Jix Oc Kꞌin Yu Naj Josías, Yet Chi Snaꞌontej Yet Jix Jajcha Eltej Ebꞌ Israel Bꞌey Txꞌotxꞌ Egipto
35
Jix oc kꞌin yu naj Josías yet chi iꞌle a can sbꞌi Jehová bꞌey Jerusalén, jaꞌton yet chi snaꞌontej ebꞌ yet jix jajcha eltej smam icham ebꞌ bꞌey txꞌotxꞌ Egipto. Jaꞌ yet 14 yoc bꞌabꞌel xꞌaaw jix akꞌle cam noꞌ meꞌ yin xaambꞌalil yu kꞌin Pascua tuꞌ. 2 Jix yaon oc ebꞌ yakꞌomal xaambꞌal yin yopiso, jix iptzele ebꞌ yu yet chi oc ebꞌ yin yopiso bꞌey stemplo Jehová. 3 Jix yalon naj tol chi syambꞌa oc sbꞌa ebꞌ Levita eyoc yin yakꞌomaloj servil Jehová, jaꞌton ebꞌ chi cuywa xol ebꞌ yet Israelal. Jix yalon jaxca tiꞌ: Awej octoj teꞌ Scaẍail Swa Kꞌane Jehová bꞌey yul templo jix swaꞌne naj Salomón, scꞌaal David, sreyal Israel. Manxa oj je bꞌatxecꞌ teꞌ. Jaꞌ tinaniꞌ ocanwej yin je yakꞌon servil Jehová cu Diosal, cꞌal tet ebꞌ ket Israelal, yutol sconobꞌ jon Naj. 4 Awej oc je bꞌa yin xolilal, jaxca yeoc xolilal junjun tujan ebꞌ je mam icham, jaxca ye can stzꞌibꞌele yu naj rey David yetoj scꞌaal chi yij Salomón. 5 Poꞌowej ecꞌ je bꞌa bꞌey stemplo Jehová jaex Levita jex tiꞌ, yet watxꞌ jaex ey jex ecꞌ tituꞌ chex colwa yetoj junjunoj tujan ebꞌ je yet Israelal tol yican to sbꞌa. 6 Jaex oj je makꞌ cam noꞌ achꞌe meꞌ yet kꞌin tuꞌ. Yu jun tuꞌ xin, sajbꞌanewej je bꞌa, jaxca yalon ley, catuꞌ che waꞌnen masanil tzetyetal, yet watxꞌ chi sjije masanil ebꞌ ket Israelal jantaj tzet jix yal can Jehová tet naj Moisés, ẍi naj rey tuꞌ.7 Jix lawi tuꞌ, jaꞌ xol noꞌ sjobꞌbꞌeal noꞌ naj rey Josías tuꞌ, jatuꞌ jix yiꞌeltej jun 30,000 noꞌ meꞌ cꞌal noꞌ chiw, yetoj 3,000 noꞌ achꞌe wacax, jix yakꞌ yu yakꞌon saꞌbꞌeal ebꞌ conobꞌ yaman ecꞌ tituꞌ, yet chi snaꞌontej kꞌin Pascua ebꞌ. 8 Yetoj cꞌal pax ebꞌ eyoc yin yopiso yetoj naj rey tuꞌ, jix yakꞌ cꞌal pax saꞌbꞌeal ebꞌ tet ebꞌ conobꞌ, tet ebꞌ yakꞌomal xaambꞌal, cꞌal tet ebꞌ Levita. Jaxa pax naj Hilquías, naj Zacarías cꞌal yetoj naj Jehiel, jaꞌton ebꞌ chi teynen stemplo Jehová, jix yakꞌ 2,600 noꞌ meꞌ ebꞌ yet chi naꞌletej kꞌin Pascua, yetoj 300 noꞌ achꞌe wacax. 9 Jaꞌ naj Conanías yetoj ebꞌ yuẍtaj, jaꞌton: Semaías cꞌal Natanael, yetoj cꞌal pax Hasabías, Jehiel cꞌal Josabad, jix yakꞌ 5,000 noꞌ meꞌ cꞌal noꞌ chiw, yu snaꞌletej kꞌin Pascua, yetoj 500 noꞌ achꞌe wacax yu yoc yin xaambꞌalil yu ebꞌ Levita.
