2 cꞌal walon eloj, tol jix jul jun abꞌil cꞌal scꞌual jun colbꞌanile chi yakꞌ Jehová cu Diosal, cꞌal jul yakꞌon spajtzebꞌal tet ebꞌ chi jowi oc kin. Jix jin chejletej yu jul wakꞌon smimanil scꞌul ebꞌ eyoc yin cuscꞌulal.

3 Jix jin juli, yu jul wakꞌon scorona ebꞌ yet tzalacꞌulal jaꞌton ebꞌ eyoc yin cuscꞌulal bꞌey Sión, jaꞌton sqꞌuexeloj stikꞌakꞌil taan chi yaatoj ebꞌ yin sjolom, cꞌal tzalacꞌulal sqꞌuexeloj okꞌil; jaxa bꞌit yet alo watxꞌ kꞌane chi oc can sqꞌuexeloj cuscꞌulal. Laan oj yun ebꞌ jaxca junoj teꞌ awbꞌeal teꞌ tol jaꞌcaw Jehová jix awoni, yet watxꞌ chi sbꞌeybꞌalne sjichanil ebꞌ, cꞌal yiꞌle a can sbꞌi Naj yu ebꞌ.

4 Oj scaꞌ waꞌne a ebꞌ wan conobꞌ tol uchchanajtoj, cꞌal swaꞌnen a wan na ebꞌ tol makꞌbꞌil ey yet yalantoj.

5 Jaꞌ ebꞌ txꞌoj conobꞌal oj teynen je meꞌ, oj oc ebꞌ yin skꞌuon je txꞌotxꞌ cꞌal steynen ebꞌ jantaj bꞌey awbꞌil an uva je yu.

6 Oj yalon ebꞌ ánima je yin tol ey je yopiso yin je yakꞌon xaambꞌal tet Jehová, ẍejabꞌ jex Naj cu Diosal. Oj tzala je cꞌul yetoj sbꞌeomal wanxa nacionlaj, watxꞌ xacꞌal je yili yu tzetyetal watxꞌ yili ey tet ebꞌ, jaꞌ oj je kꞌanbꞌalne, yet watxꞌ oj jex bꞌinale yin je yopiso.

7 Jaex tiꞌ, caw jix ecꞌbꞌantoj je yabꞌen syaꞌil, caw jix ecꞌbꞌantoj yel je qꞌuixwil cꞌal je bꞌuchlei; yuxan jaxa tinaniꞌ xin, caw oj ecꞌbꞌantoj yun je chaꞌon bꞌeomal yul je conobꞌ, cꞌamxa slawubꞌal je tzalacꞌulal.

8 Jaꞌ Jehová chi alon jaxca tiꞌ: Jaꞌ sjichanil chi yoche jin cꞌul, caw jow jin yin ebꞌ elkꞌom cꞌal yin ebꞌ chi yetne yet animail. Caw oj wakꞌ eloc tzet jix walaꞌ, tol oj wakꞌ spaj tet ebꞌ, catuꞌ oj walon can junoj jin wa kꞌane yetoj ebꞌ.

9 Caw miman oj yun sbꞌina sbꞌi je yicꞌaal xol masanil nacionlaj. Jaꞌ masanil mactxequel oj jex ilonoj, jaꞌ ebꞌ tuꞌ oj naꞌcha el yu ebꞌ tol jaꞌ Jehová chi akꞌon watxꞌcꞌulal ey jex.

10 Caw wal chin tzala tinaniꞌ yu Jehová, caw jix jul jin tzalacꞌulal yu jin Diosal, yutol caw watxꞌ jix jin yute yetoj colbꞌanile cꞌal sjichanil, jaxca chi yun swaꞌnen sbꞌa junoj naj achꞌe, ma junoj ix kꞌopo yet chi too yin nupil.

11 Laan jaxca chi yun ẍꞌibꞌ junoj jinat awbꞌil ey yul txꞌotxꞌ, ma jaxca chi yun yelol swol junoj teꞌ teꞌ, queytuꞌ chi yun yakꞌon txeclo a Jehová jantaj sjichanil cꞌal smimanbꞌilal sattaj masanil nacionlaj, yu yiꞌle a can sbꞌi Naj.