2 Jaach Jehová jin Diosal, okꞌ ojabꞌ wal ja cꞌul kin jon, tol ey jaach oc yipoj cu cꞌul jon. Ocan cꞌal ketoj junjun cꞌu. Jaꞌ yet ey syaꞌtajilal, colon cꞌal eloj.

3 Jaꞌ yet chi yabꞌen ebꞌ conobꞌ chi jowi oc ja win, tol chi jul jowal yibꞌan ebꞌ, yu ja waon oc syaꞌilal yibꞌan ebꞌ, sajleminaj xacꞌal chi yun yela ebꞌ mimej conobꞌ.

4 Jaxca chi yun sqꞌueyon el awo noꞌ kochiꞌ noꞌ, queywal tuꞌ oj yun yiꞌle ecꞌ sbꞌeomal ebꞌ conobꞌ chi jowi oc tuꞌ.

5 Jaach Jehová jin Diosal, tol miman ja weloc apnoj, jatuꞌ caan jaach bꞌey satcan, jaach oj ja wijbꞌa ebꞌ a Sión yin swatxꞌil cꞌal yin sjichanil.

6 Oj ja wakꞌ stecꞌanil ebꞌ a Sión tuꞌ. Jaꞌ jelanil cꞌal naꞌbꞌale oj yakꞌ Dios, jaꞌ oj oc scolbꞌaniloj ebꞌ; jal jijemal tet Jehová, jaxca tol oj oc sbꞌeomal oj ebꞌ.

7 Abꞌwej yel yaw ebꞌ soldado bꞌey yul-laj calle yu xiwcꞌulal. Abꞌwej wal yokꞌ ebꞌ chejbꞌiltoj yaon oc watxꞌcꞌulal.

8 Jaꞌ wan bꞌe jix cancan tzꞌinanoj, cꞌamxa mac chi ecꞌabꞌ yul yu xiwcꞌulal. Jix etex el jun swa kꞌane ebꞌ Asirio yalnaj canoj. Jix intajnele el ebꞌ jix alon can jun wa kꞌane tuꞌ, yutol cꞌam mactxequel tol miman yeloc apnoj yul sat ebꞌ.

9 Jix cuscan a txꞌotxꞌ Israel, jix etex cantoj yili. Jix qꞌuixwi can a txꞌotxꞌ Líbano, yutol jix kꞌajle a steꞌal sat txꞌotxꞌ. Jaꞌ Sarón cusiltaj txꞌotxꞌ xacꞌal jix yun cantoj, jaꞌ txꞌotxꞌ Basán, cꞌal txꞌotxꞌ wonan Carmelo jix cancan tꞌiranoj.

10 Yu jun tuꞌ xin, chi yal Jehová tet ebꞌ conobꞌlaj jaxca tiꞌ: Jaꞌ tinaniꞌ xin, oj jin a waanoj, tol oj jin txꞌox masanil jin mimanbꞌilal.

11 Jaꞌ tzetyetal jix je naꞌbꞌalne eloj, cꞌal tzetyetal jix je waꞌne, naꞌbꞌa kꞌalem cꞌal eloj. Oj jin xutoj jin kaꞌeꞌ yalan, catuꞌ oj stzꞌaꞌcantoj masanil.

12 Taan xacꞌal oj yun cantoj junjun conobꞌ, oj chaw skꞌakꞌal jaxca chi yun ẍaw skꞌakꞌal teꞌ tajin qꞌuix.

13 Mac jex naat ey jex, cꞌal jex cawil ey jex, ilwej ton abꞌ xin, jantaj tzetyetal tuxa jix wunne. Chi cam je yotajnen eloj tol chi cꞌal skeꞌ wu masanil, ẍi Jehová.

