2 Jain caw Jehová jin chi walaꞌ: Tol jain jix jin waꞌne masanil wan tzetyetal tuꞌ, queytuꞌ jix yun yeecꞌ masanil.

Jain tiꞌ chi okꞌ jin cꞌul yin ebꞌ ánima yeynajil chi yute sbꞌa, cꞌal ebꞌ chi cus scꞌul yu spenail, ebꞌ tol miman yeloc apnoj jin kꞌane yul sat.

3 Ey mactxequel tol yel xacꞌal yaabꞌetaj tzet chi sbꞌeybꞌalne, caw chi tzala scꞌul yet chi oc yin eyilal tet comon dios. Caxcꞌal chi smakꞌ cam junoj noꞌ wacax ebꞌ yet chi yakꞌon xaambꞌal ebꞌ ey jin, laan wal yul jin sat jaxca tol jaꞌ junoj ánima chi yakꞌ ebꞌ yin xaambꞌal. Ta chi smakꞌ cam junoj meꞌ yin xaambꞌal, laan wal jaxca tol jaꞌ junoj noꞌ txꞌiꞌ chi smakꞌ cam ebꞌ. Ta chi yakꞌ satlaj yawo ebꞌ yin ofrendail ey jin an, laan wal jaxca tol jaꞌ ẍiqꞌuil txitam chi yakꞌ ebꞌ. Ta chi yakꞌ tzꞌaꞌ incienso ebꞌ, jaxca wal tol jaꞌ tet wan comon dios lalan yalon watxꞌ kꞌane ebꞌ.

4 Yu jun tuꞌ, tuxa jix jin naꞌ tzet syaꞌilal oj waoc yibꞌan ebꞌ. Jaꞌ tzetyetal tol cꞌuun xiw ebꞌ tet, jaꞌ oj wakꞌ tet ebꞌ, yutol jix wawte ebꞌ an, ma cꞌal takꞌwoj ebꞌ ey jin. Jix jin kꞌanabꞌ tet ebꞌ, ma ẍaꞌ yabꞌ ebꞌ tzet jix walaꞌ; jaꞌ tzet jix yun ebꞌ, tol jix yun spenail ebꞌ jin sattaj, jix oc tzajan ebꞌ yintaj wan tzetyetal tol caw yaabꞌetaj yul jin sat, ẍi Jehová.

6 Jaꞌ wal jun chi bꞌilwi stit bꞌey conobꞌ tuꞌ, tuxa cꞌal chi nilili sbꞌilwi stit bꞌey templo, jaꞌ jun tuꞌ, jaꞌ Jehová chi bꞌilwi stita, yu jul yakꞌon spajtzebꞌal tet junjun mactxequel, jatacꞌalaꞌ smoo ẍaꞌoni.

7 Chi yalon pax Jehová jaxca tiꞌ: Jaꞌ conobꞌ Sión, laan wal jaxca junoj ix ix tol yin junne txolan jix yun yali yuneꞌ. Yet cꞌam tocꞌal syaꞌil chi yabꞌe, jix ali yuneꞌ tuꞌ.

8 ¿Mactxequel jix abꞌeni, ma yilon junoj laan jaxca jun tuꞌ? ¿Tumi chi skeꞌ yali a junoj nación yin junne cꞌual? Jaꞌ conobꞌ Sión tuꞌ, txenne oj yun yabꞌen syaꞌil, catuꞌ oj oc can yin miman conobꞌal.

9 Jain Jehová jin chi walaꞌ. ¿Tumi oj skeꞌ jin tenon oc tucan jun tuꞌ, yutol chi cꞌal wakꞌ eloc tzet chi walaꞌ, jaxca chi yun sjul scꞌual yali junoj unin?

10 Jaꞌ mac ey scamcꞌulal yin conobꞌ Jerusalén, tzala ojabꞌi, jaꞌ mac jex tol jix jex okꞌ yu jun conobꞌ tuꞌ, ey ojabꞌ je tzalacꞌulal je masanil tinaniꞌ.

11 Yutol laan jaxca junoj ix txutxe chi smonte yuneꞌ, oj yakꞌ smimanil je cꞌul, masantaꞌcꞌal oj jul je miman tzalacꞌulal yu syaaxilal oj yakꞌ ey jex.

12 Yutol jain Jehová jin chi walaꞌ: Oj wakꞌ tzalacꞌulal snan xol ebꞌ ánima bꞌey jun conobꞌ tuꞌ. Jaꞌ sbꞌeomal wan mimej conobꞌlaj oj wakꞌ jul ey jex, jaxca wal junoj jaꞌ jaꞌ tol cꞌam bꞌakꞌin chi tantoj. Yu jun tuꞌ, yuxan jaex tiꞌ laan jex jaxca junoj unin chi akꞌle txutxwoj yu xutx, tol chelbꞌil ocoj, yutol ochebꞌil sicꞌlebꞌil.

13 Jaxca wal junoj ix txutxe tol chi smimancꞌulne yuneꞌ, queytuꞌ oj jex wute jin mimancꞌulneni. Queytuꞌ oj yun je yiꞌon je mimancꞌulal bꞌey Jerusalén, ẍi Jehová.

14 Jaꞌ yet oj je yilon wan tuꞌ, caw oj tzala a je cꞌul sicꞌlebꞌil. Oj akꞌle yip je mimanil junelxa, jaxca chi yun syaaxbꞌi a an cꞌultaj cꞌal an ita. Yutol oj xꞌox yipalil Jehová yin ebꞌ ẍejabꞌ, catuꞌ oj yaontej sjowal scꞌul yibꞌan ebꞌ cꞌam chi ocheni.

