3 Jaꞌ yet waxajebꞌxa abꞌil yoc naj yin reyal, yet achꞌe winaj wal naj, jaꞌ yet tuꞌ jix yaoc sbꞌa yul skꞌabꞌ Dios, jaꞌton sDiosal smam icham chi yij David. Jaxa yet lacawebꞌxa abꞌil yoc naj yin reyal, catuꞌ jix ẍaꞌon el yich yiꞌon el pena bꞌeybꞌale bꞌey conobꞌ Judá, cꞌal bꞌey Jerusalén. Jix yuchon lawoj masanil wan bꞌey chi oc ebꞌ ánima yin eyilal tet comon dios bꞌey tzalquiltaj, cꞌal yechel comon dios chi yij Aserá, cꞌal wanxa echele tol josbꞌil, cꞌal wan echele waꞌnebꞌil yul smolteal. 4 Sattaj wal naj jix makꞌle can poꞌo masanil wan yechel comon dios chi yij Baal, jix ẍejon cꞌal pax makꞌle poꞌo yet xaambꞌal bꞌey chi akꞌle tzꞌaꞌ incienso bꞌey wan kꞌap na yet eyilal tuꞌ. Jix ẍejon cꞌal pax makꞌle poꞌo yechel comon dios chi yij Aserá, yetoj cꞌal masanil wanxa echele; pojoj xacꞌal jix yun cantoj masanil. Jix lawi tuꞌ, jix yaontoj spojojal naj yibꞌan smujbꞌanil wan ebꞌ jix yakꞌ xaambꞌal tet wan comon dios tuꞌ. 5 Jix snuson can tzꞌaꞌ sbꞌajil wan yakꞌomal servil wan comon dios bꞌey yibꞌan spoꞌoilal yet xaambꞌal tuꞌ, queytuꞌ jix yun sajbꞌanele can el conobꞌ Judá cꞌal Jerusalén. 6 Jacꞌalaꞌ quey cꞌal pax tuꞌ jix yute bꞌey yul conobꞌlaj yul yet Manasés, yul yet Efraín, cꞌal yul yet Simeón, masantaꞌcꞌal jix apni oc bꞌey yul yet Neftalí, cꞌal bꞌey wan conobꞌ makꞌbꞌil ey wejlabꞌoj smuroal yinlaj tuꞌ. 7 Jix yuchon can ey masanil wan yet xaambꞌal, cꞌal wan yechel Aserá, cꞌal wanxa yechel comon dios, pojoj xacꞌal jix yute cantoj, jix smakꞌon pax can poꞌo wan yet xaambꞌal bꞌey chi tzꞌaꞌ incienso bꞌey masanil yul yet Israel. Jix lawi tuꞌ xin, catuꞌ jix meltzotej naj bꞌey Jerusalén.

8 Jaꞌ yet 18 abꞌil xa yoc naj yin reyal, yet jix lawi sajbꞌane el wan conobꞌlaj cꞌal bꞌey templo, jix yalon naj tol chi nipele stemplo Jehová. Jaꞌ jun mulnail tuꞌ, jix oc can yibꞌan naj Safán, scꞌaal Asalías, cꞌal naj Amasías, yalcalil conobꞌ, cꞌal naj tzꞌibꞌlom chi yij Joah, jaꞌton scꞌaal Joacaz. 9 Jaꞌ ebꞌ tuꞌ jix bꞌet ilon naj sat yakꞌomal xaambꞌal chi yij Hilquías, jix bꞌet yakꞌ chꞌen tumin ebꞌ jix chaꞌle bꞌey stemplo Dios, jaꞌton chꞌen jix syambꞌa ebꞌ Levita eyoc yin steynemaloj spuertail templo eyoc xol ebꞌ a Manasés, cꞌal ebꞌ a Efraín, jaꞌton masanil ebꞌ ánima jix cancan yul yet Israel. Ey cꞌal pax chꞌen jix yambꞌale a xol ebꞌ a Judá, cꞌal xol ebꞌ a Benjamín, cꞌal xol masanil ebꞌ caan bꞌey Jerusalén. 10 Jix lawi tuꞌ, jix yakꞌon chꞌen tet ebꞌ eyoc yibꞌan swaꞌnen mulnail bꞌey stemplo Jehová, jaxa ebꞌ tuꞌ jix akꞌon stool ebꞌ chi mulna yu swaꞌxi templo. 11 Jix yakꞌon chꞌen tumin ebꞌ tet ebꞌ naj josom teꞌ, cꞌal tet ebꞌ ijbꞌawom yeoc yin mulnail tuꞌ, yet chi manle chꞌen chꞌen tol josbꞌil, yetoj cꞌal masanil teꞌ teꞌ chi oc smitxꞌbꞌaniloj, catuꞌ chi oc spatzabꞌil wan na tucꞌal jix yiloc ebꞌ sreyal Judá yetextoj.