14 Jaꞌ ebꞌ penawom, jix qꞌueya scꞌul ebꞌ bꞌey Sión, jaꞌ ebꞌ cꞌam yeloc apnoj Dios yul sat, caw chi xiw ebꞌ. Chi yalon ebꞌ jaxca tiꞌ: ¿Mac junoj jon oj skeꞌ cu caey ecꞌ snan xol jun kꞌakꞌ chi akꞌon lawoj el masanil tzetyetal, jaꞌton jun kꞌakꞌ chi nilxi masanil tiempo? ẍi ebꞌ.

15 Jaꞌ ebꞌ chi bꞌeybꞌalnen sjichanil, ebꞌ yel cꞌal tzet chi yalaꞌ, ebꞌ cꞌam chi yal scꞌul chi oc bꞌeomal yu ẍaꞌon tumin yin ewantajil, ebꞌ cꞌam chi yaltoj yet yin makꞌo cam ánima, jaꞌton ebꞌ chi yiꞌel sbꞌa xol spenail,

16 jaꞌ ebꞌ tuꞌ, oj caey ecꞌ bꞌey junoj conobꞌ tol chꞌen cꞌal eyoc yin smuroal, catuꞌ ey cꞌal sloꞌbꞌe ebꞌ, ey cꞌal pax tzet chi yucꞌ ebꞌ.

17 Jex a Sión, oj je yil yin jun cu reyal yetoj stzejejial, caw naat oj apnoj oc ian yakꞌon yaawilal.

18 Jaꞌ yet oj je naꞌontej je xiwcꞌulal yet yalantoj, oj mi je yal jaxca tiꞌ: ¿Bꞌeytuꞌ ey naj txꞌoj conobꞌal chi kꞌanon el toolabꞌal? ¿Bꞌeytuꞌ ey naj chi bꞌison jantaj yalil echbꞌal? ¿Bꞌeytuꞌ ey naj chi bꞌison chꞌen storreal yu snaꞌlei jantaj sbꞌeomal cu conobꞌ? je chi, oj je yaloni.

19 Cꞌamxa bꞌakꞌin oj je yil yin ebꞌ txꞌoj conobꞌal chi xij yal junoj comon kꞌane, ebꞌ ánima txꞌoj skꞌanabꞌi, cꞌam chi naꞌcha el stiꞌ ebꞌ je yu.

20 Oj je yilwej yin Sión, jun conobꞌ tol yet cu kꞌin yeocoj, jaꞌton Jerusalén, jaꞌton jun conobꞌ cꞌam tzet chi snaꞌ. Cꞌam bꞌakꞌin oj qꞌuexle ecꞌoj; jaxca junoj kꞌap na tol man oj jokꞌle atej yestacail, tam wal oj tꞌincha junoj xꞌanil.

21 Jaꞌ tituꞌ oj xꞌox sbꞌa Jehová yetoj yipalil cu xol. Caw ey jaꞌ mimej jaꞌ oj ecꞌ leeoj tituꞌ. Jaꞌ xol jaꞌ tuꞌ, man oj skeꞌ yoctej ebꞌ pena snaꞌbꞌal yetoj sbarco yet chi yakꞌon jowal ebꞌ ketoj.

22-23 Jaꞌ xꞌanil wan barco tuꞌ, man oj tokꞌle cawbꞌoj yin yoyal, cꞌamxa bꞌey oj yiꞌ yip xꞌanil scaabꞌ paqꞌuil. Oj poꞌole can ecꞌ jantaj stzetyetal ebꞌ cu cajat tuꞌ cu xol, tol tax jaꞌjun ebꞌ koxoꞌ oj yiꞌ niꞌoj yet, yutol jaꞌ Jehová oj jon colon eloj. Jaꞌcaw Naj eyoc cu juezaloj, jaꞌ chi waꞌnen cu leyal, catuꞌ cu reyal yeocoj.

24 Cꞌam junoj caan bꞌey Jerusalén tuꞌ oj alon jaxca tiꞌ: Yaꞌ jin ey jain tiꞌ, man ẍi oj ebꞌ. Jaꞌ ebꞌ caan bꞌey jun conobꞌ tuꞌ, oj akꞌle tan spenail ebꞌ.