15 Yutol jaꞌ Jehová eyoc xol jun miman kꞌakꞌ yet oj juloj, jaꞌ scarruaje Naj laan jaxca junoj cajxuchum kaꞌeꞌ. Oj yiꞌel sjowal scꞌul yin ebꞌ chi jowi oc yin, laan jaxca ẍaw xaj junoj miman kꞌakꞌ.

16 Jaꞌ yetoj kꞌakꞌ, cꞌal yetoj yespada Jehová oj naꞌle oc yin masanil ánima bꞌey yul yibꞌankꞌinal tiꞌ, caw ecꞌal mactxequel oj camoj.

17 Jaꞌcaw Jehová chi alon jaxca tiꞌ: Oj jin qꞌueyel masanil mactxequel chi oc yin eyilal tet comon dios bꞌey xol-laj teꞌ awbꞌeal teꞌ. Ebꞌ comon xacꞌal chi oc tzajan yunen jaxca chi yun junoj mactxequel chi ijbꞌan ebꞌ tuꞌ, yin ẍiꞌon ẍiꞌbꞌeal txitam cꞌal ẍiꞌon txꞌow ebꞌ, cꞌal wanojxa noꞌ noꞌ tol yaabꞌetaj jaxca yalon ley, junne oj yun jin qꞌueyon el ebꞌ.

18 Yutol wotajxa snaꞌbꞌal ebꞌ, cꞌal sbꞌeybꞌal junjun ebꞌ, yuxan oj jin jul yu jin yambꞌan oc masanil conobꞌ, cꞌal junjun tiꞌeal yu jin naꞌon oc yin ebꞌ, oj jul ebꞌ jin sattaj, catuꞌ oj yilon wipalil ebꞌ.

19 Ey jun txꞌoxbꞌanile oj jin txꞌox yil ebꞌ, ey jaywanoj ebꞌ oj wakꞌ ecꞌ eltoj xol jowal, catuꞌ oj jin chejontoj ebꞌ bꞌey wanxa conobꞌ. Jaꞌton bꞌey Tarsis, bꞌey Libia cꞌal bꞌey Lidia, jaꞌton wan conobꞌ tuꞌ caw yotaj ebꞌ ánima chi julwai. Jal ebꞌ bꞌey Tubal, cꞌal ebꞌ bꞌey Grecia yetoj wanxa conobꞌ ey stiꞌlaj jaꞌ mar, cꞌam bꞌey chi abꞌle jin bꞌina yu ebꞌ, tam wal ey bꞌey chi yil niꞌoj wipalil ebꞌ. Jaꞌ ebꞌ chejbꞌiltoj wu tuꞌ an, jaꞌton ebꞌ oj alon el skꞌaneal wipalil bꞌey xol-laj mimej conobꞌ tuꞌ.

20 Jain wal caw Jehová jin chi walaꞌ, tol oj tit masanil ebꞌ je yet conobꞌ bꞌey masanil mimej conobꞌlaj yu ebꞌ. Oj tit ebꞌ yibꞌan che, ey ebꞌ oj tit yul carruaje, cꞌal yibꞌan bꞌatxbꞌal teꞌ, ey ebꞌ yibꞌan noꞌ mula, cꞌal yibꞌan camello. Jaxca wal junoj ofrenda oj yun sjul ebꞌ bꞌey jun wonan bꞌey chi oc eyilal ey jin bꞌey Jerusalén. Jaxca chi yun yiꞌontej yofrenda ebꞌ jin conobꞌ yul junoj neet caw wal saj yili bꞌey jin templo, queytuꞌ oj yun yiꞌletej ebꞌ.

21 Jain wal caw Jehová jin chi walaꞌ, tol jaꞌ xol ebꞌ tuꞌ, jatuꞌ oj jin sicꞌ el ebꞌ oj oc yin yakꞌomaloj xaambꞌal, cꞌal yin Levitail, ẍi Dios.

22 Chi yalon cꞌal pax Jehová jaxca tiꞌ: Jaxca wal yili jun acꞌ satcan, cꞌal jun acꞌ yul yibꞌankꞌinal oj jin waꞌne aoj, tol oj eecꞌal ecꞌoj, queytuꞌ oj yun je bꞌina jaex tiꞌ yetoj ebꞌ je yicꞌaal.

23 Jain wal caw Jehová jin chi walaꞌ, tol junjun cꞌal el yet chi ali xꞌaaw, junjun cꞌal semana yet scꞌual xewilal, oj jul masanil ebꞌ ánima jin sattaj, yu jul yiꞌon ey sbꞌa ebꞌ ey jin.

24 Jaꞌ yet oj eltoj ebꞌ jin conobꞌ tuꞌ, oj yilon oc smimanil ebꞌ camnaj ebꞌ, jaꞌton ebꞌ jix jowi oc win yu spenail jix el yuneni. Jaꞌ noꞌ yaxjaꞌ us oj chiꞌontoj ebꞌ, cꞌam bꞌakꞌin chi cam wan noꞌ noꞌ tuꞌ, quey pax tuꞌ jun kꞌakꞌ oj nuson tzꞌaꞌ ebꞌ, cꞌam bꞌakꞌin chi tani. Caw yaabꞌetaj oj yun yili ebꞌ sattaj masanil ánima, ẍi Jehová.