Tenchebꞌal Yin Ebꞌ Chi Yoche Chi Scol Sbꞌa Bꞌey Egipto
30
Jix yal Jehová jaxca tiꞌ:Okꞌbꞌal cꞌul ebꞌ ánima ecꞌnaj chi yute sbꞌa, ebꞌ tol miman tzet chi snaꞌ yul yet, cꞌam chi yal pax ebꞌ wabꞌe, comon cꞌal chi swaꞌne ey junoj wa kꞌane ebꞌ yul yet, man pax jain oj chi wakꞌ yun ebꞌ. Yu jun tuꞌ, yuxan chi jowbꞌi spenail yibꞌan ebꞌ.
2 Eyman chi too ebꞌ bꞌey Egipto, cꞌam chi yal ebꞌ ey jin. Jaꞌ yipalil naj sreyal Egipto tuꞌ chi yoche ebꞌ chi coloni, catuꞌ chi yaoc ebꞌ a Egipto tuꞌ yipoj scꞌul.
3 Jaꞌ scolwal naj Faraón sreyal Egipto, qꞌuixwiltaj xacꞌal oj yun canoj, jaꞌ scolwal Egipto oj yute can a sbꞌa yin yeynajil.
4 Caxcꞌal eyxatoj ebꞌ ẍejabꞌ ebꞌ bꞌey conobꞌ Soan, cꞌal bꞌey conobꞌ Hanés yul yet Egipto tuꞌ;
5 oj el sqꞌuixwil masanil ebꞌ yu jun conobꞌ tuꞌ, cꞌam tzet oj yiꞌ ebꞌ yin, tam wal ey colwal oj akꞌle tet ebꞌ. Jaꞌ tiꞌ yet ebꞌ, tol oj qꞌuixwoj a ebꞌ yu ebꞌ, ẍi Jehová.
6 Jaꞌ tzet yalnaj can Dios yin Egipto jaꞌton jaxca junoj noꞌ noꞌ ey yul yet txꞌotxꞌ Négueb: Chi ecꞌ el noꞌ bꞌey jun sbꞌeal syaꞌtajilal. Jaꞌ tituꞌ caw ey smey, jaꞌ tituꞌ ey noꞌ bꞌalam chi el yaw, ey noꞌ mimej labꞌa caw jow, cꞌal noꞌ chi too jululoj. Jaꞌ noꞌ che, cꞌal noꞌ camello chi ijontoj sbꞌeomal, cꞌal chꞌen tumin ey bꞌey conobꞌ Judá yu yakꞌle yin saꞌbꞌealoj bꞌey Egipto, jaꞌ jun conobꞌ tuꞌ cꞌam pax chi colwai.
7 Jaꞌ jun miman conobꞌ tuꞌ, ma skeꞌ yu, cꞌam yip, cꞌam chi tzaji scolwai, yu jun tuꞌ, yuxan chi wakꞌ yij jaxca tiꞌ: Noꞌ noꞌ tol ey smey yel yaw, cꞌam pax tzet chi skeꞌ yu, jin chi, ẍi Dios.
8 Jix yalon Jehová ey jin jaxca tiꞌ: Tzꞌibꞌe bꞌey junoj libro sattaj ebꞌ ánima tiꞌ, yet watxꞌ chi cancan jun skꞌaneal tiꞌ yin ebꞌ Israel, yu snaꞌontej ebꞌ yet slawubꞌ cꞌual.
9 Tol jaꞌ jun conobꞌ tiꞌ, caw ecꞌnaj chi yute sbꞌa; naꞌom a kꞌane ebꞌ, cꞌam chi yal scꞌul ebꞌ chi ẍaꞌ yabꞌ jin kꞌane.
10 Chi yal ebꞌ tet ebꞌ jin chejabꞌ jaxca tiꞌ: Cꞌam ojabꞌ che yal ey jon tzet jix je yil yin weyicheal tuꞌ. Cꞌam ojabꞌ che yal skꞌaneal yet sjichanil ey jon. Jaꞌ kꞌane chi ẍaꞌ cu cꞌul che yal ey jon, cꞌam ojabꞌ che yiꞌcan ecꞌ kochwan tiꞌ jon.
11 Elanwej yul cu bꞌe tiꞌ jon. Caw cꞌam ojabꞌxa che bꞌinatej skꞌaneal Naj cu Diosal jaon Israel jon tiꞌ, queytuꞌ oj yun yalon ebꞌ.
