2 Jain tiꞌ, yin tobꞌalkꞌinal bꞌatxan cꞌaltoj jin kꞌabꞌ yu wawten ebꞌ conobꞌ tol yel xacꞌal pit chi yute sbꞌa ey jin, ebꞌ tol lalan stoo can yin jun bꞌeybꞌale yel xacꞌal pena, asanxane tzet chi yoche oc ebꞌ, jaꞌ chi sbꞌeybꞌalne ebꞌ.

3 Tꞌanan jin wal oc yin wan ánima tiꞌ, catuꞌ chi yunen spenail ebꞌ jin sattaj, chi yakꞌon xaambꞌal ebꞌ tet wan comon dios xol-laj teꞌ awbꞌeal teꞌ, catuꞌ chi yakꞌon tzꞌaꞌ incienso ebꞌ yibꞌan jun yet xaambꞌal eyoc ladrillo yin.

4 Chi ey chotan ebꞌ bꞌey mujan ebꞌ camom. Chi ecꞌ akꞌbꞌal yu ebꞌ bꞌey ewantaj. Chi ẍiꞌon ẍiꞌbꞌeal txitam ebꞌ, catuꞌ chi yakꞌon no sneet ebꞌ cꞌal secꞌ ebꞌ yu yal chiꞌbꞌe tol yaabꞌetaj jatacꞌalaꞌ yalon ley.

5 Catuꞌ chi yalon ebꞌ jaxca tiꞌ: Watxꞌ je ye tituꞌ, cꞌam ojabꞌ chex oc mitxꞌan kin jon, yutol jaon tiꞌ, caw ey smey je yoc mitxꞌan kin, ẍi ebꞌ. Jaꞌ wan ánima tuꞌ, laan ebꞌ jaxca junoj kꞌakꞌ cꞌam chi tani, catuꞌ chi too smucꞌal yul cu txaam.

6 Jaꞌ masanil wan spenail ebꞌ tuꞌ, tzꞌibꞌebꞌil yeoc jin sattaj, man tucꞌal oj, oj wiloc jaxca tuꞌ. Oj jin pajtze tet ebꞌ jaxca wal smooalil.

7 Jaꞌ yu spenail ebꞌ cꞌal yu spenail pax yichmam ebꞌ, caw jix xꞌemtej sjowal jin cꞌul ebꞌ, tol jix yakꞌ tzꞌaꞌ xaambꞌal ebꞌ sjolomlaj wonan, catuꞌ jix oc spenail ebꞌ ey jin bꞌey txꞌotxꞌ tzalquiltaj txꞌotxꞌ. Bꞌabꞌel oj jin naꞌoc yin ebꞌ, catuꞌ oj jin pajtzen tet ebꞌ jaxca wal smooalil, ẍi Jehová.

9 Catuꞌ oj wakꞌon cꞌal can jaywanojxa ebꞌ yicꞌaal Jacob, yet watxꞌ ey cꞌal ánima caan bꞌey txꞌotxꞌ wonanlaj yul yet Judá. Jaꞌ ebꞌ sicꞌbꞌil el wu, oj wakꞌ caey ecꞌ ebꞌ bꞌey sat txꞌotxꞌ txꞌotxꞌ jix wakꞌ tet ebꞌ, cꞌal scaey ecꞌ ebꞌ jin chejabꞌ tituꞌ.

10 Oj wakꞌ noel bꞌey spananil yet Sarón yu smeꞌ ebꞌ, cꞌal bꞌey sjobꞌeal yet Acor, oj low noꞌ wacax, jaꞌton wan sjobꞌbꞌeal noꞌ ebꞌ jin conobꞌ chi oc yin eyilal ey jin.

11 Jal pax jaex tol chin je yintajne can el tiꞌ xin, man jaxca oj tuꞌ oj jex wute, mac jex tol che poꞌocan el je bꞌa wintaj, catuꞌ chin too qꞌueycꞌulal je yu, jaꞌton jun tzalan bꞌey chi oc eyilal ey jin, jaxa cꞌal tet wan comon dios che yakꞌ tzet chi loꞌlei cꞌal vino yin xaambꞌalil tet wan comon dios, jaꞌton Gad cꞌal Meni, jaꞌton wan chi naꞌon el tzet chi jul je yibꞌan.

12 Jain wotaj tzet tꞌinan oj jul je yibꞌan, jaꞌ tzet watxꞌ echbꞌanebꞌil je yu, jaxa pax chꞌen espada, oj jex akꞌon camoj. Yutol jix jex wawte, ma jex takꞌwoj ey jin, jix jin kꞌanabꞌ ey jex, cꞌam che chaꞌ je yabꞌ tzet chi walaꞌ. Jaꞌ tzet jix je yoche yul je yet, jaꞌ jix je bꞌeybꞌalne jin sattaj, asan cꞌal tzetyetal caw yaabꞌetaj bꞌey jix jex oc tzajanoj.

13 Yu jun tuꞌ, jaꞌ ebꞌ jin chejabꞌ ey sloꞌbꞌe ebꞌ, jal jex jaex tiꞌ oj je yabꞌ wail. Ey tzet oj yucꞌ ebꞌ, jal jex jaex tiꞌ oj taj je tiꞌ. Tol oj tzala ebꞌ, jal jex jaex tiꞌ qꞌuixwiltaj xacꞌal oj je yun canoj.

