6 Yetoj cꞌal pax oj, jix yakꞌ tzꞌaꞌ scꞌaal yin xaambꞌaloj tet comon dios. Jix yaon oc sbꞌa yetoj ebꞌ bꞌalwom, ebꞌ atxum, ebꞌ naꞌom el kꞌane, yetoj cꞌal ebꞌ chi awten spixan camom. Junelne tol caw pena masanil tzet jix el yunen sattaj Jehová, jix xꞌem xacꞌaltej sjowal scꞌul Jehová yibꞌan. 7 Jix yaon pax octoj jun teꞌ yechel comon dios chi yij Aserá bꞌey yul stemplo Jehová, jaꞌton yin jun templo tuꞌ jix yal Jehová tet naj rey David cꞌal tet Salomón jaꞌton scꞌaal: Jaꞌ jun templo bꞌey Jerusalén tiꞌ tol jain jix jin sicꞌ can el xol masanil ebꞌ yicꞌaal Israel, jaꞌ tituꞌ oj jin caey ecꞌoj. 8 Ta tol oj sjije jin chejbꞌanil ebꞌ je yet conobꞌ tiꞌ, cꞌal jin ley, yetoj cꞌal cuybꞌanile jix wakꞌ yal naj jin chejabꞌ Moisés tet ebꞌ, manxa oj wiꞌel ebꞌ bꞌey sat txꞌotxꞌ txꞌotxꞌ jix wakꞌ tet yichmam ebꞌ, ẍi Jehová.

9 Caw ma cꞌal sjije ebꞌ masanil wan tuꞌ. Yutol jaꞌcaw naj rey Manasés jix ijbꞌan ebꞌ yin spenail, yel xacꞌal pena sbꞌeybꞌal ebꞌ yintaj wanojxa nación jix qꞌueyle el sattaj ebꞌ yu Jehová. 10 Yu jun tuꞌ, yuxan jix kꞌanabꞌ Jehová yin skꞌanbꞌalnele ebꞌ ẍejabꞌ yet jix yalon can el ẍejbꞌanil Dios ebꞌ: 11 Jaꞌ naj Manasés tiꞌ, yel xacꞌal ecꞌbꞌan spenail jix yun yintaj ebꞌ Amorreo, jaꞌton ebꞌ jix ecꞌle yet tax yalantoj; jix ijbꞌaletoj ebꞌ Judá yin spenail yin yoc ebꞌ eyilal tet wan echele. 12 Yu tuꞌ xin, jain wal caw Jehová je Diosal jin jaex Israel jex tiꞌ, chi walaꞌ, tol oj watoj syaꞌilal yibꞌan Jerusalén cꞌal yibꞌan Judá tiꞌ, tol oj tac xacꞌal can el scꞌul ebꞌ oj abꞌen ocoj. 13 Tol oj waoc syaꞌilal yibꞌan Jerusalén tiꞌ, jaxca jix wute conobꞌ Samaria cꞌal ebꞌ yicꞌaal naj Ahab. Tol oj wiꞌel masanil ebꞌ ánima caan bꞌey jun conobꞌ tiꞌ, laan xacꞌal oj yun can ebꞌ jaxca junoj chꞌen plato yet chi lawi xꞌale eloj, catuꞌ chi ey can noan tajoj. 14 Jal jaywanojxa ebꞌ jin conobꞌ tiꞌ xin, oj jin bꞌejcan ebꞌ, jaxa waon can oc ebꞌ yul skꞌabꞌ scajat ebꞌ, yet chi iꞌle can ecꞌ masanil stzetyetal ebꞌ, 15 yutol junelne pena xacꞌal chi yun ebꞌ jin sattaj. Jix xꞌemcꞌaltej sjowal jin cꞌul ebꞌ yet tax cꞌal jix wiꞌon eltej yichmam ebꞌ bꞌey txꞌotxꞌ Egipto, masantaꞌcꞌal tinaniꞌ, ẍi Jehová.

16 Ilaꞌ tol caw jix oc masanil ebꞌ a Judá yin amulal yu jantaj spenail jix yun naj Manasés sattaj Jehová. Caw ecꞌal ebꞌ ánima cꞌam spenail jix smakꞌ cam ebꞌ, jix malcantoj ẍiqꞌuil ebꞌ bꞌey yul yet Jerusalén yu ebꞌ. 17 Jaꞌ wanojxa skꞌaneal naj Manasés cꞌal tzet jix yun naj, yetoj cꞌal jantaj spenail jix yaocoj, jatuꞌ tzꞌibꞌebꞌilcan yul an juun bꞌey ey can ey skꞌaneal ebꞌ sreyal Judá. 18 Jaꞌ yet jix cam naj, jatuꞌ jix mujle bꞌey xol-laj awo bꞌey stiꞌ sna, jaꞌton bꞌey xol-laj yawo naj Uzá. Jix lawi tuꞌ xin, jaxa jun scꞌaal chi yij Amón jix oc can sqꞌuexeloj yin reyal.

19 Jaꞌ naj Amón tuꞌ ey 22 abꞌil skꞌinal naj yet jix ẍaꞌon el yich yoc yin reyal bꞌey Judá. Caabꞌ abꞌil jix yakꞌ reyal bꞌey Jerusalén. Jaꞌ xutx naj chi yij Mesulémet, scutzꞌin Harús a conobꞌ Jotbá. 20 Caw pena cꞌal sbꞌeybꞌal naj Amón tuꞌ sattaj Jehová jaxca sbꞌeybꞌal naj Manasés, jaꞌton smam. 21 Jaꞌ sbꞌeybꞌal smam tuꞌ jix sbꞌeybꞌalne, jix oc yin eyilal tet wan echele jix swaꞌne a smam tuꞌ. 22 Queytuꞌ jix yun yintajne can el Jehová Dios, jaꞌton sDiosal ebꞌ yichmam, ma cꞌal sjije ẍejbꞌanil Dios.

23 Jaꞌ ebꞌ eyoc yin opiso yetoj naj Amón tuꞌ, jaꞌ ebꞌ jix meltzo oc yin, jix makꞌle cam naj yu ebꞌ bꞌey yul spalacio. 24 Jaxa masanil ebꞌ conobꞌ jix makꞌon cam wan ey yopiso tol jix makꞌon cam naj Amón tuꞌ, jaxa jun scꞌaal chi yij Josías jix yaoc ebꞌ yin reyal sqꞌuexeloj.

25 Jaꞌ wanojxa skꞌaneal naj Amón cꞌal tzet jix yun naj, jatuꞌ tzꞌibꞌebꞌilcan yul an juun bꞌey ey can ey skꞌaneal ebꞌ sreyal Judá. 26 Jaꞌ tituꞌ jix mujle bꞌey xol-laj yawo naj Uzá. Queyton tuꞌ jix yun yoc can jun scꞌaal chi yij Josías sqꞌuexeloj yin reyal.