Jix Col-le El Judá Yul Skꞌabꞌ Ebꞌ A Asiria
37
Jaꞌ yet jix yabꞌen naj rey Ezequías wan kꞌane tuꞌ, jix stziltoj stiꞌ spichil, jix yaon oc eel pichile yu xꞌoxon el scuscꞌulal catuꞌ jix too naj txaloj bꞌey stemplo Jehová. 2 Catuꞌ jix chejletoj naj Eliaquim yu naj rey Ezequías, yutol jaꞌ naj eyoc yilomaloj mulnail bꞌey sdespacho, yetoj Sebná, naj tzꞌibꞌlom yetoj cꞌal ebꞌ yakꞌomal xaambꞌal tol icham winajxa, jix yaon cꞌal pax oc an eel pichile ebꞌ, jix too ebꞌ yilon jun ẍejabꞌ Dios chi yij Isaías, scꞌaal Amós. 3 Jix yalon ebꞌ tol jaꞌ naj rey Ezequías jix alon jaxca tiꞌ: Jaꞌ tinaniꞌ, caw wal ey jon oc yin cuscꞌulal cꞌal yin syaꞌilal, yetoj cꞌal yin yeynajilal; jaxca junoj ix ix chi yabꞌ syaꞌil yu unin, catuꞌ chi pax xacꞌal yip. 4 Tol oj wal jix yabꞌ Jehová cu Diosal, Naj cha wakꞌ servil tuꞌ, wan kꞌane jix yal jun syaawil ebꞌ soldado chejbꞌiltej yu naj sreyal Asiria tuꞌ, yutol caw pena tzet chi yal naj yin cu Diosal tol iquis ecꞌoj. Tol oj wal chi ale oc syaꞌilal yibꞌan yu Jehová cu Diosal, yu wan tzet jix yal tuꞌ. Jaꞌ tinaniꞌ xin, txalan tet Dios cu jaon jaywan jon xa chi cu cancan tiꞌ, ẍi naj Ezequías, ẍi ebꞌ.5 Jix yabꞌen Isaías tzet jix yal ebꞌ ẍejabꞌ naj rey Ezequías tuꞌ. 6 Jix yalon naj Isaías tet ebꞌ tol chi yal ebꞌ tet syaawil, tol jaꞌ Jehová chi alon jaxca tiꞌ: Cꞌam ojabꞌ chach xiw tet wan pena kꞌane jix yal ebꞌ ẍejabꞌ naj sreyal Asiria tuꞌ ja win. 7 Jain oj watej xiwcꞌulal xol ebꞌ. Jaꞌ yet oj yabꞌen junoj kꞌane ebꞌ, catuꞌ oj meltzotoj naj sreyal Asiria bꞌey sconobꞌ yetoj masanil ebꞌ soldado. Jaꞌ tituꞌ oj wakꞌ makꞌle cam yetoj chꞌen espada, ẍi Jehová, ẍi Isaías.
8 Jaꞌ yet jix yabꞌen naj syaawil ebꞌ soldado a Asiria tuꞌ, tol jaꞌ naj sreyal Asiria cꞌamxa naj eyecꞌ bꞌey conobꞌ Laquis. Yu jun tuꞌ, yuxan jix el naj bꞌey Jerusalén. Jix ẍaꞌlen sbꞌa yetoj naj sreyal Asiria bꞌey conobꞌ Libná, tol lalan yakꞌon jowal naj yetoj jun conobꞌ tuꞌ. 9 Jaꞌ tituꞌ jix yabꞌ naj rey yal-lei, tol jaꞌ naj Tirhaca sreyal Etiopía lalan sjul yetoj jun miman bꞌulan soldado yakꞌon jowal yin ebꞌ. Yu jun tuꞌ, jix ẍejon pax tej jun yakꞌomal servil naj sreyal Asiria yu jul yalon tet Ezequías sreyal Judá, yet chi too yalon jaxca tiꞌ: 10 Jaꞌ ja Diosal chi aloni, tol man oj ale oc Jerusalén tiꞌ yul jin kꞌabꞌ; cꞌam ojabꞌ cha waoc yipoj ja cꞌul yin tzet chi yal ja Diosal tuꞌ. 11 Jix mi ja wabꞌ skꞌumal tzet jix yun cu qꞌueyon el wan nación jaon sreyal Asiria jon tiꞌ. ¿Tumi jaachto wal oj jaach colcha can el ja naꞌoni? 12 Tumi jix colwa wan dios tuꞌ yetoj wan conobꞌlaj jix yakꞌ lawoj ey ebꞌ wichmam, jaxca Gozán, Harán, Résef, yetoj cꞌal ebꞌ ánima a Bet-edén, jaꞌton ebꞌ caan bꞌey Telasar. 13 Naꞌwejtej tzet jix utele ebꞌ sreyal Hamat, Arpad, Sefarvaim, Hená cꞌal yetoj Ivá, ẍi naj rey, ẍi jun chejabꞌwom tuꞌ.
