3 Waxajebꞌxa abꞌil yoc naj Josías yin reyal, catuꞌ jix yaontoj jun sat stzꞌibꞌlom chi yij Safán, jaꞌton jun scꞌaal naj Asalías yitxiquin Mesulam, jix yalon naj rey tet jaxca tiꞌ:

4 —Asiꞌ il naj Hilquías, naj sat yakꞌomal xaambꞌal yeocoj, cha walon tet naj tol chi syambꞌa chꞌen tumin chi apni oc yul stemplo Jehová, chꞌen chi ẍaꞌ ebꞌ chi teynen spuertail templo yet chi octoj ebꞌ ánima, 5 catuꞌ chi yakꞌon naj tet ebꞌ syaawil yeoc yilon yet chi caꞌ waꞌnele a templo tuꞌ, yet watxꞌ chi toolanele ebꞌ chi mulna oc yin, 6 jaxca ebꞌ josom teꞌ, ebꞌ albañil, cꞌal yu smanle teꞌ teꞌ, cꞌal chꞌen chꞌen tol josbꞌil, yet chi nipele templo tuꞌ. 7 Cha walon cꞌal pax tet naj, tol cꞌam cꞌal chi kꞌanle yuunal chꞌen tumin tuꞌ, yutol caw wal watxꞌ snaꞌbꞌal ebꞌ chi cꞌubꞌan jun tumin tuꞌ, ẍi naj rey Josías.

8 Jix lawi tuꞌ, jix yalon naj Hilquías, tet naj Safán tol jix ilcha an slibroal ley bꞌey yul stemplo Jehová, jix akꞌle an tet naj Safán tuꞌ, catuꞌ jix yawten naj tzet chi yal an. 9 Jix lawi tuꞌ xin, jix too naj Safán yalon jun tiꞌ tet naj rey jaxca tiꞌ:

—Tuxa jix yamcha ey chꞌen tumin yu ebꞌ ja wakꞌomal servil bꞌey yul templo, catuꞌ jix yakꞌon chꞌen ebꞌ tet ebꞌ syaawil yeoc yilon swaꞌxi stemplo Jehová tuꞌ, ẍi tet naj.

10 Jix yalon cꞌal pax tet Safán tol jaꞌ naj yakꞌomal xaambꞌal chi yij Hilquías jix yakꞌ jun libro tet, yuxan jix yawte a an bꞌey sattaj naj rey tuꞌ. 11 Jaꞌ yet jix yabꞌen oc naj rey tzet chi yal yul an yuunal ley tuꞌ, jix stzilontoj spichil naj, 12 catuꞌ jix yalon naj Hilquías tol chi awtele naj Ahicam scꞌaal Safán, Acbor scꞌaal Micaías, Safán naj chi tzꞌibꞌen junoj kꞌane, cꞌal naj Asaías yakꞌomal servil naj rey. Jix yalon naj tet ebꞌ jaxca tiꞌ:

13 —Asiꞌwej kꞌanle tet Jehová tzet oj wun jain tiꞌ, tzet oj yun ebꞌ conobꞌ yetoj cꞌal masanil Judá, tzet wal chi yal yeloc apnoj an yuunal ley jix ilcha tiꞌ. Ey mi sjowal scꞌul Jehová tuꞌ kin, yutol ma sjije ebꞌ cu mam icham tzet chi yal an, ẍi naj.

14 Yuxan jix too naj Hilquías yakꞌomal xaambꞌal, naj Ahicam, Acbor, Safán yetoj cꞌal naj Asaías, yet chi too yilon ebꞌ jun ix ẍejabꞌ Dios chi yij Huldá, ix yistil naj Salum, scꞌaal Ticvá, yitxiquin Harhás. Jaꞌ naj Salum tuꞌ yilomal bꞌey chi cꞌubꞌale an pichile bꞌey templo. Jaꞌ ix Huldá tuꞌ, jatuꞌ ey ix bꞌey yet scaabꞌ cantón yet Jerusalén. Jaꞌ yet jix kꞌanabꞌ ebꞌ tet ix, 15 jix takꞌwi ix tet ebꞌ jaxca tiꞌ:

—Jaꞌ spajtzebꞌal je kꞌane chi yakꞌ Jehová cu Diosal ey jon Israel jon tiꞌ, chi yal jaxca tiꞌ: Jain ton Jehová jin chi walaꞌ: Alwej tet mactxequel jix jex chejontej jul je kꞌanle ey jin tiꞌ, 16 tol jain oj watoj jun uchlebꞌail yibꞌan jun conobꞌ tiꞌ, cꞌal yibꞌan ebꞌ caan titiꞌ jaxca yalon an yuunal ley jix yawte naj sreyal Judá. 17 Yutol jix jin intajnele can el yu ebꞌ ánima, catuꞌ jix yakꞌon tzꞌaꞌ incienso ebꞌ cꞌal yoc ebꞌ yin eyilal tet comon dios, tol jix xꞌemtej sjowal jin cꞌul ebꞌ yu sdiosal ebꞌ jix swaꞌne tuꞌ. Yu cꞌal jun tuꞌ, yuxan jix tit sjowal jin cꞌul yin jun conobꞌ tiꞌ. Cꞌamxa chi tan sjowal jin cꞌul yin ebꞌ, ẍi Jehová. 18 Alwej tet naj sreyal Judá, naj jix jex chejontej je kꞌanle tet Jehová: Jaꞌ Jehová cu Diosal chi alon jaxca tiꞌ: Yutol jix ja wabꞌe tzet eey yul an juun tuꞌ, 19 catuꞌ jix ja waon oc yin ja cꞌul, yuxan jix ja wal ja bꞌa ey jin, cꞌal ja tzilontoj ja pichil, cꞌal ja wokꞌa jin sattaj, yu jix ja wabꞌ tzet jix walaꞌ tol oj qꞌueyle el conobꞌ tiꞌ cꞌal wintajnen can el ebꞌ caan yul jun conobꞌ tuꞌ, yuxan jix wabꞌ tzet jix ja walaꞌ, yuxan chi wal ey jaach an, 20 tol jix wakꞌ mimancꞌulal ja win, catuꞌ yin watxꞌcꞌulal oj yun ja mujlei. Manxa oj ja wil jun uchlebꞌail oj watoj yibꞌan jun conobꞌ tiꞌ, ẍi Jehová, ẍi ix Huldá tet ebꞌ. Catuꞌ jix meltzotej ebꞌ yakꞌomal servil naj rey yu jul yalon tzet jix bꞌet yabꞌ ebꞌ tuꞌ.