12 Yu jun tuꞌ xin, jaꞌ Dios Tol Asanxane Ocoj, sDiosal Israel jaꞌ chi alon jaxca tiꞌ: Jaex wal tol jix je yintajne el jun tenchebꞌal tiꞌ. Jacꞌaltaꞌ yecꞌnajilal, cꞌal spenail che yaoc yipoj je cꞌul.
13 Yu jun tuꞌ xin, jaex caw ey je penail, yuxan laan oj je yun jaxca junoj muro tol poꞌoiltaj xacꞌal yili, yin eymanil oj yun yey bꞌulnaoj.
14 Oj jex qꞌueyle el jaxca junoj miman ẍalu chi makꞌle poꞌo yin cꞌam chi yaꞌilnelei. Jaꞌ wan spoꞌoilal tuꞌ, cꞌamxa niꞌoj chito skeꞌ yoc letxbꞌalil, tam wal yin iꞌotoj stzakꞌakꞌ bꞌey chi waꞌxi loꞌbꞌe, ẍi Jehová.
15 Jaꞌ Jehová Naj cu Diosal jaon Israel jon tiꞌ, jun Dios tol chi skeꞌ yu masanil, jaꞌ chi alon jaxca tiꞌ: Meltzaanwejtej ey jin, catuꞌ chin je yaon oc yipoj je cꞌul, cꞌam ojabꞌ chex oc il. Queytuꞌ oj yun je colcha eloj, jin chi, cꞌam pax chi yal je cꞌul che jije.
16 Jaꞌ tiꞌ je yet, tol jix je yal jaxca tiꞌ: Cꞌamaj toni, tol oj cu a yibꞌan che, catuꞌ oj cu elaoj, je chi. Yel toni, oj jex el jaxca je yalon tuꞌ. Jix je yal cꞌal pax oj: Oj jon oc yibꞌan che tol jelan sbꞌeyi, je chi. Jaxa oj yunne tol yel xacꞌal jelan sbꞌey ebꞌ je cajat tuꞌ je yintaj.
17 Jun mil je bꞌisil oj jex ela tet junoj qꞌuetxan ebꞌ je cajat oj jex ujten ecꞌoj. Je masanil oj jex el tet jowanoj ebꞌ je cajat. Jaywanxane jex oj jex cancanoj, jaxca chi yun scancan locan junoj teꞌ teꞌ sjolom wonan, ma jaxca junoj bandera eya snan tzalan, ẍi Dios.
Jaꞌ Scamcꞌulal Dios Yin Ebꞌ Sconobꞌ
18 Yu jun tuꞌ xin, chi yal Jehová jaxca tiꞌ. Lalan cꞌal jex wechbꞌaneni, ta chex jul jin cꞌatan, chi okꞌ jin cꞌul je yin, chi wakꞌon mimancꞌulal je yin, yutol jain Jehová jin tiꞌ, caw watxꞌ jin naꞌbꞌal, yuxan caw watxꞌ yet masanil ebꞌ ánima chin yaoc scꞌul win.
19 Jex conobꞌ Sión, tol caan jex bꞌey Jerusalén, cꞌam ojabꞌ chex okꞌi; jaꞌ Jehová oj okꞌ scꞌul je yin yet oj yabꞌen yel je yaw. Yet oj je yalon je bꞌa tet, oj takꞌwoj Naj ey jex yin eymanil. 20 Caxcꞌal chex ecꞌ el bꞌey syaꞌtajilal yu Jehová, jaꞌcaw Naj oj jex cuyonoj; manxa oj scꞌubꞌa el sbꞌa Naj ey jex, yutol oj je yil yin. 21 Ta oj jex el yul bꞌe, catuꞌ chex too bꞌey je watxꞌ kꞌabꞌ, ma bꞌey je qꞌuexan, oj je yabꞌ yoc jun kꞌane bꞌey je yintaj, oj yal jaxca tiꞌ: Manaj jun bꞌe bꞌey chex too tuꞌ, tiꞌ ey jun bꞌe chi too tiꞌ, ẍi. 22 Ta oj je qꞌueyel wan yechel comon dios tol plata, cꞌal wan je diosal tol eyoc oro yin, catuꞌ oj je kꞌojon can el jaxca tzꞌil kꞌap, ma jaxca kꞌalem. 23 Queyton wal tuꞌ bꞌian, jaꞌ Jehová oj aontej nabꞌ yibꞌan je yawo. Jaꞌ yet oj je yawon je yawo, caw watxꞌ oj yun je yawo tuꞌ. Jaꞌ noꞌ je jobꞌbꞌeal noꞌ, caw lean cꞌal bꞌey oj il-le low noꞌ. 24 Jaꞌ noꞌ je wacax, cꞌal noꞌ je bꞌuru chi mulnai, jaꞌ ixim caw wal watxꞌ oj je yakꞌ skꞌux noꞌ. 25 Jaꞌ yet oj eyqꞌuey wejna scuartel ebꞌ je cajat, caw miman camich oj oc xol ebꞌ, ecꞌal jaꞌ mimej jaꞌ oj el yajan bꞌey sjolomlaj wonan, cꞌal bꞌey txꞌotxꞌ tzalquiltaj txꞌotxꞌ. 26 Jaꞌ yajan xꞌaaw, oj yun jaxca yajan cꞌu; jal pax yajan cꞌu xin, jujel oj yun yakꞌon sjowal yajan. Jaxca wal yajan jujebꞌ cꞌual oj yun jun cꞌu. Jaꞌ yet tuꞌ, jaꞌ Jehová oj yante ebꞌ sconobꞌ. Oj spichon bꞌey yasinajtoj ebꞌ tol jaꞌ jix akꞌon yasoj ebꞌ.
