2 Jaꞌ wanxa nación bꞌey yul yibꞌankꞌinal tiꞌ, jaꞌ kꞌejkꞌinal joyan oc yin ebꞌ, jal jex jaex tiꞌ, jaꞌ jin sajkꞌinal jix wakꞌ ey jex, catuꞌ chi txeclo a jin tzejejial je yin.

3 Jaꞌ wanxa nacionlaj tuꞌ, oj jul ebꞌ je cꞌatan yu jun sajkꞌinal tuꞌ, yetoj cꞌal ebꞌ rey, oj jul ebꞌ jul yilon jin tzejejial chi txeclo el je yin tuꞌ.

4 Aanwej tꞌananoj, catuꞌ chex ecꞌ tꞌananoj je yinlaj. Tol masanil ebꞌ je yet conobꞌ chi syambꞌa sbꞌa ebꞌ, catuꞌ chi jul ebꞌ je cꞌatan, jaxa je yilon sjul ebꞌ je cꞌaal tol naat eycantoj, cꞌal ebꞌ ix je cutzꞌin tol lacbꞌil oj yun stit ebꞌ ix.

5 Jaꞌ yet oj je yilon jaxca tuꞌ, caw oj jul je miman tzalacꞌulal. Caw oj mimanbꞌoj tzalacꞌulal snan je xol. Yutol oj yiꞌtej jantaj sbꞌeomal wan nacionlaj ebꞌ ey bꞌey skꞌaxepal ecꞌtoj jaꞌ mar, catuꞌ oj yiꞌontej ebꞌ ey jex.

6 Oj noel masanil sat je txꞌotxꞌ tiꞌ yu jantaj noꞌ camello chi tit bꞌey Madián cꞌal bꞌey conobꞌ Efá. Oj jul cꞌal pax masanil ebꞌ a Sabá, tol iꞌbꞌil oc oro cꞌal incienso yu ebꞌ, catuꞌ oj yalon el skꞌaneal ebꞌ yu jantaj tzet chi wunne tol caw qꞌueyubꞌtaj xacꞌal yoqui.

7 Masanil noꞌ meꞌ ey bꞌey Quedar, je yet oj yun can oc noꞌ. Yetoj cꞌal masanil noꞌ ey bꞌey Nebaiot, oj oc yopiso noꞌ je yu yet che yakꞌon noꞌ yin xaambꞌal ey jin, jaꞌton je yofrenda tol caw ochebꞌil wu. Oj wute jaxca tuꞌ, yet watxꞌ sakꞌal yili jin templo yul je sat.

8 Oj je yalon jaxca tiꞌ: ¿Tzetyetal wan jaxca xacꞌal asun chi ecꞌ tituꞌ, jaxca xacꞌal yili yet chi octoj noꞌ uch yul sweyubꞌ?

9 Jaꞌ wan che yil tuꞌ, barco ebꞌ chi tit bꞌey skꞌaxepal jaꞌ mar, bꞌabꞌel wan chi tit bꞌey Tarsis. Jaꞌton wan inen oc ebꞌ je yet conobꞌ, yetoj cꞌal ebꞌ je yuninal tol iꞌbꞌil oc chꞌen oro cꞌal plata yu ebꞌ, yu yiꞌle a can jin bꞌi jain Jehová je Diosal jin tiꞌ, yutol miman weloc apnoj, catuꞌ oj wakꞌon bꞌina je bꞌi tol ey je yeloc apnoj.

10 Jaꞌ ebꞌ ánima txꞌoj conobꞌal, ja ebꞌ oj caꞌ waꞌnen a smuroal je conobꞌ; jaxa ebꞌ rey oj jex akꞌon servil. Caxcꞌal jix waoc syaꞌilal je yin yetoj sjowal jin cꞌul, jal tinaniꞌ xin, yetoj wal jin camcꞌulal je yin, yuxan chi okꞌ jin cꞌul je yin.

11 Jaꞌ spuertail je conobꞌ oj can cꞌal jajanoj. Man cꞌal oj maji yet cꞌualil cꞌal yet akꞌbꞌalil, yet chi skeꞌ yiꞌletej sbꞌeomal wanxa conobꞌlaj ey jex, yetoj cꞌal sreyal ebꞌ tol eyqꞌueynajxa.

12 Jal wan nacionlaj tol man oj yal scꞌul oj jex yakꞌ servil, oj akꞌle lawoj el ebꞌ.

13 Jaꞌ jantaj swatxꞌilal ey bꞌey Líbano oj iꞌletej ey jex: Teꞌ ta, teꞌ kꞌuꞌta, yetoj cꞌal teꞌ qꞌuisis, yet oj oc teꞌ yin swaꞌxubꞌaloj jin templo, jaxca tuꞌ caw miman yeloc apnoj, cꞌal swatxꞌil yili bꞌey snail jin kꞌane.

