Jaꞌ Spaj Oj Yakꞌ Jehová Tet Ebꞌ Chi Jowi Oc Yin
63
—¿Mactxequel jun chi tit bꞌey miman conobꞌ Bosrá,bꞌey yul yet Edom, tol eyoc cajin pichile eyxa smey yili eyoc yin, catuꞌ eyxa smey chi yun kilon stita? Chi takꞌwi Naj jaxca tiꞌ:
—Jain Jehová jin, chin juli, ey wipalil jin colwai. Chi walon cꞌal pax oj, tol jix kakꞌ ganar, chi skeꞌ pax jex jin colon el yetoj wipalil, ẍi Dios.
2 —¿Tzet yu, yuxan cajin yili ja pichil, jaxca xacꞌal tol jix jaach tecꞌwi el yal uva? jin chi tet.
3 Jix yalon ey jin jaxca tiꞌ:
—Yutol jix jin tecꞌ ey wan nacionlaj jaxca chi yun stecꞌle el yal sat uva. Asanne jin, cꞌam junojxa conobꞌ jix colwa wetoj. Ey waltej sjowal jin cꞌul yet jix jin tecꞌon ey ebꞌ jin cajat, jix jin tecꞌ wal ey ebꞌ yu sjowal jin cꞌul, yuxan jix a tiẍlabꞌoj ẍiqꞌuil ebꞌ win, yu jun tuꞌ, yuxan jix chicꞌbꞌitoj jin pichil tiꞌ.
4 Yutol jix jin naꞌbꞌalne eloj tol jix jul scꞌual jin colon el ebꞌ jin conobꞌ, cꞌal jin pajtzen spenail tet ebꞌ chi jowi oc yin ebꞌ.
5 Jix ecꞌ cꞌal jin sat wiloni, ta ey mac chi colwa wetoj. Tuxa cꞌal jix qꞌueya jin cꞌul, yutol cꞌam mactxequel jix oc wetoj. Yu jun tuꞌ, yetoj sjowal jin cꞌul jix wakꞌon jowal, jix skeꞌ wu jin txꞌojli yu jin colon ebꞌ jin conobꞌ.
6 Yetoj wal sjowal jin cꞌul jix jin tecꞌon ey masanil nacionlaj. Jix jin qꞌueyon el ebꞌ yetoj sjowal jin cꞌul. Jix maltoj ẍiqꞌuil ebꞌ sat txꞌotxꞌ tiꞌ, ẍi Jehová.
Swatxꞌcꞌulal Dios Yin Israel
7 Chi woche chi walel scamcꞌulal Jehová, chin bꞌitne jantaj tzet jix yun Naj ku. Caw miman scamcꞌulal Naj kin, jaon yicꞌaal Israel jon tiꞌ. Cꞌamxa chi alcha jantaj tzet jix yun Naj ku, yu swatxꞌcꞌulal cꞌal smiman camcꞌulal.
8 Jix yalon Naj jaxca tiꞌ: Jaꞌ ebꞌ tiꞌ, jin conobꞌ ebꞌ, wuninal ebꞌ, manxa oj meltzo oc ebꞌ win, ẍi Naj, yuxan jix col-le el ebꞌ.
9 Jaꞌ yin masanil syaꞌilal ebꞌ, jacꞌal pax jun Naj jix yabꞌ syaꞌil, jaꞌcaw Naj jix xꞌoxa sbꞌa manaj junoj ángel jix colon el ebꞌ. Yutol caw ey scamcꞌulal, caw chi okꞌ scꞌul, yuxan jix col-le el ebꞌ yu. Jix iꞌle a waan ebꞌ jix quetzle bꞌey ebꞌ yu. Caw miman tiempo jix iꞌle bꞌey ebꞌ yu Naj.
