4 Jix lawi tuꞌ xin, jix yalon naj rey tet naj sat yakꞌomal xaambꞌal chi yij Hilquías yetoj cꞌal tet naj scaabꞌ yakꞌomal xaambꞌal, yetoj cꞌal ebꞌ chi teynen stiꞌ spuerta, tol chi yiꞌeltej masanil tzettaj yetal ebꞌ bꞌey yul stemplo Jehová, jaꞌton wan mitxꞌkꞌabꞌe yet chi oc eyilal tet comon dios chi yij Baal, cꞌal tet Aserá, cꞌal tet wan tzejtebꞌal ey bꞌey satcan, jix yakꞌon tzꞌaꞌ ebꞌ bꞌey stiꞌel conobꞌ Jerusalén, bꞌey stiꞌ jaꞌ Cedrón, catuꞌ jix iꞌletoj staanil bꞌey Betel. 5 Jix lawi tuꞌ xin, jix yiꞌon el naj wan ebꞌ yakꞌomal xaambꞌal akꞌbꞌil yopiso yu ebꞌ rey yin yakꞌon tzꞌaꞌ incienso bꞌey chi oc eyilal tet comon dios bꞌey wan wonanlaj bꞌey Judá cꞌal bꞌey stiꞌlaj conobꞌ Jerusalén, cꞌal ebꞌ yakꞌomal xaambꞌal chi akꞌon tzꞌaꞌ incienso tet Baal, tet cꞌu tet xꞌaaw, cꞌal tet masanil weycan, yetoj cꞌal tet wan weycan chi bꞌeyecꞌ satcan. 6 Jix yiꞌon cꞌal pax eltoj bꞌey stiꞌel conobꞌ Jerusalén, jun yechel Aserá eyoctoj bꞌey yul stemplo Jehová. Jix yakꞌon tzꞌaꞌ bꞌey stiꞌ jaꞌ Cedrón, catuꞌ jix stiẍontoj staanil tuꞌ yibꞌan bꞌey mujan ebꞌ comon ánima. 7 Catuꞌ jix yuchon cꞌal pax ey snail bꞌey chi yun mul ebꞌ winaj yetoj yet winajil bꞌey yul stemplo Jehová, yetoj cꞌal pax ebꞌ ix mulwom ix. Jaꞌ tituꞌ chi chemwi kꞌap ebꞌ ix ix, an chi ale oc yin jun comon dios chi yij Aserá.

8 Jix lawi tuꞌ xin, jix yaloni tol chi syambꞌa oc sbꞌa masanil ebꞌ yakꞌomal xaambꞌal bꞌey Jerusalén, jaꞌton ebꞌ ey bꞌey conobꞌlaj yul yet Judá, catuꞌ jix yetnentoj masanil yet xaambꞌal waꞌnebꞌil a bꞌey wan wonanlaj yul yet conobꞌ Guebá, masantaꞌcꞌal bꞌey Beerseba, jaꞌton bꞌey jix yakꞌ tzꞌaꞌ incienso ebꞌ yakꞌomal xaambꞌal tuꞌ, catuꞌ jix yuchon pax lawoj wan yet xaambꞌal ey bꞌey spuertail conobꞌ, jaxca bꞌey spuertail yet Josué, jaꞌton naj yaaw yeoc bꞌey Jerusalén. Jaꞌ tituꞌ chi cancan yetcꞌulal bꞌey sqꞌuexan kꞌabꞌ yet chi octoj ebꞌ bꞌey yul conobꞌ tuꞌ. 9 Jaxa ebꞌ yakꞌomal xaambꞌal yicꞌaal Leví, jix akꞌon xaambꞌal bꞌey chi oc eyilal tet comon dios bꞌey wan wonanlaj, ma xa apnoj oc ebꞌ bꞌey jun yet xaambꞌal yet Jehová bꞌey Jerusalén, asan tol chi sloꞌ ixim pan ebꞌ tol cꞌam yich eeyoj yetoj ebꞌ yet yakꞌomal xaambꞌal tuꞌ.

