—Tuxa jix yal Jehová tol cha wal can tzet oj yun can masanil tzetyetal ey, ey jaach, yutol oj jaach cꞌamxa cꞌal, manxa oj waꞌxoj ja cꞌul, ẍi tet naj.

2 Tuxa cꞌal jix meltzo octoj jacan naj Ezequías yich na, catuꞌ jix txali tet Jehová, jix yalon jaxca tiꞌ: 3 Jaach Jehová, chi wal ey jaach an, tol chin ja naꞌtej tzet jix yun jaach wakꞌon servil, cꞌal jin jijen tzet jix ja walaꞌ, jix jin waꞌne tzetyetal tol chi ẍaꞌ ja cꞌul, ẍi naj yin xa. Catuꞌ jix okꞌa naj sicꞌlebꞌil.

4 Jaxa jix yun xin, jaꞌ yet cꞌamto wal chi eltoj naj Isaías bꞌey snan eltoj stiꞌ spalacio naj rey tuꞌ, jix yalon pax Jehová tet naj jaxca tiꞌ: 5 Tol chi meltzotoj naj yal tet naj Ezequías, naj syaawil conobꞌ yet chi yalon tet jaxca tiꞌ: Jaꞌ Jehová cu Diosal, sDiosal cꞌal pax ja mam icham David, jaꞌ chi alon jaxca tiꞌ: Tuxa jix wabꞌ ja txa cꞌal ja wokꞌilal. Oj wakꞌ waꞌxoj ja cꞌul junelxa, jaꞌ yet caabꞌe tinaniꞌ catuꞌ oj jaach toj bꞌey jin templo. 6 Yutol oj to wakꞌ junojxa 15 abꞌil ja kꞌinal. Oj jaach jin colel yul skꞌabꞌ naj sreyal Asiria yetoj conobꞌ Jerusalén tiꞌ. Jain oj jin teyne jun conobꞌ tiꞌ, yutol ey jin camcꞌulal yin, cꞌal bꞌey wakꞌnaj can jin tiꞌ tet naj jin chejabꞌ David, ẍi Jehová, ẍi naj ẍejabꞌ Dios tuꞌ.

7 Jix yalon naj Isaías tol chi chil-le poꞌo jayebꞌoj sat teꞌ higo, yet chi ale oc yin sat bꞌey eyoc jun yaꞌbꞌil yin naj Ezequías tuꞌ, queytuꞌ jix yun swaꞌxi jun syaꞌilal eyoc yin naj tuꞌ. 8 Jaꞌ yet cꞌamto chi waꞌxi el scꞌul naj rey Ezequías tuꞌ, jix skꞌanle naj tet Isaías jaxca tiꞌ:

—¿Tzet junoj yechel oj wilaꞌ yet oj naꞌcha el wu, ta tol jaꞌ Jehová oj akꞌon waꞌxoj jin cꞌul, yetoj pax oj ta chi xa skeꞌ jin too bꞌey stemplo Jehová yet caabꞌe tinaniꞌ? ẍi naj.

9 Jix takꞌwi naj Isaías jaxca tiꞌ:

—Jaꞌ jun yechel oj xꞌox Jehová ey jaach yet oj naꞌcha el ja wu tol oj eloc tzet chi yalaꞌ. Jaach cha walaꞌ ta chi bꞌabꞌi junoj laonebꞌ tujan jun enele chi txꞌoxon hora yin sat chꞌen reloj yu yajan cꞌu, ma chi meltzo laonebꞌoj tujan yintaj, ẍi naj Isaías.

10 Jix takꞌwi Ezequías jaxca tiꞌ:

—Jaꞌ yet chi too enele sattaj, man yaꞌtaj oj, jaꞌ smeltzo yintaj, jaꞌ jun tuꞌ yaꞌtaj, ẍi naj.

11 Yu tuꞌ xin, jix txali naj Isaías tet Jehová, jaxa Jehová jix akꞌon meltzo yintaj laonebꞌ tujan jun enele chi ecꞌ yin sat sreloj yu yajan cꞌu yet naj Ahaz.

