Jix Yaꞌbꞌi Ey Naj Ezequías
38
Jaꞌ yet jun tiempoal tuꞌ, caw wal jow jix yun syaꞌbꞌi ey naj Ezequías. Jaꞌ naj ẍejabꞌ Dios chi yij Isaías, scꞌaal Amós, jaꞌ jix bꞌet ilon ecꞌoj, jix yalon tet jaxca tiꞌ:—Jaꞌ Jehová chi alon jaxca tiꞌ: Al xacꞌal can tet ebꞌ ja wuninal, tzet oj yun can ja wopiso yetoj cꞌal masanil tzetyetal ey, ey jaach, yutol oj jaach cam xacꞌal, manxa oj waꞌxoj ja cꞌul, ẍi Jehová, ẍi naj Isaías.
2 Jix lawi tuꞌ, jix meltzo octoj jacan naj Ezequías tuꞌ bꞌey yich xꞌat, catuꞌ jix txali tet Jehová jaxca tiꞌ:
3 Jaach jin Diosal, chin oc tean ja win, naꞌtej tzet jix yun jaach wakꞌon servil yin masanil jin cꞌul, jix wun cꞌal tzetyetal jix ẍaꞌ ja cꞌul, ẍi naj. Catuꞌ jix michꞌcha scꞌul naj yokꞌi.
4 Jix lawi tuꞌ, jix yalon pax Jehová tet naj Isaías jaxca tiꞌ, 5 asiꞌ al tet naj Ezequías junelxa jaxca tiꞌ: Jaꞌ Jehová cu Diosal, sDiosal cꞌal pax ja mam icham David, jaꞌ chi alon jaxca tiꞌ: Jix wabꞌ ja txa, jix wilon cꞌal pax oj, tol chach okꞌi, yuxan oj wakꞌ jolajonebꞌojxa abꞌil ja kꞌinal. 6 Oj jaach jin colel yetoj conobꞌ Jerusalén tiꞌ yul skꞌabꞌ naj sreyal Asiria. Jain oj waoc steynemal jun conobꞌ tiꞌ, ẍi Jehová, ja chi.
7 Jix takꞌwi naj Isaías jaxca tiꞌ:
—Jaꞌton jun yechel oj xꞌox Jehová tiꞌ, tol yel oj yun tzet jix yalaꞌ: 8 Jaꞌ yin chꞌen sbꞌisbꞌal hora naj Ahaz oj akꞌle meltzo laonebꞌoj tujan yenel cꞌu tol xax ecꞌ eltoj yu Jehová, ẍi naj Isaías.
Yu jun tuꞌ, yuxan jix meltzo laonebꞌoj tujan yenel yajan cꞌu tol xax ecꞌ el tuꞌ.
9 Jaꞌ yet tuxa chi waꞌxi el scꞌul naj Ezequías sreyal Judá yu jun syaꞌilal tuꞌ, jix swaꞌne can oc skꞌaneal jun bꞌit naj jaxca tiꞌ,
10 Jain tiꞌ, jix jin naꞌ tol tecꞌan ánima jin to catuꞌ oj jin camoj. Jix al-le ey jin tol ey jin xa oc yul skꞌabꞌ camich, cꞌamxa chin naꞌ ta tol oj to wil jayebꞌoj xa abꞌil.
11 Jix jin naꞌ tol manxa oj wil yin Jehová jin Diosal bꞌey yul yibꞌankꞌinal tiꞌ; manxa oj wil cꞌal pax yin junoj mactxequel caan bꞌey yul yibꞌankꞌinal tiꞌ, waloni.
12 Jaꞌ wiquisal tꞌinan chi lawi ey jaxca cꞌal chi yun yuchle ey junoj kꞌap na yet ebꞌ chi teynen meꞌ, ma jaxca cꞌal chi yun slotꞌle el an txꞌal yet chi lawi ẍemle eyoj.
13 Caw chi el waw yu syaꞌilal chi ecꞌ akꞌbꞌal, jaxca xacꞌal tol lalan scꞌuxon poꞌo jin bꞌajil noꞌ bꞌalam. Caw chi wabꞌ cꞌal syaꞌil ja wu yet chi ecꞌ cꞌu, cꞌal yet chi ecꞌ akꞌbꞌal.
14 Cꞌuancꞌulal xacꞌal chi el waw jaxca noꞌ tzꞌutic, chi el waw jaxca noꞌ uch. Caw chi cꞌuumbꞌi xacꞌal jin sat watoj tꞌanan satcan. Jaach jin Diosal, takꞌwan ey jin, yutol caw okꞌbꞌal jin cꞌul chi wabꞌe.
15 Jaꞌ tinaniꞌ xin, ¿tzet to wal oj wute walon yu diosalil? Cꞌamxa tzet watxꞌ waloni, tuxa jix yun bꞌey jix ja wakꞌcan ja tiꞌ. Yin xacꞌal yeynajilal oj yun wecꞌ tinaniꞌ yet xax ecꞌtoj jun syaꞌilal tiꞌ wibꞌan.
16 Jaach jin Diosal, jaꞌ ebꞌ ánima chi skeꞌ yiquisbꞌi ecꞌ ebꞌ yu tzet cha wunne, yutol jain jun chin iquisbꞌi ecꞌ yetoj ebꞌ.
Jaach jix ja wakꞌ jin cawil, yuxan cha wakꞌ meltzo wiquisal junelxa.
17 Caw miman jun syaꞌilal jix ecꞌ el wibꞌan yu jin watxꞌiloj. Jix el yin ja cꞌul tol jix jin ja colcan el yul skꞌabꞌ camich, yutol jix ja wakꞌ mimancꞌulal yin jin penail.
18 Jaꞌ mactxequel eyxa ecꞌ bꞌey mujan ebꞌ camom, cꞌamxa chi skeꞌ yalon watxꞌ kꞌane ebꞌ ey jaach. Jaꞌ ebꞌ camnajxa, cꞌamxa chi skeꞌ yiꞌon a can ja bꞌi ebꞌ. Jaꞌ mactxequel xax eytoj bꞌey yul sjolanil smujbꞌanil ebꞌ camom, manxa naꞌanoj yu ebꞌ jantaj tzet albꞌilcan ja wu.
19 Asan mactxequel iquisto ecꞌoj, jaꞌton ebꞌ chi skeꞌ yalon watxꞌ kꞌane ey jaach, jaxca chi yun walon jin watxꞌ kꞌane ey jaach tinaniꞌ. Jaꞌ ebꞌ mame txutxe, chi yal ebꞌ tet yuninal tol chi cꞌal yun tzet cha walaꞌ.
20 Jaach jin Diosal, jin Colomal jaach toni, smoo chach cu bꞌitne yetoj arpa, catuꞌ chi cu bꞌitnen ja bꞌi bꞌey ja templo, yajbꞌan iquis jon to ecꞌ ja wu, ẍi naj rey Ezequías.
21 Jix lawi tuꞌ, jix yakꞌon waꞌnele niꞌoj sat teꞌ higo naj Isaías, catuꞌ jix ale oc yin sat bꞌey eyoc jun syaꞌilal naj rey tuꞌ. Queytuꞌ jix yun swaꞌxi scꞌul naj xol jun syaꞌilal tuꞌ. 22 Jix lawi tuꞌ, catuꞌ jix skꞌanle naj Ezequías tet naj Isaías jaxca tiꞌ:
—¿Tzet wal oj yun snaꞌcha el wu an xin, ta tol oj skeꞌ jin to junelxa bꞌey stemplo Jehová? ẍi naj.