Jix Oc Naj Manasés Yin Reyal
33
Lacawebꞌ abꞌil skꞌinal naj Manasés yet jix oc yin reyal; 55 abꞌil jix yakꞌ reyal bꞌey Jerusalén. 2 Yel xacꞌal pena jix yute sbꞌeybꞌal sattaj Jehová, yutol jix sbꞌeybꞌalne cꞌal masanil spena sbꞌeybꞌal wan nación jix iꞌle el sattaj ebꞌ Israel yu Jehová. 3 Jix scaꞌ waꞌne a wan yet eyilal bꞌey wonanlaj wan jix yuchey naj Ezequías, jaꞌton smam. Jix swaꞌne a jun yet xaambꞌal yet jun comon dios Baal, jix swaꞌnen cꞌal pax a yechel Aserá; yetoj cꞌal pax oj, jix oc yin eyilal tet masanil tzejtebꞌal ey bꞌey satcan. 4 Jix swaꞌne a wan yet xaambꞌal bꞌey stemplo Jehová, jaꞌton jun templo bꞌey jix yal Dios tol jaꞌ tituꞌ oj bꞌina sbꞌi bꞌey Jerusalén. 5 Jaꞌ bꞌey caabꞌ tujan sattaj eltoj stemplo Jehová, jix swaꞌne a wanxa yet xaambꞌal bꞌey chi oc eyilal tet wan tzejtebꞌal ey bꞌey satcan.6 Jix yakꞌon cꞌal pax tzꞌaꞌ yuninal yin xaambꞌal bꞌey sjobꞌeal yet Ben-hinom, jix sbꞌeybꞌalne yu yalon sbꞌa tet ebꞌ pena espíritu, jix sbꞌeybꞌalne yin snaꞌon el kꞌane, cꞌal yin atxumal; jix yijbꞌan conobꞌ yin yawten spixan camom cꞌal yin sbꞌalnen junoj mactxequel. Caw pena tzet jix el yunen sattaj Jehová, yuxan jix xꞌemtej sjowal scꞌul Jehová yibꞌan. 7 Jix yaon octoj jun echele jix swaꞌne bꞌey yul stemplo Dios. Jaꞌ yin jun templo tuꞌ, jix yal Jehová tet naj David cꞌal tet scꞌaal Salomón jaxca tiꞌ: Jaꞌton jun templo bꞌey Jerusalén tiꞌ, jix jin sicꞌ can el xol ebꞌ yicꞌaal Israel, tol jin calubꞌal chi yun can ocoj. 8 Ma xacꞌal wiꞌel ebꞌ Israel tiꞌ junelxa bꞌey jun txꞌotxꞌ jix wakꞌ tet yichmam ebꞌ, asan ta tol oj sjije masanil chejbꞌanile ebꞌ, yetoj cꞌal masanil cuybꞌanile jix jin chej yal can naj jin chejabꞌ Moisés tet ebꞌ, ẍi Jehová.
9 Jaꞌ naj Manasés tuꞌ xin, jix ijbꞌantoj ebꞌ a Judá cꞌal ebꞌ a Jerusalén yin pena bꞌeybꞌale, ecꞌbꞌan xacꞌal spenail sbꞌeybꞌal yintaj wanxa nación jix qꞌueyle el sattaj ebꞌ Israel yu Jehová. 10 Jix tenchanele naj Manasés cꞌal ebꞌ conobꞌ yu Jehová, ma cꞌaltaꞌ sjije ebꞌ tzet jix yal Naj. 11 Yu jun tuꞌ xin, yuxan jix aletej ebꞌ soldado yet Asiria yin ebꞌ yu Jehová, jix mitxꞌle ey naj Manasés tuꞌ yu ebꞌ, jix ale oc wan chꞌen gancho yin xaam naj yu ebꞌ, jix kꞌal-le ey yetoj chꞌen cadena tol bronce cꞌal eloj, catuꞌ jix yiꞌontoj ebꞌ bꞌey conobꞌ Babilonia.
12 Jaxa yet jix yabꞌen wal syaꞌilal naj tuꞌ xin, jix txali naj tet Jehová sDiosal; yelcꞌulal wal jix yiꞌey sbꞌa sattaj sDiosal smam icham. 13 Jaꞌ yet jix txali tuꞌ, jix yabꞌ Dios tzet jix skꞌanaꞌ, jix meltzotej naj junelxa yu Jehová bꞌey Jerusalén yet chi oc naj yin yopiso junelxa. Queyton wal tuꞌ jix yun snaꞌcha el yu naj Manasés, tol asanne Jehová, Dios toni.