10 Yel xacꞌal pit jix yute sbꞌa ebꞌ tet Jehová. Caw jix cus scꞌul Yespíritu Dios, Naj tol miman yeloc apnoj. Yu jun tuꞌ, yuxan jix tit sjowal Naj yin ebꞌ, jix yakꞌon jowal yetoj ebꞌ.
11 Jix lawi tuꞌ, jix snaꞌontej ebꞌ conobꞌ wan tzet jix yun yet tax cꞌal peyxa, yul stiempoal naj Moisés naj ẍejabꞌ Jehová. Yuxan jix skꞌanle ecꞌ ebꞌ jaxca tiꞌ: ¿Bꞌeytuꞌ eyoc Jehová tinaniꞌ, Naj jix cu colon el tet jaꞌ mar, yetoj ebꞌ jix cu ijbꞌani, jaxca chi yun junoj ilom meꞌ? ¿Bꞌeytuꞌ eyoc Naj jix yaoc Yespíritu yin ebꞌ tol caw miman yeloc apnoj cu xol?
12 Jaꞌton Naj jix xꞌox yipalil yin naj Moisés. Jaꞌ Naj jix poꞌon ey snan jaꞌ mar cu sattaj, yu xꞌoxon el smimanbꞌilal.
13 Jix yiꞌon ecꞌtoj ebꞌ sconobꞌ bꞌey snan xol jaꞌ mar. Ma cꞌal telcꞌotoj ebꞌ, jaxca xacꞌal yecꞌ noꞌ che bꞌey txꞌotxꞌ panan txꞌotxꞌ,
14 jaxca chi yun yiꞌle ecꞌtoj noꞌ wacax sat junoj acꞌal, ẍi ebꞌ. Queytuꞌ jix yun yiꞌle bꞌey ebꞌ yu Yespíritu Jehová. Jix ijbꞌale ebꞌ yet watxꞌ chi bꞌinale sbꞌi Naj yin swatxꞌil.
Txa Yu Skꞌanle Scolwal Dios
15 Jaach Jehová cu Diosal, caw yel tol cha wiltej jun lugar tol ja wet cꞌaltaꞌ yeocoj, yutol txꞌojxa swatxꞌil yili bꞌey satcan tuꞌ, bꞌey ey jaach ecꞌoj. ¿Bꞌeytuꞌ eyoc ja camcꞌulal cꞌal ja wipalil tuꞌ? ¿Bꞌeytuꞌ eyoc ja camcꞌulal tuꞌ? ¿Tumi jix lawi a ja mimancꞌulal tuꞌ kin jon xin?
16 Jaach tiꞌ, cu Diosal jaach. Caxcꞌal man otajbꞌiloj jon yu Abraham cꞌal naj Israel, jal jaach, jaach tiꞌ, cu Diosal jaach, ja wotaj jon, cu Colomal jaach cꞌaltaꞌa.
17 Jaach cu Diosal. ¿Tzet wal yu, yuxan chon ja wiꞌel yin ja bꞌeybꞌal, catuꞌ cha wakꞌon pitbꞌoj el cu naꞌbꞌal yet cꞌamxa ja weloc apnoj yul cu sat? Txꞌox ja watxꞌcꞌulal ey jon jaon ja chejabꞌ jon tiꞌ, jaon yicꞌaal jon ja conobꞌ tiꞌ, yutol ja conobꞌ keoc jon.
18 Jaon ja conobꞌ jon sicꞌbꞌil jon el ja wu tiꞌ, caw jayebꞌne chꞌan abꞌil jix kiꞌon can oc jun txꞌotxꞌ tiꞌ, jaxa tinaniꞌ, jaꞌ ebꞌ chi jowi oc kin jon jix iꞌon can ocoj, catuꞌ jix yuchon ey ja templo ebꞌ.
19 Jaxca xacꞌal tol cꞌam bꞌey cha wakꞌ yaawil kibꞌan jon, jaxca wal tol cꞌam bꞌey jix bꞌinalei ta tol ja conobꞌ keoc jon.