14 Oj bꞌitnoj ebꞌ yu tzalacꞌulal; jal jex jaex tiꞌ, tol oj jex okꞌ yu cuscꞌulal, cꞌal yu syaꞌtajilal.

15 Jaꞌ ebꞌ sicꞌbꞌil el wu, oj wakꞌ jun acꞌ bꞌie tet ebꞌ, yet chin yakꞌon bꞌina ebꞌ, jal jex jaex tiꞌ tol oj jex bꞌuchle yu ebꞌ ánima yet oj jex yakꞌon bꞌina ebꞌ, catuꞌ oj jex wakꞌon qꞌueyle eloj.

16 Yal cꞌal mactxequel bꞌey jun conobꞌ tuꞌ oj kꞌanon jin yaxilal yibꞌan, jain oj wakꞌ tzet oj skꞌanaꞌ, yutol chi wun cꞌal tzet chi walaꞌ. Yal cꞌal mactxequel tol chi yakꞌ stiꞌ yin junoj tzetyetal, jain oj jin yakꞌ bꞌinaoj. Jaꞌ yet tuꞌ, jaꞌ jantaj syaꞌtajilal jix ecꞌ eloj, oj tojcan qꞌueycꞌulal yu ebꞌ, cꞌamxa bꞌey txequel yeoc yul jin sat.

17 Abꞌwej xin, tol oj jin waꞌne junxa acꞌ satcan, cꞌal junxa acꞌ yul yibꞌankꞌinal tiꞌ. Jantaj tzetyetal tol ecꞌnajxa eloj, oj tojcan qꞌueycꞌulal, tumi eyto mactxequel oj naꞌontej wan tuꞌ.

18 Akꞌwej cꞌal tzala je cꞌul yu jantaj tzetyetal oj jin waꞌne aoj, yutol oj wakꞌ tzalacꞌulal xol conobꞌ Jerusalén; jaꞌ ebꞌ ánima caan tituꞌ oj tzalabꞌoj scꞌul ebꞌ wu.

19 Jain caw oj jin tzala yin Jerusalén tuꞌ, caw watxꞌ xacꞌal oj wabꞌ yu ebꞌ jin conobꞌ. Cꞌamxa bꞌey oj abꞌle yokꞌ ebꞌ ánima yu syaꞌilal tituꞌ.

20 Jaꞌ tituꞌ, cꞌam ebꞌ unin oj cam yin jayebꞌ chꞌan cꞌual oj ecꞌoj, tam wal oj cam ebꞌ icham ánima tol man oj tzꞌajna yabꞌilal. Ta ey mac oj cam yin cien abꞌil skꞌinal, unin ánima to chi yal tuꞌ. Jaꞌ mactxequel oj cam yin man oj aapnoj skꞌinal yin cien abꞌil, jaꞌ yu syaꞌiloj spenail chi yunne yuxan oj pet camoj.

21 Oj swaꞌne a sna ebꞌ jin conobꞌ, catuꞌ oj caey ecꞌ ebꞌ yul. Oj yaw uva ebꞌ, catuꞌ jaꞌcaw ebꞌ oj loꞌon sat an.

22 Man naꞌbꞌacꞌal oj swaꞌne a sna ebꞌ, catuꞌ txꞌojxa pax mac oj caey ecꞌ yul. Man naꞌbꞌacꞌal oj yaw uva ebꞌ, catuꞌ txꞌojxa pax mac chi loꞌon eytoj sat. Jaꞌ ebꞌ jin conobꞌ tuꞌ, oj wakꞌ naatbꞌoj skꞌinal ebꞌ, jaxca wal junoj teꞌ miman teꞌ. Jaꞌ ebꞌ sicꞌbꞌil el wu, oj yakꞌ tzalabꞌoj scꞌul ebꞌ smajon yelol sat yawo tuꞌ.

23 Jaꞌ yet tuꞌ, man naꞌbꞌacꞌal oj mulna ebꞌ jin conobꞌ, man oj cam yuninal ebꞌ yin tol cꞌamto chi aapnoj scꞌual scami. Yutol wakꞌnaj jin yaxilal yibꞌan smam icham ebꞌ, quey pax tuꞌ oj wute yicꞌaal ebꞌ tiꞌ.

24 Jaꞌ yet cꞌamto chin yawte ebꞌ, lalanxa jin takꞌwi tet ebꞌ, jaꞌ yet cꞌam tocꞌal chi lawi skꞌanabꞌ ebꞌ, tuxa jix wabꞌ tzet chi yal ebꞌ.

25 Jaꞌ noꞌ ooj yetoj noꞌ meꞌ, junne xacꞌal oj low noꞌ; jacꞌalaꞌ noꞌ bꞌalam, jaꞌ an cꞌultaj oj sloꞌ noꞌ jaxca noꞌ wacax. Yetoj cꞌal pax noꞌ labꞌa, jaꞌ pojoj oj sloꞌ noꞌ. Jain caw Jehová jin chi walaꞌ, tol cꞌam tzetyetal oj yetnetoj ebꞌ ánima cꞌal wan noꞌ noꞌ tuꞌ bꞌey jun wonan bꞌey chi oc eyilal ey jin, ẍi Dios.