64
Toloj wal chi jajcha satcan tuꞌ,catuꞌ chach eyol bꞌey yul yibꞌankꞌinal tiꞌ. Toloj wal chi el yin ja cꞌul, catuꞌ cha wakꞌon bꞌilwoj txꞌotxꞌ mimej wonanlaj ja sattaj,
2 jaxca chi yun sbꞌilwi a jaꞌ jaꞌ sjuji yul ẍalu yet caw jow xaj kꞌakꞌ. Eyantej, yet watxꞌ chach yotajne el ebꞌ chi jowi oc ja win, cꞌal sbꞌilwi a masanil nacionlaj yu xiwcꞌulal ja sattaj.
3 Toloj wal cha wun tzetyetal jaxca tzet jix ja wun yet peyxa, jaꞌ tzetyetal man naꞌanoj el ku jon, catuꞌ jix ja wunen wan tzetyetal tol qꞌueyubꞌtaj xacꞌal yoqui, caw jix bꞌilwi a wan mimej wonan ja sattaj.
4 Jaꞌ yet tax peyxa, cꞌam cꞌal bꞌey jix abꞌlei tam wal ey bꞌey jix il-lei, yutol cꞌam junojxa dios laan ja wetoj, junoj chi yun wan tzetyetal cha wunne, yet chi oc swatxꞌiloj ebꞌ chi yaoc scꞌul yin.
5 Jaach tiꞌ, cha chaꞌ ebꞌ tol watxꞌ cꞌal tzet chi yun yin tzalacꞌulal, catuꞌ naꞌan cꞌal yu ebꞌ yunen jaxca tzet cha woche. Jaꞌ tinaniꞌ, caw jow jaach kin jon, yutol jix oc cu penail ey jaach, eyxatax cꞌal cꞌoli yoc cu penail ey jaach. ¿Chim wal skeꞌ cu colcha jon?
6 Cu masanil jon, laan wal kili yul ja sat jaxca junoj mac man watxꞌoj yeoc jaxca yalon ley. Jaꞌ masanil cu watxꞌ bꞌeybꞌal kaloni, laan wal yetoj junoj kꞌap tol caw tzꞌiltaj. Yu wal cu penail jon, yuxan laan jon jaxca tajin xaj teꞌ chi xuꞌletoj yu kaꞌeꞌ.
7 Tumi eyto junoj mac chi yal sbꞌa ey jaach, tam wal chi cu naꞌtej cu kꞌanon ja colwal. Yu jun tuꞌ, yuxan jix ja webꞌa el ja bꞌa ey jon, jix jon ja bꞌejcan yu cꞌal cu penail jon.
8 Jaach Jehová jin Diosal, cu Diosal jaach cꞌaltaꞌa. Jaon tiꞌ naꞌbꞌa txꞌotxꞌ jon, jaach jix jon ja tzꞌajaꞌ; jaach jix jon ja waꞌne cu masanil jon.
9 Jaach cu Diosal, cꞌam ojabꞌ chi tit ja jowal kin jon. Cꞌam ojabꞌxa cha naꞌtej jantaj cu penail jon. Ilaꞌ tol ja conobꞌ keoc jon.
10 Jaꞌ wan ja conobꞌ tol ja wet yeocoj, jix cancan yin cusiltaj txꞌotxꞌal, tuxa jix uchchatoj Jerusalén, cꞌamxa mac caan bꞌey.
11 Jaꞌ snail bꞌey chi kal cu bꞌa ey jaach, jaꞌton jun caw watxꞌ yili, jix lawi ey stzꞌaꞌtoj, jaꞌton jun bꞌey ocnaj ebꞌ cu mam icham yin eyilal ey jaach. Masanil wan caw ochebꞌil ku jon, pilan jix etextoj.
12 Jaach Jehová jin Diosal, jaꞌ yet cha wilon masanil wan tuꞌ ¿Tumi cꞌam wal niꞌoj tzet oj ja wal yin? ¿Tumi oj ecꞌbꞌantoj ja waon oc syaꞌilal kibꞌan jon?