—Alwej tet naj Ezequías wan skꞌane naj sreyal Asiria, tol bꞌinabꞌil tuꞌ. Chi yal naj jaxca tiꞌ: ¿Tzet eyoc yipoj ja cꞌul? 5 Chim ja naꞌ tol ey ja jelanilal, cꞌal ja wipalil yin ja wakꞌon jowal, ma tucꞌal cha walaꞌ. ¿Mactxequel cha waoc yipoj ja cꞌul, yuxan cha woche cha wakꞌ jowal wetoj an? 6 Jix wilaꞌ tol jaꞌ conobꞌ Egipto cha waoc yipoj ja cꞌul. Watxꞌ toni, yutol jaꞌ Egipto tuꞌ, laan jaxca junoj teꞌ aa poꞌonajtoj. Ta ey junoj mactxequel chi oc mitxꞌan yin, palan xacꞌal stoo teꞌ yul skꞌabꞌ. Queywal tuꞌ yeoc naj sreyal Egipto tuꞌ tet mactxequel tol eyoc yipoj scꞌul. 7 Ta che yal ey jin jaxca tiꞌ: Jaꞌ Jehová cu Diosal chi kaoc yipoj cu cꞌul, je chi, ilaꞌ tol jix yakꞌ sowalil naj Ezequías yu wan yet xaambꞌal bꞌey wan tzalquiltaj txꞌotxꞌ bꞌey chi oc ebꞌ ánima yin eyilal tet jun je Diosal tuꞌ. Jix yaloni tol junxane jun yet xaambꞌal bꞌey chi oc ebꞌ a Judá, cꞌal ebꞌ a Jerusalén yin eyilal. 8 Jaꞌ tinaniꞌ xin, chi wal ey jex, tol che waꞌnewej junoj je wa kꞌane yetoj naj ey jin ẍejabꞌ tiꞌ: Jaꞌton naj sreyal Asiria. Ta jaxca tuꞌ, chi skeꞌ wakꞌon junoj 2,000 noꞌ che ey jaach, ¿Tumi oj tzꞌajna pax ebꞌ soldado chi a yibꞌan noꞌ che tuꞌ je yu? 9 Yu jun tuꞌ, ¿Tumi oj skeꞌ je tecꞌbꞌan je bꞌa sattaj junoj bꞌulan ebꞌ soldado a Asiria tiꞌ, catuꞌ chito wal ja waloni tol jaꞌ ebꞌ a Egipto oj skeꞌ yakꞌon che, cꞌal carruaje yet jowal ey jaach? 10 Yetoj cꞌal pax oj, ¿Tumi taꞌ yul wet yuxan chi jul wakꞌ lawoj jun nación tiꞌ? Yutol jaꞌ Jehová eyoc wetoj. Jaꞌ Naj jix jin chejontej yin jul wakꞌon lawoj eyoj, ẍi naj rey, ẍi naj syaawil ebꞌ soldado tuꞌ.

11 Catuꞌ jix takꞌwi naj Eliaquim, cꞌal Sebná, cꞌal Joah tet naj syaawil ebꞌ soldado tuꞌ jaxca tiꞌ:

—Yuwal dios ey jaach, jaꞌ ojabꞌ yin Arameo chach kꞌanabꞌi, yutol jaon tiꞌ jon chi kabꞌ jun tiꞌe tuꞌ. Cꞌam ojabꞌ chach kꞌanabꞌ yin Hebreo ey jon, yutol jaꞌ masanil ebꞌ ánima eyatoj bꞌey yibꞌan smuroal conobꞌ tiꞌ, lalan yabꞌen masanil ebꞌ, ẍi ebꞌ.

12 Catuꞌ jix takꞌwi jun syaawil ebꞌ soldado yet Asiria tuꞌ, jix yalon jaxca tiꞌ:

—Man asanne oj tet naj je yaawil, tam wal asanne ey jex jix jin chejletej jul walaꞌ. Cꞌamaj; yutol jaꞌ naj sreyal Asiria jix jin chejontej yu jul walon tet ebꞌ ánima lalan yabꞌen bꞌey yibꞌanlaj smuroal conobꞌ tiꞌ, yutol jaꞌjun ebꞌ locan je yetoj, caw oj je loꞌ je tzaꞌ, cꞌal je yuqꞌuen je txul yetoj ebꞌ, ẍi naj.