14 Jix ẍaꞌon cꞌal pax ecꞌ naj rey Ezequías jun an juun iꞌbꞌil oc yu ebꞌ ẍejabꞌ naj sreyal conobꞌ Asiria tuꞌ, jix yawten a an juun naj tuꞌ. Jix lawi tuꞌ, jix too naj bꞌey stemplo Dios, jix sjenbꞌantoj jun an juun tuꞌ sattaj Jehová. 15 Catuꞌ jix txali, jix yalon jaxca tiꞌ: 16 Jaach Jehová jin Diosal, yaaw jaach yibꞌan masanil tzetyetal, jaꞌ tituꞌ ey ja despacho snan xol ebꞌ querubín, tol asanne jaach Dios jaach bꞌey masanil yul yibꞌankꞌinal tiꞌ. Jaach jix ja waꞌne satcan cꞌal txꞌotxꞌ txꞌotxꞌ. 17 Jaach jin Diosal, abꞌ tzet chi walaꞌ. Ilaꞌ wal yalon wan kꞌane jix stzꞌibꞌetej naj Senaquerib tiꞌ ey jin, caw chi yal pena kꞌane naj ja win jaach Dios tol iquis jaach cꞌal ecꞌoj. 18 Yel ton jaach jin Diosal, jaꞌ ebꞌ sreyal Asiria tuꞌ, jix yakꞌ lawoj ey wan nacionlaj ebꞌ tuꞌ, catuꞌ jix stokꞌon can ecꞌ masanil txꞌotxꞌ txꞌotxꞌ ebꞌ. 19 Jix yakꞌon tzꞌaꞌ masanil wan comon dios ebꞌ, yutol jaꞌ wan tuꞌ, caw yel man dios oj ebꞌ, teꞌ cꞌal eloj ma chꞌen waꞌnebꞌil ey yu ánima. Yu jun tuꞌ, yuxan jix skeꞌ yakꞌon lawoj ey ebꞌ. 20 Jaꞌ tinaniꞌ xin, jaach jin Diosal, colon el yul skꞌabꞌ wan tuꞌ, yet watxꞌ masanil nacionlaj chi yotajne eloj tol asanne jaach tol Dios jaach, ẍi naj Ezequías.
21 Jix lawi tuꞌ xin, jix yalon naj Isaías tet Ezequías jaxca tiꞌ: Jaꞌ Jehová cu Diosal jaon Israel jon tiꞌ, jaꞌ jix alon jaxca tiꞌ: Tol jix wabꞌ ja txa jix ja wal ey jin yu naj Senaquerib sreyal Asiria, ẍi.
22 Yu jun tuꞌ, jix yal Jehová wan kꞌane yin naj sreyal Asiria jaxca tiꞌ:
Jaach Senaquerib, jaꞌ ebꞌ ix kꞌopo ix a Sión, oj tzee ebꞌ ix ja win, yutol cꞌam niꞌoj ja weloc apnoj yul sat ebꞌ ix. Yetoj cꞌal pax ebꞌ a Jerusalén oj bꞌuchwa ebꞌ ja win, oj a txꞌumna ebꞌ yet oj jaach meltzo ja wintaj.
23 ¿Mactxequel bꞌey jix jaach bꞌuchwa cꞌal ja walon pena kꞌane? ¿Mac yin bꞌey miman jix ja wute yul ja nukꞌ, catuꞌ tol eyxa smey jix ja wute ja sat yin? Jaꞌton win jain sDiosal jin Israel tol Asanne jin Ocoj.
24 Jix ja walon tet ebꞌ ja wakꞌomal servil tol chi yal pena kꞌane ebꞌ win jaxca tiꞌ: Yetoj wal jin carruaje yet jowal tol miman sbꞌisil tiꞌ, jix jin atoj bꞌey sjolomlaj wonan, cꞌal bꞌey yinlaj scꞌul txꞌotxꞌ wonan Líbano. Jix jin kꞌajtoj teꞌ kꞌuteꞌ mimej steel, yetoj teꞌ ta manxa jantajoj swatxꞌil yili. Jix jin aapnoj bꞌey sjolomlaj wonan yel xacꞌal naat eyaoj, yetoj cꞌal bꞌey txꞌotxꞌ mimej eltzabꞌ laan yili jaxca junoj bꞌocꞌan teꞌ awbꞌeal teꞌ.
25 Jaꞌ bꞌey txꞌoj conobꞌal jix jin jot jaꞌ ucꞌbꞌal jaꞌ bꞌey jix wucꞌ jaꞌ. Jix jin ecꞌ cꞌaltoj yul-laj jaꞌ jaꞌ bꞌey Egipto, jaxca tol jix tantoj jaꞌ jaꞌ, ja chi.