10 Queytuꞌ jix yun yetneletoj jun lugar chi yij Tófet bꞌey spananil sjobꞌeal Ben-hinom, yu naj Josías, bꞌey chi akꞌle tzꞌaꞌ unin yin xaambꞌalil yu ebꞌ ánima. Yu jun tuꞌ, cꞌamxa junoj mactxequel jix skeꞌ yakꞌon tzꞌaꞌ scꞌaal ma scutzꞌin tet jun comon dios chi yij Moloc. 11 Jix yiꞌon cꞌal pax el wan yechel noꞌ che eyoc yu ebꞌ sreyal Judá yet chi oc ebꞌ yin eyilal tet cꞌu. Jix yakꞌon tzꞌaꞌ wan yechel carruaje ebꞌ. Eyoc wan echele tuꞌ scawilal sattaj eltoj bꞌey chi octoj ebꞌ yul stemplo Jehová, scawilal scuarto jun winaj ey yopiso chi yij Natán-mélec. 12 Catuꞌ jix yuchon ey wan yet xaambꞌal waꞌnebꞌil a yu ebꞌ sreyal Judá bꞌey spananil yibꞌan scuarto naj camom rey Ahaz, cꞌal wan yet xaambꞌal waꞌnebꞌil can yu naj rey Manasés bꞌey scaabꞌ yamakꞌil stemplo Jehová, catuꞌ jix makꞌon poꞌo, jix skꞌojon cantoj skꞌail bꞌey jobꞌeal jaꞌ Cedrón.

13 Jix yuchon lawoj wan echele bꞌey chi oc ebꞌ ánima yin eyilal cꞌal wan pat na waꞌnebꞌil a bꞌey wonanlaj yetcꞌulal bꞌey chi aol cꞌu bꞌey conobꞌ Jerusalén, bꞌey spacꞌanil txꞌotxꞌ tzalan olivo bꞌey yetcꞌulal sur. Jaꞌton wan waꞌnebꞌil can yu naj Salomón, sreyal Israel, yet chi oc ebꞌ ánima yin eyilal tet wan comon sdiosal ebꞌ a Sidonio, wan tol caw yaabꞌetaj; yetoj cꞌal pax Quemós sdiosal ebꞌ Moabita; yetoj cꞌal pax Milcom,^a sdiosal ebꞌ Amonita. Masanil wan comon dios tuꞌ yaabꞌil el ebꞌ yu Jehová. 14 Jix smakꞌon can poꞌo chꞌen chꞌen tol yaꞌ yili, catuꞌ jix skꞌajon ey teꞌ steꞌal Aserá, jix sajlem cantoj sbꞌajil camom eyecꞌ tituꞌ. 15 Jacꞌalaꞌ jix yuchon can lawoj jun yet xaambꞌal naj, jun waꞌnebꞌil can yu naj rey Jeroboam scꞌaal Nabat bꞌey templo bꞌey conobꞌ Betel, jaꞌton jun jix ijbꞌantoj ebꞌ yet Israelal yin spenail. Pojoj xacꞌal jix yun cantoj masanil, catuꞌ jix yakꞌon tzꞌaꞌ yechel jun comon dios chi yij Aserá tuꞌ.

16 Jaꞌ yet jix meltzotej naj Josías tuꞌ, jix yilontoj wan smujbꞌanil camom bꞌey jun tzalan, jix yaloni tol chi iꞌle eltej sbꞌajil ebꞌ camom eyoctoj yul, catuꞌ jix snuson tzꞌaꞌ bꞌey sattaj jun yet xaambꞌal yet chi yetnen cantoj. Jaxca ton tuꞌ jix yun yeloc bꞌey jix yal can jun ẍejabꞌ Dios yet peyxa. 17 Yin eymanil jix skꞌanle naj rey Josías jaxca tiꞌ:

—¿Mac ey yet jun smujbꞌanil camom chi wiltoj tuꞌ? ẍi naj. Jaxa ebꞌ caan bꞌey jun conobꞌ tuꞌ jix takꞌwi tet jaxca tiꞌ:

—Jaꞌ spantion jun ẍejabꞌ Dios titnaj bꞌey Judá, jaꞌ jix alon can eloj yu jun tzet cha wun yin jun yet xaambꞌal bꞌey Betel tinaniꞌ, ẍi ebꞌ tet naj.^b

18 Jix yalon naj Josías jaxca tiꞌ:

—Akꞌwej can jun tuꞌ xin, cꞌam mactxequel chi tenon sbꞌajil jun camom tuꞌ, ẍi naj.

