2 Masanil nacionlaj oj oc tꞌanan yin je watxꞌilal cꞌal je jichanil. Oj oc tꞌanan masanil ebꞌ rey yiloni tol miman je yeloc apnoj, yu jun tuꞌ, yuxan oj waoc junoj acꞌ bꞌie je yin, tol jain caw Jehová jin oj wakꞌ ey jex.

3 Jaxca chi yun xeclo el yopiso junoj rey eyoc scorona, queytuꞌ je yili yul jin sat, yutol ey jex oc yul jin kꞌabꞌ.

4 Manxa cꞌal oj al-le yin je conobꞌ jaxca tiꞌ: Conobꞌ tol bꞌejbꞌilcanoj, tam wal oj al-le yin je txꞌotxꞌ, tol uchbꞌiltoj, jaꞌ tzet oj al-le je yin jaxca tiꞌ: Jun conobꞌ tol ochebꞌil yu Dios. Jaꞌ txꞌotxꞌ je txꞌotxꞌ oj yij can jaxca tiꞌ: Txꞌotxꞌ eyxa yaaw, yutol ochebꞌil jex wu. Jain oj jin oc syaawiloj txꞌotxꞌ je txꞌotxꞌ tuꞌ.

5 Jaxca wal junoj naj achꞌe yetoj junoj ix kꞌopo, tol nupanxa. Queytuꞌ oj wun je yetoj jain je Diosal jin tiꞌ; jaxca tol oj jin oc je yichamiloj, catuꞌ oj wakꞌon tzalabꞌoj jin cꞌul je yetoj, jaxca wal chi yun stzala scꞌul naj tol to chi nupi yetoj yistil.

6 Jex a Jerusalén, jix waoc je teynemal yibꞌan smuroal je conobꞌ. Man cꞌal oj sbꞌej jin yawten ebꞌ yet cꞌualil cꞌal yet akꞌbꞌalil. Jaꞌ mac jex chin je yawte, cꞌam ojabꞌ chex tzꞌini eyoj,

7 cꞌam cꞌal chin je yakꞌ xew yin jin mulnail masantaꞌcꞌal oj yiꞌ sbꞌa swaꞌxi a Jerusalén wu, yetoj cꞌal pax oj, masantaꞌcꞌal oj al-le watxꞌ kꞌane win bꞌey masanil yul yibꞌankꞌinal, ẍi Dios.

8 Yu jun tuꞌ, jaꞌ Jehová tuxa jix yakꞌ can stiꞌ, oj yakꞌ cꞌaltaꞌ eloc yetoj yipalil: Cꞌamxa bꞌakꞌin tol oj to jin chaꞌ sloꞌeytoj je tiriw ebꞌ je cajat, tam wal ebꞌ txꞌoj conobꞌal oj uqꞌuen eytoj je vino tol jaex wal caw jix jex mulna oc yin je waꞌneni.

9 Tol jaex wal caw oj je yambꞌa a sat je yawo tuꞌ, catuꞌ oj jex low yin tzalacꞌulal, catuꞌ oj je yalon watxꞌ kꞌane ey jin an. Oj je yambꞌa cꞌal pax a sat je yuva; jaex wal caw oj je yucꞌ yal je yuva bꞌey sattaj eltoj stiꞌ jin templo, ẍi Jehová.

10 Jex a Jerusalén, elanwejtoj bꞌey yul-laj spuertail je conobꞌ, waꞌnewej junoj bꞌe sattaj ebꞌ je yet conobꞌ. Watxꞌ chi yun je yakꞌon pananbꞌoj bꞌey jobꞌelaj, watxꞌ chi yun je yiꞌon el chꞌen chꞌen yul-laj bꞌe. Iꞌwej a je bandera yu yilon masanil nacionlaj.

11 Jaꞌ Jehová oj alon tet masanil ánima bꞌey chi lawi apnoj yul yibꞌankꞌinal jaxca tiꞌ: Alwej tet ebꞌ a Jerusalén, tol chi jul jun sColomal ebꞌ, iꞌbꞌil oc spajtzebꞌal tet ebꞌ, je chi, ẍi Dios.

12 Jaꞌ ebꞌ Israel oj akꞌle yij sbꞌi jaxca tiꞌ: Ebꞌ sconobꞌ Dios, jaꞌton ebꞌ jix colcha can el yu Jehová. Jal Jerusalén xin, oj yij sbꞌi Conobꞌ tol Ochebꞌil, cꞌamxa bꞌakꞌin oj bꞌejlecanoj, queytuꞌ yoc sbꞌi.