2 Jaꞌ bꞌey txꞌotxꞌ cusiltaj txꞌotxꞌ, ey ojabꞌ xumac an cꞌultaj jaxca an kꞌoyol, ey ojabꞌ stzalacꞌulal masanil, el ojabꞌ leeoj chi yilaꞌ. Jaꞌ Dios oj waꞌnen oc sicꞌlebꞌil jaxca swatxꞌil yili txꞌotxꞌ Líbano, tol oj yaaxbꞌoj sat txꞌotxꞌ sicꞌlebꞌil jaxca txꞌotxꞌ wonan Carmelo, quey cꞌal pax tuꞌ oj yun txꞌotxꞌ yacꞌalil Sarón. Masanil ebꞌ ánima oj ilon yin smimanbꞌilal cꞌal yipalil Jehová cu Diosal.

3 Akꞌwej stecꞌanil ebꞌ cꞌamto sjelanil snaꞌbꞌal, iptzewej ebꞌ jaxca tol sicbꞌinaj el yajan.

4 Che yalonwej tet ebꞌ chi yakꞌ caabꞌcꞌulal jaxca tiꞌ: Tecꞌbꞌawej je bꞌa, cꞌam ojabꞌ chex xiwi, tol ey cꞌal ecꞌ Naj cu Diosal ketoj, jaꞌ Naj chi cu colon eloj, catuꞌ chi skeꞌ yaon oc syaꞌilal yibꞌan ebꞌ chi jowi oc je yin, je chi tet ebꞌ.

5 Queyton wal tuꞌ bꞌian, oj skeꞌ yilwan a ebꞌ cꞌam chi skeꞌ yilwani, cꞌal ebꞌ chacan oj skeꞌ yabꞌen ebꞌ.

6 Jaꞌ ebꞌ cꞌam chi skeꞌ sbꞌeyi oj skeꞌ sbꞌey ebꞌ jaxca sbꞌey noꞌ scꞌultajil che, yetoj ebꞌ cꞌam chi skeꞌ skꞌanabꞌi oj bꞌitnoj a ebꞌ yu tzalacꞌulal. Yetoj cꞌal pax txꞌotxꞌ cusiltaj txꞌotxꞌ cꞌal jantaj txꞌotxꞌ caw sat, manxa jantajoj jaꞌ snukꞌ jaꞌ oj aoloj.

7 Jaꞌ bꞌey txꞌotxꞌ cusiltaj txꞌotxꞌ, naabꞌ jaꞌ oj yun cantoj masanil, yuxan jaꞌ bꞌey txꞌotxꞌ caw sat, manxa jantajoj snukꞌ jaꞌ oj aoloj. Yuxan jaꞌ bꞌey caan ecꞌ noꞌ ooj tinaniꞌ, jaꞌ tituꞌ oj chꞌibꞌa teꞌ aa yetoj teꞌ waleꞌ.

8 Jaꞌ tituꞌ oj ecꞌtoj junoj miman bꞌe, jaꞌ sbꞌi oj yijaꞌ: Jun sbꞌe ebꞌ yet xa Dios. Jaꞌ ebꞌ man iꞌbꞌiloj el spenail yibꞌan cꞌal ebꞌ pena snaꞌbꞌal, man oj skeꞌ yecꞌ ebꞌ yul jun bꞌe tuꞌ.

9 Manxa oj apnoj oc noꞌ bꞌalam, tam wal wanojxa noꞌ noꞌ ey smey tituꞌ. Jaꞌ yul jun bꞌe tuꞌ oj ecꞌ ebꞌ colbꞌilxa el yu Jehová.

10 Jaꞌ mactxequel colbꞌilxa el yu Jehová, oj bꞌitnoj ebꞌ yin tzalacꞌulal yet oj apnoj oc ebꞌ bꞌey Sión. Jaꞌ tituꞌ oj caey ecꞌ ebꞌ yin tzalacꞌulal. Oj ilcha oc swatxꞌilal cꞌal tzalacꞌulal yu ebꞌ, jantaj wan syaꞌilal cꞌal okꞌilal, oj qꞌueycan el masanil.