Okꞌbꞌal Cꞌul Ebꞌ Chi Sey Scolwal Bꞌey Egipto
31
Okꞌbꞌal cꞌul jex chi too je seyecꞌ je colbꞌanil bꞌey Egipto.Jaꞌ ebꞌ soldado yetoj ẍe ebꞌ cꞌal scarruaje yet jowal tol miman sbꞌisil, jaꞌ che yaoc yipoj je cꞌul; cꞌam pax che yaoc niꞌoj je cꞌul yin Jehová, jaꞌton jun Dios Tol Asanxane Ocoj.
2 Jaꞌ Dios caw jelan toni, chi skeꞌ yaontej syaꞌilal je yibꞌan yu spenail che yunne. Cꞌam chi ecꞌtoj tzet chi yal can el je yibꞌan, cꞌal yibꞌan ebꞌ chi stzꞌaj colwa sbꞌa je yetoj tuꞌ.
3 Jaꞌ ebꞌ a Egipto ánima cꞌal ebꞌ, catuꞌ man dios oj ebꞌ. Jaꞌ ẍe ebꞌ, noꞌ cꞌaltaꞌ noꞌ, man espíritu oj noꞌ. Yu jun tuꞌ xin, jaꞌ yet oj yiꞌon a skꞌabꞌ Jehová, oj eyqꞌuey ebꞌ colwawom tuꞌ, catuꞌ oj eyqꞌuey pax ebꞌ chi col-le eloj, junne oj yun scam ebꞌ.
4 Yutol jaꞌ Jehová Naj Yaaw yin masanil jix alon ey jin jaxca tiꞌ: Jaxca wal yel yaw noꞌ bꞌalam yin junoj meꞌ tuxa jix michꞌcha ey yu, catuꞌ chi joymo oc ebꞌ ilom meꞌ yin noꞌ, tumi oj el noꞌ yet chi el yaw ebꞌ yin xibꞌteni. Quey jin ton wal tuꞌ, cꞌam mactxequel chi skeꞌ jin stenon oc tucan yet chin eyol jul wakꞌon jowal bꞌey wonan Sión.
5 Jaxca wal noꞌ tzꞌiquin chi steyne yuneꞌ, chi ecꞌ jupupoj yibꞌan sweyubꞌ, queywal tuꞌ oj wute jin teynen jin conobꞌ Jerusalén, oj jin teyne, oj jin colon can el ebꞌ, ẍi Dios.
6 Jex conobꞌ Israel, meltzaanwej tet Naj mac bꞌey pit jix je yute je bꞌa.
7 Yutol ey jun cꞌual oj juloj, tol je masanil oj je kꞌojcan el yechel wan comon dios tol plata, cꞌal oro tol jix je waꞌne yu je yecꞌnajilal.
8 Oj eyqꞌuey Asiria yu chꞌen espada, man ánima oj jun oj unen jaxca tuꞌ yetoj sjelanil. Jaꞌ jun jowal tuꞌ oj ujten el ebꞌ conobꞌ Asiria, jaxa ebꞌ achꞌe oj tojcan ebꞌ yin yakꞌomaloj servilal.
9 Yu wal xiwcꞌulal, yuxan oj ela ebꞌ scapitán ebꞌ soldado, oj sbꞌejcan sbandera ebꞌ. Jaꞌ Jehová chi alon jun tiꞌ, Naj ey skꞌakꞌal bꞌey wonan Sión, jaꞌ skꞌakꞌal sjowal scꞌul chi chaw bꞌey Jerusalén, jaꞌ oj aon oc syaꞌilal yin ebꞌ scajat.