Syaꞌilal Conobꞌ Asiria
27 Ilwej ton abꞌ stit Jehová naat. Caw wal chi tit sjowal sicꞌlebꞌil. Laan sjowal scꞌul jaxca junoj kꞌakꞌ chi nilxi xaj, catuꞌ chi a bꞌakꞌakꞌoj smucꞌal. Jaꞌ yet chi kꞌanabꞌi, catuꞌ chi tzꞌaꞌtoj masanil tzetyetal yu.
28 Yu skꞌane Jehová, jaꞌ chi iꞌontej tzet chi yun sqꞌueyle el ebꞌ penawom, jaxca wal junoj miman jaꞌ chi el yul sbꞌe, chi aapnoj jaꞌ bꞌey steel cu nukꞌ. Oj iꞌletoj ebꞌ chi jowi oc yin Dios, jaxca skꞌail ixim tiriw chi letxle can eloj. Jaxca tol oj oc sfrenoal stiꞌ ebꞌ conobꞌ tuꞌ, yet chi iꞌletoj ebꞌ yet chi qꞌueyle can el ebꞌ.
29 Jal jex jaex tiꞌ xin, tol oj jex bꞌitnoj, jaxca yet eyoc skꞌinal yet chi naꞌletej yet jix jajcha eltej ebꞌ ket Israelal bꞌey txꞌotxꞌ Egipto. Caw tzalacꞌulal je yet, jaxca wal chi yun ebꞌ chi xuꞌ sflauta yet chi too bꞌey txꞌotxꞌ wonan bꞌey stemplo Jehová, jaꞌton cu Colomal jaon Israel jon tiꞌ.
30 Jaꞌ Jehová oj abꞌle yoc yul snukꞌ tol caw ey smey, naat oj apnoj yel yaw, catuꞌ oj xꞌoxon el yipal. Oj yatej sjowal scꞌul, laan jaxca xaj kꞌakꞌ tol chi tzꞌaꞌtoj tzetyetal yu, oj yaontoj cajxuchum kaꞌeꞌ, cꞌal mimej yaax nabꞌ yetoj sajbꞌat.
31 Jaꞌ yet oj yabꞌen ebꞌ Asiria yel yaw Jehová, caw oj xiwa ebꞌ yu, yutol oj ale oc syaꞌilal ebꞌ.
32 Jaꞌ yet oj yaon oc naj yaaw junjun jichan kꞌojoche yin Asiria tuꞌ, oj tenle waabꞌ cꞌal arpa yin tzalacꞌulal yu ebꞌ sconobꞌ, caw eyxa smey jun jowal oj oc bꞌey Asiria tuꞌ, yu Dios.
33 Yutol peyxa tax waꞌnebꞌil bꞌey oj yabꞌ syaꞌil ebꞌ Asiria yetoj sreyal bꞌey oj tzꞌaꞌ smimanil ebꞌ, tol miman sat, catuꞌ naat yich, caw ey siꞌ tituꞌ oj kꞌanle yu jun miman kꞌakꞌ oj ocoj. Jaꞌ Jehová oj aon oc skꞌakꞌal yetoj skꞌane, tol oj nilxo xaj jaxca azufre.