Yuxan ma xa tenle sbꞌajil jun ẍejabꞌ Dios tuꞌ, yetoj cꞌal sbꞌajil junxa ẍejabꞌ Dios titnaj bꞌey conobꞌ Samaria.

19 Queytuꞌ jix yun naj Josías bꞌey conobꞌ Betel, catuꞌ jix smakꞌon ey wan pat na waꞌnebꞌil a bꞌey wonanlaj bꞌey chi oc ebꞌ ánima yin eyilal, yetoj cꞌal wan waꞌnebꞌil a bꞌey conobꞌ Samaria yu ebꞌ sreyal Israel, jaꞌton wan jix txꞌemontej sjowal scꞌul Jehová. 20 Jix lawi tuꞌ xin, catuꞌ jix makꞌle cam masanil ebꞌ yakꞌomal xaambꞌal yibꞌan jun yet xaambꞌal waꞌnebꞌil a bꞌey wan wonanlaj bꞌey conobꞌ Samaria tuꞌ. Jix snuson can tzꞌaꞌ wan sbꞌajil camom yibꞌan wan yet xaambꞌal tuꞌ naj, yet watxꞌ chi yetnen cantoj. Jix lawi tuꞌ, catuꞌ jix paxtej naj bꞌey Jerusalén.

21 Jix lawi tuꞌ, jix yalon naj Josías tet masanil ebꞌ conobꞌ jaxca tiꞌ: Tol chi cu naꞌwejtej kin yet jix jajcha el ebꞌ cu mam icham bꞌey txꞌotxꞌ Egipto, yu kiꞌonwej a can sbꞌi cu Diosal, jaxca ye stzꞌibꞌelecan yul an yuunal swa kꞌane Dios. 22 Queytuꞌ jix yun yoc jun kꞌin tuꞌ yu ebꞌ. Yutol cꞌamto junoj ebꞌ ecꞌnajxa yin reyal bꞌey Israel ma junoj sreyal Judá jix aon oc junoj kꞌin jix naꞌletej tuꞌ. 23 Jaꞌ yet 18 abꞌil xa yoc naj Josías yin reyal, jaꞌ yet tuꞌ jix naꞌletej yoc jun kꞌin yu yiꞌle a can sbꞌi Jehová bꞌey conobꞌ Jerusalén.

24 Jacꞌalaꞌ jix qꞌueyle cꞌal pax el ebꞌ atxum cꞌal ebꞌ chi awten spixan camom yu naj Josías, cꞌal comon dios yul-laj na, yetoj cꞌal masanil tzettaj yetal tol yaabꞌetaj yul sat Jehová, bꞌey conobꞌ Judá cꞌal bꞌey Jerusalén. Jix yun jaxca tuꞌ, yu sjijen naj tzet tzꞌibꞌebꞌil yul an yuunal ley jix ilcha yu naj yakꞌomal xaambꞌal chi yij Hilquías bꞌey stemplo Jehová. 25 Cꞌam tocꞌal junoj rey yet yalantoj jix yaoc sbꞌa yul skꞌabꞌ Jehová, jaxca wal jix yun jun naj rey tuꞌ, cꞌamxa pax junojxa jix to yun yet jix bꞌeycꞌaltej tiempo tuꞌ. Yutol jix sjije naj yin masanil scꞌul, yetoj masanil snaꞌbꞌal, cꞌal yetoj masanil yip, jantaj tzet albꞌilcan yu sley naj Moisés.