12-13 Jaꞌ wan winaj tuꞌ, caw watxꞌ jix yute yilon smulnail ebꞌ. Jaꞌ ebꞌ Levita jix ijbꞌan mulnail tuꞌ, jaꞌton sbꞌi ebꞌ tiꞌ: Jáhat cꞌal Abdías, yicꞌaal Merarí ebꞌ, cꞌal Zacarías yetoj Mesulam, yicꞌaal Quehat ebꞌ. Jaꞌton ebꞌ tuꞌ yaaw yeocoj. Ey wanxa ebꞌ chi ijbꞌan bꞌit yetoj wan mitxꞌkꞌabꞌe chi tenlei, jaꞌ ebꞌ chi ilon ebꞌ chi bꞌelom ecꞌ ijatz, ey pax ebꞌ chi ilon ebꞌ mulnawom. Ey pax ebꞌ tzꞌibꞌlom, ey pax ebꞌ chi teynen spuertail stemplo Dios.

14 Jaꞌ yet jix yiꞌon eltej chꞌen tumin ebꞌ jix iꞌletoj bꞌey stemplo Jehová, jaꞌ tituꞌ jix ilcha an yuunal ley yu naj yakꞌomal xaambꞌal, chi yij Hilquías, jaꞌton tzet jix yal can Jehová tet naj Moisés. 15 Jix lawi tuꞌ, jix yalon tet Safán naj tzꞌibꞌlom yeocoj, tol jix ilcha oc an yuunal ley bꞌey stemplo Jehová yu naj. Jix yaontoj an tuꞌ naj tet naj Safán. 16 Jaxa naj Safán tuꞌ, jix iꞌontoj tet naj rey, jix yalon tet jaxca tiꞌ:

—Jaon ja wakꞌomal servil jon tiꞌ jaach rey, lalan cu waꞌnen masanil mulnail jix ale can oc kibꞌan jon. 17 Jix yamcha oc chꞌen tumin jix jul akꞌle bꞌey stemplo Jehová, catuꞌ jix akꞌle chꞌen tet ebꞌ chi ilontoj mulnail, yetoj cꞌal tet ebꞌ mulnawom, ẍi naj.

18 Jix yalon cꞌal pax naj Safán tet naj rey tol ey jun an juun jix akꞌle tet yu naj sat yakꞌomal xaambꞌal chi yij Hilquías, yuxan jix awtele an juun tuꞌ yu sattaj naj rey tuꞌ. 19 Jaꞌ yet jix yabꞌen naj rey tzetyetal chi yal an juun tuꞌ, jix stzilontoj spichil naj yu xꞌoxon el scuscꞌulal. 20 Jix lawi tuꞌ, jix yalon tet naj Hilquías, tet naj Ahicam, scꞌaal Safán, tet naj Abdón scꞌaal Micaías, tet Safán naj tzꞌibꞌlom cꞌal tet naj Asaías eyoc yopiso scolwa yetoj naj rey, jix yalon jaxca tiꞌ:

21 —Asiꞌwej kꞌanle tet Jehová wu jain tiꞌ, cꞌal yu masanil ebꞌ ánima jix to can bꞌey Israel, cꞌal bꞌey Judá yu tzet chi yun kelocoj, jatacꞌalaꞌ tzet chi yal an juun jix ilcha tiꞌ. Yutol caw eytej sjowal scꞌul Jehová kibꞌan tinaniꞌ. Ilaꞌ tol ma sjije ebꞌ cu mam icham tzet jix yal Jehová, ma cꞌal sbꞌeybꞌalne ebꞌ tzetyetal chi yal an juun tuꞌ.

22 Jaꞌ naj Hilquías yetoj cꞌal wanxa ebꞌ jix chejletoj yu naj rey tuꞌ, jix too il-le ix Huldá ẍejabꞌ Dios yu ebꞌ. Jaꞌ naj yichamil ix chi yij sbꞌi Salum, scꞌaal Ticvá, yitxiquin Harhás, jaꞌton chi cꞌubꞌan masanil an pichile bꞌey templo. Jaꞌ tituꞌ caan ix bꞌey yet scaabꞌ tujan yeoc conobꞌ Jerusalén. Jaꞌ yet jix kꞌanabꞌ ebꞌ tet ix, 23 jix yalon ix tet ebꞌ jaxca tiꞌ:

