌ je yicꞌaal, ẍi Dios.