10 Jaꞌ yet watxꞌ xa yeoc xolilal jun kꞌin tuꞌ, catuꞌ jix yaon oc sbꞌa ebꞌ yakꞌomal xaambꞌal yin xolilal yu yilon yopiso yetoj ebꞌ Levita, jaxca jix yun yalon naj rey tet ebꞌ. 11 Jix smakꞌon cam noꞌ noꞌ ebꞌ yin xaambꞌalil yet kꞌin tuꞌ. Jix yakꞌon ẍiqꞌuil noꞌ xaambꞌal ebꞌ Levita tuꞌ tet ebꞌ yakꞌomal xaambꞌal tuꞌ. Jaxa ebꞌ tuꞌ chi txion ey ẍiqꞌuil noꞌ yibꞌan yet xaambꞌal. 12 Jix spoꞌon ecꞌ noꞌ ẍepuꞌal noꞌ xaambꞌal tol chi akꞌle tzꞌaꞌ yu ebꞌ yakꞌomal xaambꞌal tuꞌ, catuꞌ jix akꞌle tet junjun tujan ebꞌ yican to sbꞌa, yet chi yakꞌon ebꞌ tet Jehová, jaxca yalon can yul an juun yet naj Moisés. Quey cꞌal pax tuꞌ jix yute noꞌ wacax ebꞌ. 13 Jix lawi tuꞌ xin, jix sbꞌolon noꞌ xaambꞌal ebꞌ yet kꞌin tuꞌ, jaxca ye can stzꞌibꞌelei. Jal wanxa noꞌ xaambꞌal jix yakꞌ ta ebꞌ yul-laj xi, cꞌal yul-laj ẍaltin. Yin xacꞌal eymanil jix yun spoꞌon ecꞌ noꞌ ebꞌ xol conobꞌ. 14 Jix lawi tuꞌ xin, jix swaꞌnen yet ebꞌ Levita yetoj pax yet ebꞌ yakꞌomal xaambꞌal, yutol jaꞌ ebꞌ yicꞌaal Aarón tuꞌ caw cꞌam scolanil ebꞌ yu yakꞌon tzꞌaꞌ noꞌ xaambꞌal ebꞌ yetoj cꞌal ẍepuꞌal noꞌ masantaꞌcꞌal jix a akꞌbꞌal yakꞌon tzꞌaꞌ noꞌ xaambꞌal ebꞌ tuꞌ. Yuxan jix swaꞌne yet ebꞌ Levita, yetoj yet ebꞌ yakꞌomal xaambꞌal tuꞌ.
15 Jal pax ebꞌ chi bꞌitni xin, jaꞌton ebꞌ yicꞌaal Asaf, jaꞌ ebꞌ tuꞌ ey cꞌal pax oc ebꞌ yin yopiso jatacꞌalaꞌ yeoc ebꞌ yin xolilal yu naj rey David, yetoj Asaf, Hemán, cꞌal Jedutún, tol ẍejabꞌ Dios yeoc ebꞌ tuꞌ yu naj rey David. Jaxa ebꞌ chi teynen spuertail stemplo Dios xin, eyecꞌ ebꞌ yilon yopiso; cꞌam junoj ebꞌ tuꞌ jix sbꞌejcan yilon yopiso, yutol jaꞌ wan yet Levitail ebꞌ tuꞌ, jaꞌ ebꞌ jix waꞌnen yet ebꞌ chi teynen spuertail templo.
16 Queytuꞌ jix yun yakꞌle servil Jehová yet scꞌual kꞌin yet chi snaꞌontej ebꞌ yet jix jajle eltej ebꞌ Israel bꞌey Egipto, cꞌal yakꞌle tzꞌaꞌ xaambꞌal sattaj Jehová bꞌey jun yet xaambꞌal, jatacꞌalaꞌ jix yun yalon can naj rey Josías. 17 Masanil ebꞌ Israel eyecꞌ yet jun tiempoal tuꞌ, ey jujebꞌ cꞌual jix yaoc kꞌin ebꞌ; jaꞌton yet tuꞌ jix sloꞌon ixim pan ebꞌ cꞌam yich eeyoj. 18 Cꞌam tocꞌal bꞌey jix oc junoj kꞌin jaxca jun jix oc tuꞌ, yet tax cꞌal stiempoal naj Samuel, naj ẍejabꞌ Dios. Cꞌam junojxa sreyal Israel jix aon oc junoj kꞌin Pascua jaxca jun jix yaoc naj rey Josías yetoj ebꞌ yakꞌomal xaambꞌal, yetoj ebꞌ Levita, yetoj cꞌal masanil ebꞌ ánima bꞌey Judá, yetoj cꞌal ebꞌ Israel eyecꞌ yet tuꞌ, yetoj cꞌal pax ebꞌ caan bꞌey Jerusalén. 19 Jaꞌ yet 18 abꞌil xa yoc naj Josías yin reyal, jaꞌ yet tuꞌ jix ale oc jun kꞌin Pascua tuꞌ.