—Jaꞌ Jehová cu Diosal chi alon jaxca tiꞌ: Alwej tet mactxequel jix jex chejontej yu jul je kꞌanlen ey jin tiꞌ an: 24 Jain Jehová jin chi walaꞌ: Tol oj watoj junoj syaꞌilal yibꞌan jun conobꞌ tiꞌ, cꞌal yibꞌan masanil ánima caan bꞌey, jaxca wal yalon yul an juun jix awtele a ja sattaj tuꞌ. 25 Yutol jix jin je yintajne can eloj, jaxa tet wan comon dios jix je yakꞌ tzꞌaꞌ incienso. Jix je txꞌemontej sjowal jin cꞌul yu tzettaj yetal che bꞌeybꞌalne. Yu jun tuꞌ, yuxan jix tit sjowal jin cꞌul yibꞌan jun conobꞌ tiꞌ, cꞌamxa chi oc tucan sjowal jin cꞌul yibꞌan, ẍi Jehová. 26 Yuxan alwej tet naj sreyal Judá, jaꞌton mactxequel jix jex chejontej jul je kꞌanle ey jin jain Jehová jin tiꞌ, tol jain Jehová sDiosal jin conobꞌ Israel chi wal jaxca tiꞌ: Yutol jix ja chaꞌ ja wabꞌ tzet jix yal an juun tuꞌ, 27 jix ja waoc yin ja cꞌul, jix ja waon oc ja bꞌa yul jin kꞌabꞌ yet jix ja wabꞌeni tol ey sjowal jin cꞌul yibꞌan jun conobꞌ tiꞌ, cꞌal yibꞌan ebꞌ caan bꞌey, yutol jix jaach oc yin eyilal ey jin, jix ja tzilontoj ja pichil, catuꞌ jix jaach okꞌ jin sattaj, yu jun tuꞌ, yuxan jix jin chaꞌ wabꞌ tzet jix ja walaꞌ. Jain caw Jehová jin chi wal ey jaach: 28 Jain oj wakꞌ eloc bꞌey chi wal can ey jaach tol yin watxꞌcꞌulal oj yun ja cami, jaꞌ bꞌey mujan ebꞌ ja mam icham oj jaach mujleoj, man oj ja wil jun syaꞌtajilal oj watoj yibꞌan jun conobꞌ tiꞌ, cꞌal yibꞌan masanil mactxequel caan bꞌey, ẍi Jehová, ẍi ix tet ebꞌ.

Queytuꞌ jix yun meltzotej ebꞌ yakꞌomal servil naj rey tuꞌ, jix jul yalon spajtzebꞌal kꞌanlebꞌal tuꞌ ebꞌ, 29 yuxan jix yal naj rey tol chi awtele masanil ebꞌ icham winaj yeoc yul conobꞌ Judá cꞌal ebꞌ yet Jerusalén, tol chi syambꞌa oc sbꞌa ebꞌ masanil. 30 Jix lawi tuꞌ xin, jaꞌ naj rey yetoj cꞌal masanil ebꞌ winaj bꞌey Judá cꞌal masanil ebꞌ caan bꞌey Jerusalén, cꞌal ebꞌ yakꞌomal xaambꞌal, ebꞌ Levita, yetoj cꞌal masanil ánima bꞌey yul nación tuꞌ, ebꞌ unin yetoj cꞌal ebꞌ icham ánima, jix too ebꞌ bꞌey stemplo Jehová. Jaꞌ tituꞌ jix yal naj rey tol chi awtele an yuunal swa kꞌane Dios yabꞌ masanil ebꞌ ánima, jaꞌton an jix ilcha yu ebꞌ bꞌey yul stemplo Jehová. 31 Jix lawi tuꞌ, jix oc linan naj rey scꞌatan jun miman oy tituꞌ. Jaꞌ tituꞌ jix yakꞌ stiꞌ sattaj Jehová, tol oj sjije yin masanil scꞌul, cꞌal sbꞌeybꞌalnen masanil chejbꞌanile cꞌal cuybꞌanile, catuꞌ oj sjijen cꞌal pax jaxca yalon can swa kꞌane Jehová. 32 Jix lawi tuꞌ, jix yalon tet masanil ebꞌ ánima a Jerusalén cꞌal tet masanil ebꞌ yet Benjamín, tol chi yakꞌ can stiꞌ ebꞌ yin sjijen masanil. Jaꞌ masanil ebꞌ eyecꞌ bꞌey Jerusalén jix sjije ebꞌ jaxca yalon can swa kꞌane sDiosal ebꞌ yetoj smam icham. 33 Jaꞌ naj Josías jix akꞌon qꞌueyle el masanil wan echele yaabꞌetaj yoc bꞌey yul yet Israel. Jaꞌ masanil mactxequel eyecꞌ bꞌey Israel, jix oc ebꞌ yin eyilal tet Jehová Dios. Jaꞌ yet iquisto ecꞌ naj Josías, ma cꞌal yiꞌel sbꞌa ebꞌ yintaj Jehová, jaꞌton sDiosal ebꞌ yetoj smam icham.