2 Yutol jaꞌ Jehová, caw wal eytej sjowal scꞌul yin masanil nación, yetoj cꞌal yin masanil ebꞌ soldado akꞌom jowal. Tuxa jix snaꞌbꞌalne eloj tol oj yakꞌ lawoj eyoj, cꞌal yakꞌon cam masanil ebꞌ.

3 Tuxa cꞌal oj bꞌejlecan bꞌulan wan ebꞌ oj cam tuꞌ, caw oj a sabꞌ wan mimanile tuꞌ. Cajin xacꞌal oj yun can el sjolomlaj wonan yu chicꞌ.

4 Masanil xacꞌal tzetyetal ey bꞌey satcan oj lawoj eyoj, jaꞌ satcan oj qꞌueyaoj, jaxca junoj tzetyetal chi chul-le aoj. Oj tan skꞌakꞌal masanil weycan, jaxca xacꞌal chi yun stajtoj xaj an uva cꞌal teꞌ higo, catuꞌ chi pujeloj.

5 Jaꞌ yet oj lawoj skꞌanon yespada Jehová bꞌey satcan tuꞌ, catuꞌ oj yaon cꞌal pax tej yibꞌan Edom, yutol jaꞌ jun conobꞌ tuꞌ, tuxa jix ale oc camich yibꞌan.

6 Oj bꞌonchatoj chꞌen yespada Jehová yu chicꞌ cꞌal yetoj ẍepuꞌ, jaxca chi yuntoj chꞌen nawax yet chi makꞌle cam noꞌ meꞌ, cꞌal noꞌ chiw chi akꞌle yin xaambꞌal. Jaꞌ bꞌey conobꞌ Bosrá oj swaꞌne jun yet xaambꞌal Jehová, caw wal miman ebꞌ a Edom tuꞌ oj camoj.

7 Caw oj eyqꞌuey ebꞌ icham winaj cꞌal ebꞌ achꞌe, jaxca chi yun yeyqꞌuey noꞌ xol-laj teꞌal wacax, noꞌ achꞌe wacax, cꞌal yetoj noꞌ icham wacax caw jow. Oj majcha el sat txꞌotxꞌ txꞌotxꞌ tiꞌ yu ẍiqꞌuil ebꞌ, oj tojcan ẍepuꞌal ebꞌ xol spojojal txꞌotxꞌ txꞌotxꞌ.

8 Jaꞌton yet jun cꞌual tuꞌ, oj yakꞌ spajtzebꞌal Jehová tet ebꞌ a Edom. Jaꞌ yet jun abꞌil tuꞌ, oj yiꞌecꞌ sjowal scꞌul yu tzet jix utele conobꞌ Jerusalén yu ebꞌ.

9 Jaꞌ masanil jaꞌ jaꞌ chi bꞌey yul-laj sjobꞌeal Edom, oj oc can jaꞌ yin asfaltoal, jaxa masanil txꞌotxꞌ pojoj, oj oc can yin azufreal, jaꞌ txꞌotxꞌ tuꞌ tuxa cꞌal oj nilxo kꞌakꞌ yin.

10 Manxa oj tan skꞌakꞌal yet chi ecꞌ cꞌu, cꞌal yet chi ecꞌ akꞌbꞌal. Caw oj a smucꞌal, oj bꞌejlecanoj, cꞌamxa junoj mactxequel oj skeꞌ yecꞌabꞌ tituꞌ.

11 Jaꞌ tituꞌ oj eyecꞌ noꞌ tonton, yetoj cꞌal noꞌ utxum, oj swaꞌne sweyubꞌ noꞌ joo. Tzꞌinini xacꞌal oj yun can jun conobꞌ tuꞌ yu Jehová.

12 Cꞌamxa bꞌakꞌin oj oc junojxa rey yet chi yakꞌon yaawil yibꞌan. Masanil ebꞌ yaaw oj qꞌueyle can el ebꞌ.

13 Jaxa cꞌal teꞌ qꞌuix oj chꞌibꞌa bꞌey spalacio ebꞌ yaaw, asanxane teꞌ saj qꞌuix oj chꞌibꞌa bꞌey scuartel ebꞌ. Asanxane noꞌ mimej ooj, oj eecꞌ tituꞌ yetoj cꞌal pax noꞌ tonton.

14 Junne xacꞌal oj eyecꞌ noꞌ waax yetoj noꞌ ooj, yetoj cꞌal pax noꞌ xol-laj teꞌal chiw; tuxa cꞌal oj yawtele sbꞌa noꞌ. Jaꞌ tituꞌ oj eecꞌ ebꞌ chi xibꞌten ánima yet akꞌbꞌalil, jaxa cꞌal tituꞌ oj xew ebꞌ.

15 Jaꞌ tituꞌ oj swaꞌne sweyubꞌ noꞌ tonton, oj yaey sjos noꞌ, jaxa yeltej yuneꞌ noꞌ tuꞌ. Oj syambꞌa sbꞌa noꞌ tituꞌ yin junjun moan. Jaꞌ tituꞌ oj syambꞌa cꞌal pax sbꞌa noꞌ miij, junjun noꞌ txutxe yetoj junjun noꞌ mame.

16 Kꞌanlewej je yabꞌ tzet ẍi an slibro Jehová, catuꞌ ilwej tzet chi yal an: Jaꞌ masanil wan noꞌ noꞌ chi bꞌina tituꞌ, cꞌam junoj noꞌ tol man eyoj ecꞌ tituꞌ. Cꞌam junoj noꞌ txutxe tol man eyoj ecꞌ yetoj noꞌ mame; yutol jaꞌ Jehová jix naꞌoni tol queytuꞌ oj yun jaxca tuꞌ. Jaꞌ Yespíritu Dios oj yambꞌan oc masanil noꞌ noꞌ.

17 Junjun cꞌal noꞌ noꞌ, txequel bꞌey oj eyecꞌoj; jaꞌcaw Dios oj txꞌoxon can tet junjun noꞌ bꞌey oj eyecꞌoj. Jaꞌ tituꞌ oj eecꞌ noꞌ yin junelne.