13 Yu jun tuꞌ xin, jix a linan naj syaawil ebꞌ soldado tuꞌ, jix a yaw yin ipeal, jix kꞌanabꞌ yin Hebreo:

—Chi cam wal je yabꞌen tzetyetal chi yal naj rey tol bꞌinabꞌil, jaꞌton naj sreyal Asiria: 14 Cꞌam ojabꞌ che yakꞌ je bꞌa etnele yu naj Ezequías, yutol jaꞌ jun tuꞌ ma skeꞌ jex scolon eloj, ẍi naj rey. 15 Ta tol chi yoche naj Ezequías tuꞌ chi yakꞌ je cꞌul oj, tol asan yin Jehová che yaoc je cꞌul, catuꞌ chi yalon ey jex jaxca tiꞌ: Caw yel jaꞌ Jehová oj jon colon eloj, man oj ẍaꞌ eyqꞌuey jun cu conobꞌ tiꞌ yul skꞌabꞌ naj sreyal Asiria, ta ẍi, 16 cꞌam ojabꞌ che chaꞌ je yabꞌe, yutol jaꞌ naj sreyal Asiria jix jin chejontej, yet chi jul walon ey jex tol chex oc yin watxꞌcꞌulal yetoj naj, catuꞌ che yaon oc je bꞌa yul skꞌabꞌ, yet watxꞌ oj je loꞌ sat je yuva, cꞌal je loꞌon sat je yigo, cꞌal je yuqꞌuen je yucꞌbꞌal jaꞌ waꞌnebꞌil je yu. 17 Oj lawoj tuꞌ, catuꞌ oj jex yiꞌontoj bꞌey junxa txꞌotxꞌ laan yili jaxca txꞌotxꞌ je yet tiꞌ, tol chi skeꞌ ixim tiriw cꞌal uva, yet watxꞌ oj je waꞌne je pan cꞌal je vino oj je yuqꞌueꞌ. 18 Ta tol oj yal naj Ezequías ey jex, tol jaꞌ Jehová oj jex colon eloj, cꞌam ojabꞌ che yakꞌ etnele je bꞌa yu. ¿Tumi ey junoj wan sdiosal wanxa conobꞌlaj tuꞌ jix skeꞌ yu scolon el sconobꞌ yul skꞌabꞌ naj sreyal Asiria tuꞌ? 19 ¿Bꞌeytuꞌ eyoc sdiosal conobꞌ Hamat, cꞌal yet conobꞌ Arpad? ¿Bꞌeytuꞌ eyoc sdiosal conobꞌ Sefarvaim? Tumi taꞌ ey junoj jix colon el conobꞌ Samaria yul skꞌabꞌ naj sreyal Asiria. 20 ¿Mactxequel junoj wan sdiosal wan nación tuꞌ jix skeꞌ yu scolon el sconobꞌ yul skꞌabꞌ naj sreyal Asiria tuꞌ? ¿Tzet yu, yuxan che naꞌ tol jaꞌ Jehová oj skeꞌ scolon el Jerusalén tiꞌ yul skꞌabꞌ naj? ẍi naj syaawil ebꞌ soldado tuꞌ.

21 Tzꞌin xacꞌal ẍi masanil ebꞌ conobꞌ tuꞌ, cꞌamxa cꞌal junoj bꞌelan kꞌane jix yal ebꞌ, yutol jix yal naj rey Ezequías tet ebꞌ tol cꞌam chi spajtze junoj kꞌane ebꞌ. 22 Caw wal jix tac el scꞌul naj Eliaquim yetoj naj Sebná, cꞌal yetoj Joah. Jix stzilontoj stiꞌlaj spichil ebꞌ yu bꞌiscꞌulal, jix meltzotoj ebꞌ yalon tet naj Ezequías masanil tzetyetal jix yal naj syaawil ebꞌ soldado a Asiria tuꞌ.