14 Jix lawi tuꞌ, jix scaꞌ swaꞌne oc smuroal yinlaj sconobꞌ David yetcꞌulal bꞌey chi too cꞌu, jix yaon oc stzꞌajil steel. Jix ẍaꞌel yich scawilal bꞌey chi aol snukꞌ jaꞌ jaꞌ chi yij Guihón, jix yiꞌontoj bꞌey yetcꞌulal norte, masantaꞌcꞌal bꞌey spuertail yet noꞌ pescado bꞌey scawilal jun tzalan chi yij Ófel. Jix yaon cꞌal pax oc syaawil ebꞌ soldado bꞌey wan conobꞌ eyoc smuroal yul yet Judá. 15 Jix yalon naj tol chi iꞌle cꞌal pax el sdiosal ebꞌ txꞌoj conobꞌal, cꞌal jun echele jix yaoctoj bꞌey yul stemplo Jehová, cꞌal wan yet xaambꞌal jix swaꞌne a bꞌey tzalan yet templo cꞌal bꞌey Jerusalén. Jaꞌ wan tuꞌ jix yiꞌeltoj bꞌey stiꞌlaj conobꞌ. 16 Jix lawi tuꞌ xin, jix scaꞌ waꞌne a jun yet xaambꞌal sattaj Jehová, jix yakꞌon xaambꞌal yet watxꞌcꞌulal, cꞌal xaambꞌal yu alo yu diosalil; catuꞌ jix yalon tet ebꞌ a Judá tol chi oc ebꞌ yin eyilal tet Jehová, jaꞌton sDiosal. 17 Asan xin, jaꞌ ebꞌ conobꞌ tuꞌ, jix yakꞌ cꞌal tzꞌaꞌ xaambꞌal ebꞌ bꞌey wan wonanlaj bꞌey chi oc ebꞌ yin eyilal tet comon dios, caxcꞌal jaꞌ tet Jehová chi oc ebꞌ yin eyilal chi yute yaloni.
18 Jaꞌ wanojxa skꞌaneal naj Manasés, cꞌal yet jix txali naj tet Dios, yetoj cꞌal tzet jix yal Jehová tol chi yalel ebꞌ ẍejabꞌ, jatuꞌ tzꞌibꞌebꞌilcan bꞌey yul an yuunal skꞌaneal ebꞌ sreyal Israel. 19 Tzꞌibꞌebꞌil pax can skꞌaneal yet jix txali cꞌal spajtzebꞌal jix yakꞌ Dios tet naj. Yetoj cꞌal pax yet jix oc spitalil cꞌal bꞌey jix swaꞌne a wan yet eyilal bꞌey wan wonanlaj, cꞌal bꞌey jix swaꞌne ey yechel Aserá cꞌal wanxa echele, yet cꞌamto chi snaꞌ sbꞌa scꞌul yet jix yiꞌon ey sbꞌa tet Dios, jatuꞌ tzꞌibꞌebꞌilcan ey bꞌey jix stzꞌibꞌe can ebꞌ ẍejabꞌ Dios. 20 Jaꞌ yet jix cam naj, jatuꞌ jix mujle xol wan awbꞌeal teꞌ bꞌey spalacio. Jix lawi tuꞌ, jaxa jun scꞌaal chi yij Amón jaꞌ jix oc can sqꞌuexeloj yin reyal.
Jix Oc Naj Amón Yin Reyal
21 Jaꞌ naj Amón tuꞌ, ey 22 abꞌil skꞌinal yet jix ẍaꞌon el yich yakꞌon reyal, caabꞌ abꞌil jix yakꞌ reyal bꞌey Jerusalén. 22 Caw pena jix yute sbꞌeybꞌal naj sattaj Jehová, jaxca wal sbꞌeybꞌal smam, jaꞌton Manasés. Jix yakꞌ tzꞌaꞌ xaambꞌal, cꞌal yoc yin eyilal tet wan sdiosal smam tuꞌ. 23 Ma yiꞌey sbꞌa sattaj Jehová, jaxca jix yun smam, yutol caw eyto cꞌal spenail jix yunne.