26 Caxcꞌal jaxca tuꞌ jix yun naj, asan xin, eyto cꞌaltej sjowal scꞌul Jehová yin conobꞌ Judá, yu cꞌal spenail jix yun naj Manasés. 27 Yuxan jix yal Jehová jaxca tiꞌ: Oj wiꞌel conobꞌ Judá tuꞌ jin sattaj, jaxca jix yun wiꞌon el ebꞌ Israel jin sattaj, catuꞌ oj wintajne can el Jerusalén, jaꞌton jun conobꞌ sicꞌbꞌil el wu yetoj jun templo tiꞌ, jun bꞌey walnaj canoj tol jaꞌ tituꞌ chi oc eyilal ey jin an.

28 Jaꞌ yul stiempoal naj rey Josías tuꞌ jix too naj Necao, sreyal Egipto bꞌey jaꞌ miman Éufrates, yu scolwa yetoj naj sreyal Asiria. Catuꞌ jix eltoj naj rey Josías yakꞌon jowal yetoj bꞌey Meguido. Jaꞌ yet jix ẍaꞌlen sbꞌa ebꞌ yin jowal tuꞌ, jix makꞌle cam naj Josías yu naj. 29 Jix ale octoj smimanil naj yul carruaje yu ebꞌ eyoc yin yopiso yetoj. Jix tit ebꞌ bꞌey Meguido masantaꞌcꞌal jix jul ebꞌ bꞌey Jerusalén; jaꞌ tituꞌ jix mujle naj yul spantion wanebꞌil. Jaxa masanil ebꞌ ánima bꞌey yul conobꞌ tuꞌ jix aon oc naj Joacaz scꞌaal Josías, yin reyal sqꞌuexeloj. 30 Jaꞌ jantaj to skꞌaneal naj Josías yetoj jantaj tocꞌal tzet jix yun naj, jatuꞌ tzꞌibꞌebꞌilcan bꞌey ey can ey skꞌaneal ebꞌ sreyal Judá.

31 Eyxa 23 abꞌil skꞌinal naj Joacaz yet jix oc naj reyal bꞌey Jerusalén, oxebꞌne xꞌaaw jix oc naj yin reyal; jaꞌ xutx chi yij Hamutal, scutzꞌin Jeremías a conobꞌ Libná. 32 Caw pena cꞌal jix yute sbꞌa naj sattaj Jehová, asan cꞌal spenail jix yun naj jaxca cꞌal spenail ebꞌ smam icham. 33 Jix ale oc naj preso yu naj rey Necao bꞌey conobꞌ Riblá yul yet Hamat, yet watxꞌ cꞌamxa chi yakꞌ yaawil naj bꞌey Jerusalén cꞌal yibꞌan ebꞌ a Judá, catuꞌ jix yaon oc jun toolabꞌal naj Necao yibꞌan ebꞌ a Judá tuꞌ; 75 quintal chꞌen plata, yetoj oxebꞌ arroba chꞌen oro. 34 Jix lawi tuꞌ, jix ale oc naj Eliaquim scꞌaal Josías yin reyal sqꞌuexeloj smam yu naj rey Necao, catuꞌ jix sqꞌuexon sbꞌi,^c jix yakꞌon yij Joaquim. Catuꞌ jix iꞌletoj naj Joacaz yu naj bꞌey Egipto. Jaꞌ tituꞌ jix cam naj.

35 Jix yakꞌon chꞌen oro cꞌal chꞌen plata naj Joaquim tet naj sreyal Egipto. Jix yaon oc jun toolabꞌal yibꞌan ebꞌ ánima bꞌey yul snación tuꞌ, yuxan junjun ánima jix akꞌon chꞌen oro cꞌal chꞌen plata jatacꞌalaꞌ jantaj tzet ey tet junjun ebꞌ. Queytuꞌ jix yun yakꞌon stoolabꞌal ebꞌ.

36 Eyxa 25 abꞌil skꞌinal naj Joaquim yet jix oc naj yin reyal, ey jusluqꞌuebꞌ abꞌil jix yakꞌ reyal bꞌey Jerusalén. Jaꞌ xutx chi yij Zebudá, scutzꞌin naj Pedaías a conobꞌ Ruma. 37 Jix oc spenail naj Joaquim tuꞌ yul sat Jehová, jaxca cꞌal spenail jix yute sbꞌa ebꞌ smam icham, Queytuꞌ jix yunne.