14 Jaꞌ masanil jantaj yicꞌaal ebꞌ jix jex etneni, oj jul ebꞌ yin eyilal ey jex. Masanil ebꞌ jix jex intajnen eloj, oj jul ey caan ebꞌ yu yiꞌon ey sbꞌa ebꞌ ey jex, catuꞌ oj yalon ebꞌ je yin tol jin conobꞌ jex; oj yal ebꞌ tol jaꞌ Sión jin conobꞌ, jain je Diosal jin tiꞌ, yutol miman weloc apnoj.

15 Cꞌamxa bꞌakꞌin oj jex can je txꞌojli, manxa oj jex intajnele eloj, yutol oj wakꞌ jin watxꞌcꞌulal ey jex, catuꞌ cꞌamxa slawubꞌal jun je tzalacꞌulal tuꞌ.

16 Jaꞌ wan nacionlaj, yetoj cꞌal sreyal ebꞌ, jaꞌ ebꞌ oj jex akꞌon servil oj yiꞌtej sbꞌeomal ebꞌ ey jex, jaxca wal chi yun yilon chꞌibꞌ yuneꞌ junoj ix txutxe. Queytuꞌ oj yun snaꞌcha el je yu, tol jain Jehová je Diosal jin, je Colomal weoc jain sDiosal jin naj Jacob tiꞌ, jain chex jin coleloj.

17 Yu jun tuꞌ, jantaj tzet ey, ey jex, oj wakꞌ sqꞌuexel ey jex: Jaꞌ chꞌen bronce, chꞌen oro oj wakꞌ sqꞌuexeloj, jaxa chꞌen plata oj wakꞌ sqꞌuexeloj chꞌen hierro, jaxa chꞌen bronce oj wakꞌ sqꞌuexeloj teꞌ teꞌ, jaꞌ wan comon chꞌen, jaꞌ chꞌen hierro oj wakꞌ sqꞌuexeloj. Manxa oj jex etex yu ebꞌ eyoc yin yaawil yul je conobꞌ, yutol yin sjichanil cꞌal watxꞌcꞌulal oj yun yakꞌon yaawil ebꞌ yin tzalacꞌulal.

18 Jaꞌ yul je conobꞌ tuꞌ, cꞌamxa bꞌakꞌin oj je yabꞌ skꞌumal smakꞌle cam ebꞌ ánima. Cꞌamxa mactxequel oj jex ujten eloj, cꞌal yuchon lawoj yul je conobꞌ tuꞌ. Jaꞌ colbꞌanile chi wakꞌa, jaꞌton wal jun tuꞌ jaꞌcaw je muroal yeocoj, jaꞌ je bꞌinabꞌilal chi wakꞌa, jaꞌton caw eyoc je yipomaloj jaxca yeoc smajil stiꞌ je conobꞌ.

19 Jaꞌ yet tuꞌ, manxa sowaliloj tol jaꞌ yajan cꞌu oj jex tzejtanen yet cꞌualil, tam wal tol jato yajan xꞌaaw oj jex tzejtanen yet akꞌbꞌalil, yutol jain Jehová jin, je sajkꞌinal weocoj. Jain je Diosal jin oj jex wakꞌ bꞌinaoj. ^a

20 Man oj lawoj ey jun sajkꞌinal oj wakꞌ ey jex tuꞌ; oj oc yopiso je yu sqꞌuexeloj yajan cꞌu cꞌal yajan xꞌaaw, cꞌam bꞌakꞌin oj lawoj, yutol jain Jehová jin je sajkꞌinal weocoj. Jantaj cuscꞌulal jix ecꞌ el je yibꞌan, oj lawoj can ecꞌ yet jun cꞌual tuꞌ.

21 Jaꞌ masanil ebꞌ je yet conobꞌ yet jun tiempoal tuꞌ, watxꞌ xacꞌal oj yute snaꞌbꞌal ebꞌ. Oj yiꞌcan oc smajul txꞌotxꞌ ebꞌ. Laan ebꞌ jaxca yaol swol junoj awo tol jain caw jix wawaꞌ; jaꞌ jun mulnail tuꞌ, jain caw jix jin waꞌne yu yiꞌle a can jin bꞌi.

22 Jaꞌ ebꞌ ánima tol txenne sbꞌisil je xol tuꞌ, oj wakꞌ chꞌibꞌ sbꞌisil ebꞌ, caw miman oj yun sbꞌisil ebꞌ jaxca junoj miman nación. Jaꞌ yet oj apnoj stiempoal, jain wal caw Jehová jin oj wakꞌ yun wan tiꞌ yin eymanil, ẍi Dios.