26 ¿Tumi cꞌam bꞌey cha wabꞌ yal-lei tol jain Jehová jin jix jin naꞌbꞌalne el wan tzetyetal tuꞌ? Yet tax cꞌal peyxa jix jin naꞌbꞌalne eloj, tol queytuꞌ oj yunne; yuxan jaꞌ tinaniꞌ jix yiꞌ sbꞌa masanil. Yu jun tuꞌ, yuxan cha wakꞌ lawoj ey conobꞌlaj tol watxꞌ yeoc smuroal, tuxa cꞌal chi a can bꞌulan spoꞌoilal ja wu.
27 Jaꞌ masanil ebꞌ ánima caan bꞌey wan conobꞌ tuꞌ, caw chi xiw ebꞌ, catuꞌ chi qꞌuixwi can a ebꞌ. Laan xacꞌal jix yun can ebꞌ jaxca an cꞌultaj, cꞌal an ita caw yaax latzꞌinaj chi chꞌibꞌa yibꞌanlaj na, tol chi tajtoj an yu kaꞌeꞌ.
28 Wotaj cꞌal bꞌey chach eqꞌui, cꞌal tzet cha wunne. Wotaj tol jix tit ja jowal win.
29 Yutol wotaj sjowal ja cꞌul, cꞌal ja chꞌaanil, yuxan jaxca tol oj waoc junoj chꞌen slocxomal yin ja txaam, cꞌal junoj chꞌen freno yin ja tiꞌ, catuꞌ oj jaach wiꞌon meltzo yul bꞌe bꞌey jix kaꞌ ja tita, ẍi Dios, ẍi Isaías.
30 Jix lawi tuꞌ xin, jix yalon Isaías tet Ezequías jaxca tiꞌ:
Jaꞌ yet jun abꞌil tiꞌ, cꞌal yet junxa abꞌil oj je loꞌ ixim tiriw tol tucꞌal oj yakꞌ chꞌibꞌ sbꞌa, jaxa yet yox abꞌil xin, oj xa skeꞌ je yawon je yet. Jaxa je yambꞌan a sat je yawo tuꞌ; oj je yawon teꞌ uva, catuꞌ oj je loꞌon sat teꞌ.
31 Jaꞌ jaywanoj jex iquisto ecꞌ bꞌey Judá tiꞌ, laan oj je yun jaxca junoj awo chi too xeꞌ yul txꞌotxꞌ, tol yin eymanil chi yun satni eloj.
32 Yutol jaꞌ ebꞌ oj to cancan bꞌey Jerusalén, jaꞌton ebꞌ oj colcha can el bꞌey wonan Sión, oj noel yul jun nación tiꞌ yu ebꞌ. Jaxca ton tuꞌ, oj yunne, yu xꞌoxon el scamcꞌulal Jehová ey jex.
33 Jal pax yin sreyal Asiria xin, jix yal Jehová jaxca tiꞌ:
Man oj octoj yul conobꞌ Jerusalén, tam wal oj skeꞌ yaontoj junoj sjulbꞌal. Man oj skeꞌ yakꞌon jowal yin, tam wal oj swaꞌne a swalubꞌ bꞌey yinlaj smuroal conobꞌ tiꞌ.
34 Jain Jehová jin chi walaꞌ. Jaꞌ yul bꞌe bꞌey jix tita, jacꞌal tuꞌ oj meltzo paxtoj. Man oj skeꞌ yoc bꞌey jun conobꞌ tiꞌ.
35 Jain oj jin teyne jun conobꞌ tiꞌ, catuꞌ oj jin colon eloj, yutol ey jin camcꞌulal yin jin chejabꞌ David, ẍi Dios, ẍi naj Isaías.
36 Jaꞌ yet jun akꞌbꞌalil tuꞌ, jix makꞌle can 185,000 ebꞌ soldado bꞌey bꞌulan ey ebꞌ a Asiria tuꞌ yu jun yángel Jehová. Jaxa yet jix kꞌinibꞌi a yet junxa cꞌual, camnajxa ey ebꞌ soldado tuꞌ masanil. 37 Yu jun tuꞌ xin, jaꞌ naj Senaquerib sreyal Asiria, jix yuchey skꞌap na bꞌey bꞌulan ey ebꞌ tuꞌ, jix meltzotoj bꞌey conobꞌ Nínive, jaꞌ tituꞌ jix caey ecꞌoj. 38 Ey jun cꞌual, jix too naj txaloj bꞌey stemplo sdiosal chi yij Nisroc, ey cawan scꞌaal chi yij sbꞌi Adramélec cꞌal Sarézer, jaꞌ ebꞌ jix makꞌon cam tituꞌ. Jix lawi tuꞌ, jix el ebꞌ, jix toocan ebꞌ yul yet Ararat. Jaxa jun scꞌaal chi yij Esarhadón, jix oc can sqꞌuexeloj yin reyal.