12 Jaꞌ yet jun tiempoal tuꞌ, jaꞌ naj rey Merodac-baladán, scꞌaal Baladán, sreyal Babilonia, jaꞌ jix abꞌen yal-lei tol jix yaꞌbꞌi ey naj Ezequías, yuxan jix ẍejtej wan yakꞌomal servil jul yakꞌon an carta cꞌal junoj saꞌbꞌeal tet naj. 13 Caw jix chaꞌle sjul wan chejabꞌwom tuꞌ yu naj Ezequías, catuꞌ jix xꞌoxon masanil tzet cꞌuan a yu naj tet ebꞌ, jaxca chꞌen plata cꞌal chꞌen oro, yetoj perfume cꞌal aceite olivo caw wal watxꞌ, cꞌal bꞌey yaman ecꞌ chꞌen julbꞌal, yetoj cꞌal jantaj tzetyetal yaman ecꞌ yu naj, cꞌamxa junojxa tzetyetal ey bꞌey spalacio cꞌal bꞌey chi lawi apni oc yakꞌon yaawilal ma xꞌox tet ebꞌ. 14 Jix lawi tuꞌ xin, jix too naj Isaías, naj ẍejabꞌ Dios bꞌey naj rey Ezequías, jix skꞌanlen tet jaxca tiꞌ:

—¿Bꞌeytuꞌ jix caꞌ stitoc wan winaj tuꞌ? ¿tzet ẍi ebꞌ ey jaach? ẍi naj.

Jix takꞌwi naj rey Ezequías tet naj jaxca tiꞌ:

—Jaꞌ bꞌey jun nación caw wal naat jix tit ebꞌ, jaꞌton bꞌey Babilonia.

15 Jix skꞌanlen pax naj Isaías jaxca tiꞌ:

—¿Tzetyetal jix yil ebꞌ yul ja palacio tuꞌ?

Jix takꞌwi naj Ezequías jaxca tiꞌ:

—Masanil tzetyetal jix yil ebꞌ, cꞌamxa niꞌoj tzetyetal yaman ecꞌ wu ma yil ebꞌ, yutol jix jin txꞌox masanil tet ebꞌ, ẍi naj.

16 Catuꞌ jix yalon naj Isaías tet naj rey Ezequías jaxca tiꞌ:

—Abꞌ tzet chi yal skꞌane Jehová tiꞌ xin: 17 Oj aapnoj scꞌual tol jaꞌ masanil tzetyetal ey bꞌey ja palacio yetoj cꞌal masanil tzetyetal jix syambꞌa can ebꞌ ja wichmam, oj iꞌletoj masanil bꞌey Babilonia, cꞌamxa niꞌoj tzetyetal oj canoj. 18 Tol tax oj iꞌletoj ebꞌ ja wicꞌaal bꞌey Babilonia tuꞌ, oj iꞌle eltej sbꞌakꞌ ebꞌ yet watxꞌ cꞌam yuninal ebꞌ oj aloj, oj oc ebꞌ yin yakꞌomaloj servil naj sreyal Babilonia tuꞌ, ẍi Jehová, ẍi naj Isaías tuꞌ.

19 Jaxa naj rey Ezequías jix alon tet naj Isaías jaxca tiꞌ:

—Jaꞌ jun kꞌane jix ja wal ey jin yu Jehová tiꞌ caw wal watxꞌ, ẍi naj. Jix yal naj jaxca tuꞌ yutol jix snaꞌ tol ey watxꞌcꞌulal yet ey cꞌal oc yin yopiso tuꞌ.

20 Jaꞌ wanojxa skꞌaneal naj rey Ezequías, cꞌal tzet miman yeloc apnoj jix yun naj, jaxca tzet jix yun swaꞌnen jun naabꞌ jaꞌ, cꞌal tzet jix yun yiꞌontej jaꞌ jaꞌ bꞌey yul conobꞌ tuꞌ, jatuꞌ tzꞌibꞌebꞌilcan bꞌey yul an juun bꞌey ey can ey skꞌaneal ebꞌ sreyal Judá. 21 Jaꞌ yet jix cam naj Ezequías tuꞌ, jaꞌ jun scꞌaal chi yij Manasés jix oc can sqꞌuexeloj yin reyal.