Scamichal Naj Rey Josías
20 Jaꞌ yet jix scaꞌ waꞌne a stemplo Jehová naj rey Josías, jaxa Necao sreyal Egipto, jix too bꞌey jaꞌ miman Éufrates yin yakꞌon jowal bꞌey conobꞌ Carquemis. Queytuꞌ jix yun stoo naj rey Josías smajon sat naj Necao tuꞌ. 21 Jaxa naj Necao tuꞌ jix yatoj ẍejabꞌ yet chi yalon tet jaxca tiꞌ: Jaach sreyal Judá, manche ja wakꞌ jowal win an, yutol manaj ja win chi too wakꞌ jowal tuꞌ, yutol ey junxa conobꞌ bꞌey chi too wakꞌ jowal yetoj, yutol jaꞌ Dios jix alon ey jin tol chi wakꞌ wip jin too yin jun jowal tuꞌ. Yuxan bꞌej ja teelen ja bꞌa yetoj Dios, yet watxꞌ cꞌam chach qꞌueyle el yu, yutol jaꞌ Naj eyoc wetoj, ẍi toj Necao tet naj.
22 Jaxa naj Josías tuꞌ xin, ma cꞌal meltzo naj yintaj, tol jix yiꞌel spichil chi scꞌan yin yopiso, jix yiꞌontej smitxꞌkꞌabꞌ catuꞌ jix yakꞌon jowal naj. Ma ẍaꞌ yabꞌ tzet jix yal Necao tuꞌ, caxcꞌal jaꞌ Dios jix akꞌon yalaꞌ. Yuxan jaꞌ bꞌey sjobꞌeal yet Meguido jix yakꞌ jowal ebꞌ. 23 Jaꞌ ebꞌ julwawom tuꞌ jix julwatej ebꞌ yin naj rey Josías tuꞌ, jix michꞌcha naj yu sjulbꞌal ebꞌ tuꞌ, jix yalon naj tet ebꞌ inen oc scarruaje jaxca tiꞌ: Iꞌ jinwej el titiꞌ an, yutol caw miman jix yun jin lawitoj, ẍi naj. 24 Catuꞌ jix iꞌle eltej naj yul scarruaje yu ebꞌ yakꞌomal servil tuꞌ, jix yaon octoj ebꞌ bꞌey yul junxa yet scaabꞌ carruaje, catuꞌ jix yiꞌontej ebꞌ bꞌey Jerusalén. Jaꞌ tituꞌ jix cam xacꞌal naj, jix mujle can naj yu ebꞌ bꞌey spantion ebꞌ smam icham. Masanil ebꞌ a Judá cꞌal ebꞌ a Jerusalén jix okꞌ ebꞌ yu scamichal naj rey Josías tuꞌ. 25 Jaxa naj Jeremías jix swaꞌne skꞌaneal jun bꞌit, yu snaꞌletej scamichal naj Josías, chi tocꞌal bꞌinale jun bꞌit tuꞌ tinaniꞌ. Masanil ebꞌ winaj cꞌal ebꞌ ix chi bꞌitni, yet chi snaꞌontej jun bꞌit ebꞌ yet scamichal naj rey Josías, yet chi sbꞌitnen wan bꞌit yet camich ebꞌ. Jaꞌ jun bꞌit tuꞌ jix sbꞌeybꞌalne cꞌal ebꞌ Israel sbꞌitneni, eyoc jun bꞌit yet camich tuꞌ yul an yuunal bꞌit.