Jaꞌ Naj Rey Yet Sjichanil
32
Ey jun naj rey oj juloj, catuꞌ oj yakꞌ yaawilal yin watxꞌ,cꞌal yin sjichanil, ey ebꞌ yaaw eyoc yalan ẍejbꞌanil naj rey, tol watxꞌ oj yun yakꞌon yaawil yin sjichanil.
2 Junjun ebꞌ, jaxca wal enele yeoc ebꞌ tet kaꞌeꞌ, cꞌal enele tet cajxuchum, jaxca sbꞌe jaꞌ jaꞌ bꞌey tajin txꞌotxꞌ, ma jaxca yenel junoj miman chꞌen bꞌey tajin txꞌotxꞌ.
3 Jaꞌ masanil ebꞌ tol chi skeꞌ yilwani cꞌal yabꞌeni, oj cam yilon ebꞌ cꞌal yabꞌen skꞌane Dios ebꞌ.
4 Jaꞌ mactxequel somchanajtoj snaꞌbꞌal, caw jelanxa oj eloc snaꞌbꞌal ebꞌ. Jaꞌ mactxequel man jelanoj skꞌanabꞌ yet yalantoj, jaxa oj yunne, caw jelanxa oj yun skꞌanabꞌ ebꞌ.
5 Jaꞌ junoj cꞌam snaꞌbꞌal manxa oj al-leoj tol watxꞌ, jaxa pax junoj chi yiꞌeytej sat yet animail, manxa oj al-leoj tol ey yeloc apnoj.
6 Yutol jaꞌ ebꞌ chi yiꞌeytej sat yet animail tuꞌ, asan kꞌane cꞌam yeloc apnoj chi yalaꞌ. Jaꞌ yin snaꞌbꞌal ebꞌ, asan spenail chi snaꞌ, yet watxꞌ chi yun tzetyetal ey sowalil. Chi yalon pena kꞌane yin Jehová, cꞌam chi colwa tet ebꞌ ey swail cꞌal tet ebꞌ ey stajin tiꞌal.
7 Jaꞌ ebꞌ chi ecꞌ yibꞌan, chi yiꞌ yip ebꞌ yu scuyo tol pena, catuꞌ chi snaꞌon a yalon tzetyetal tol pena. Chi etex ebꞌ mebꞌa yu slekꞌtiꞌal ebꞌ tuꞌ, yet chi yochen ebꞌ chi waꞌxi yeoc junoj jowal xol ebꞌ.
8 Jal pax ebꞌ jobꞌan yel tzetyetal yu xin, asan cꞌal saꞌon tzetyetal ebꞌ naꞌan yu, jaꞌ yu tzet jobꞌan yel yu ebꞌ tuꞌ, oj yiꞌ yip ebꞌ.
Tenchebꞌal Tet Ebꞌ Ix Ix A Jerusalén
9 Jal jex jaex ix jex tiꞌ, tol isa jex, jex tol cꞌam cꞌal tzet che naꞌ. Abꞌwej tzet oj wal ey jex.
10 Cꞌam tzet che naꞌ je yalon tinaniꞌ; asan xin, yet cꞌal junxa abꞌil tinaniꞌ oj jex bꞌilwoj aoj, yutol cꞌamxa kꞌupo tiriw, cꞌamxa sat an uva oj yambꞌale aoj.
11 Jaxa jex cꞌam tzet che naꞌ tinaniꞌ, xiwanwej xin, iꞌwej el wan je watxꞌ pichil tuꞌ. Awej oc an eel pichile, yu je txꞌoxon eloj tol ey jex oc yin syaꞌilal.
12 Txꞌoxwej el je cuscꞌulal tuꞌ, yutol oj etex el je txꞌotxꞌ bꞌey caw watxꞌ jix yun ẍꞌibꞌ je yuva.
13 Yutol asan cꞌal teꞌ qꞌuix cꞌal an cꞌultaj chi chꞌibꞌa yul cu conobꞌwej tiꞌ, cꞌal yul-laj wan mimej na bꞌey chi oc kꞌin yet tzalacꞌulal.
14 Jaꞌ sdespacho ebꞌ mimej yaaw, cusiltaj xacꞌal oj yun cantoj, yutol oj qꞌueycan el ebꞌ ánima yaman oc bꞌey yul conobꞌ. Jaꞌ wan je conobꞌ eyoc smuroal, oj oc can sweyubꞌoj noꞌ xol-laj teꞌal noꞌ. Jaꞌ tituꞌ oj xew noꞌ xol-laj teꞌal bꞌuru yin tzalacꞌulal, cꞌal slow noꞌ wacax cꞌal noꞌ meꞌ.
15 Queytuꞌ oj yunne, masantaꞌcꞌal oj jul Yespíritu Dios kin junelxa, catuꞌ oj yaaxbꞌoj sat txꞌotxꞌ cusiltaj txꞌotxꞌ junelxa, oj yute can oc sbꞌa yin yaax txꞌotxꞌal; jaꞌ jun yaax txꞌotxꞌ tuꞌ, miman sat awo oj yakꞌ sat.
16 Jaxa bꞌey masanil yul yibꞌankꞌinal tiꞌ, oj bꞌeybꞌalnele sjichanil, cꞌal watxꞌcꞌulal.
17 Yu cꞌal tol oj sbꞌeybꞌalne sjichanil ebꞌ, yuxan ey watxꞌcꞌulal, ey tzalacꞌulal, cꞌal camcꞌulal.
18 Oj caey ecꞌ ebꞌ jin conobꞌ yin watxꞌcꞌulal, oj yakꞌ tzalabꞌoj scꞌul ebꞌ.
19 Caxcꞌal oj eyqꞌuey teꞌ mimej teꞌ yu sajbꞌat, catuꞌ oj qꞌueyle el ebꞌ conobꞌ,
20 watxꞌ je yet mac jex chex awwi jinat bꞌey stiꞌlaj jaꞌ jaꞌ, catuꞌ colan bꞌey chi low noꞌ je wacax, cꞌal noꞌ je bꞌuru.