2 Jaꞌ Dios oj aon oc ebꞌ ánima caan bꞌey jun conobꞌ tuꞌ yin bꞌiscꞌulal, cꞌal yin cuscꞌulal. Oj el yaw ebꞌ yabꞌen syaꞌil, jaꞌ jun conobꞌ tuꞌ, jaxca junoj yet xaambꞌal oj yun can oc yul sat Dios.^b

3 Jaꞌ Dios oj ẍejtoj ebꞌ soldado yet chi sjoyon oc sbꞌa ebꞌ yinlaj Jerusalén, oj swaꞌne oc smuroal ebꞌ bꞌey oj oc joyan ebꞌ yinlaj. Catuꞌ oj yaon oc swalubꞌ ebꞌ yet oj skeꞌ yakꞌon jowal ebꞌ yin jun conobꞌ tuꞌ.

4 Jaꞌ Jerusalén oj iꞌle eyoj, catuꞌ oj cancan telan sat txꞌotxꞌ, tuxa cꞌal oj numnon ey skꞌanabꞌ xol pojoj. Jaxa cꞌal yul txꞌotxꞌ oj kꞌanabꞌ eytoj jaxca skꞌanabꞌ junoj mac chi kꞌanabꞌ yetoj spixan camom.

5-6 Jaxa wal oj yun xin, yin eymanil oj yaoc syaꞌilal Jehová yibꞌan masanil ebꞌ chi jowi oc yin conobꞌ Jerusalén. Oj makꞌwa cꞌu, cꞌal yecꞌ quixcabꞌ tol eyxa smey sbꞌilwi. Oj jul mimej cajxuchum kaꞌeꞌ, cꞌal mimej yaxnabꞌ, yetoj jun miman kꞌakꞌ iꞌbꞌil oc camich yu. Jaꞌ ebꞌ chi jowi oc je yin, cꞌamxa chi alcha jantaj sbꞌisil ebꞌ, pojojtaj xacꞌal oj yun cantoj ebꞌ. Jaꞌ masanil ebꞌ chex etneni, tuxa cꞌal oj iꞌle cantoj ebꞌ jaxca chi yun yijletoj smatzꞌical ixim tiriw yu kaꞌeꞌ.

7 Masanil wan conobꞌ cꞌamxa chi alcha jantaj sbꞌisil tuꞌ, tol oj yakꞌ jowal yin jun conobꞌ chi yij sbꞌi Ariel, jun yet xaambꞌal yet Dios, tol chi oc xacꞌal joyan yin, yin yuchon ey smuroal, laan xacꞌal oj yute sbꞌa ebꞌ jaxca chi yun stoo qꞌueycꞌulal junoj tzet chi yil yin sweyich yet akꞌbꞌalil.

8 Laan jaxca junoj tol ey swail yet chi wey can aoj, jaxa yin sweyich chi yilaꞌ tol chi lowi, jaꞌ yet chi el sweyan, jacꞌalaꞌ snochai. Ma jaxca junoj ey stajin tiꞌal yet chi wey can aoj, jaxa yin sweyich chi yilaꞌ tol chi yucꞌ jaꞌ, jaꞌ yet chi el sweyan, caw ey cꞌal pax stajin tiꞌal sicꞌlebꞌil. Queytuꞌ oj yun wan conobꞌ oj yakꞌon jowal yin wonan Sión, jaꞌton conobꞌ Jerusalén. Tucꞌal oj sweyichne ebꞌ tol chi eyqꞌuey conobꞌ tuꞌ yu ebꞌ.

9 Jex a Jerusalén, bꞌeyanwej cꞌaltoj yin tol cꞌam je naꞌbꞌal. Bꞌeyanwej cꞌaltoj yin tol jaxca cꞌam chi skeꞌ je yilwan niꞌoj. Ecꞌanwej cꞌal tzꞌeytzꞌon jaxca uqꞌuem an, catuꞌ cꞌam pax an che yuqꞌueytoj.

10 Yutol jaꞌ Jehová jix aontej jun miman weyan je yibꞌan. Jaxca sbꞌakꞌ sate yeoc ebꞌ ẍejabꞌ Dios yu ebꞌ conobꞌ, jaꞌ Jehová jix majchen el snaꞌbꞌal ebꞌ, jaxca chi yun smajchen sat junoj chi wey yalan junoj kꞌap.

11 Yutol jaꞌ masanil skꞌane ebꞌ ẍejabꞌ Dios, laan oj yun can ey jex jaxca junoj tzetyetal tzꞌibꞌebꞌilcan yul junoj juun tol chulbꞌil eyoj, catuꞌ eyoc selloal. Ta chi akꞌle tet junoj tol chi skeꞌ yilon juun, catuꞌ chi al-le tet jaxca tiꞌ: Il jun juun tiꞌ, ta ẍi tet, catuꞌ chi takꞌwi jaxca tiꞌ: Cꞌam chi skeꞌ wilon tzet chi yalaꞌ, yutol eyoc selloal, ẍi mi chi yaloni.^c

12 Ta chi akꞌle tet junoj mactxequel tol cꞌam chi skeꞌ yilon juun, il jun juun tiꞌ, ta cu chi tet, chim yal jaxca tiꞌ: Cꞌam chi skeꞌ wilon juun, ẍi mi chi yaloni.

13 Jix yalon Jehová ey jin jaxca tiꞌ: Jaꞌ wan conobꞌ tiꞌ, yin cꞌal kꞌaneal chin yakꞌ servil ebꞌ, tucꞌal chi yal ebꞌ tol ey weloc apnoj yul sat, jal pax snaꞌbꞌal ebꞌ xin naat txꞌuman el win, chi stzꞌaj yiꞌey sbꞌa ebꞌ ey jin, asan wan chejbꞌanile chi yal ánima chi yakꞌ cuyle ebꞌ.

14 Yu jun tuꞌ, yuxan jaꞌ tzetyetal tol qꞌueyubꞌtaj yoqui, oj wun cꞌal bꞌey jun conobꞌ tiꞌ, tuxa cꞌal oj qꞌueycan a scꞌul ebꞌ yu. Jaꞌ sjelanil ebꞌ jelan, cꞌal yetoj sjelan naꞌbꞌal ebꞌ ey snaꞌbꞌal xol ebꞌ, tuxa cꞌal oj qꞌueycan aoj, ẍi Dios.

15 Caw okꞌbꞌal cꞌul ebꞌ chi scꞌubꞌa el sbꞌa sattaj Jehová yaloni, chi scꞌubꞌan jantaj tzetyetal chi snaꞌ ebꞌ, cꞌal yin ewantajil chi yun spenail ebꞌ catuꞌ chi yalon ebꞌ jaxca tiꞌ: Tumi ey mac oj cu ilonoj, tumi ey mactxequel oj otajnen eloj, ẍi ebꞌ.

16 Jal jex jaex tiꞌ, qꞌuexan che yute. Tumi laan txꞌotxꞌ tzꞌajbꞌeal txꞌotxꞌ yetoj mac chi tzꞌajoni. Jaꞌ junoj txꞌotxꞌ tol tzꞌajbꞌil, ¿tumi ta chi skeꞌ yalon tet junoj chi tzꞌajon jaxca tiꞌ: Manaj jaach jix jin ja tzꞌajaꞌ, tumi ta ẍi tet chi cu naꞌ? Tam wal oj skeꞌ yalon niꞌoj txꞌotxꞌ tzꞌajbꞌeal txꞌotxꞌ tet mac chi tzꞌajon tuꞌ jaxca tiꞌ: Jaach tiꞌ man ja wotaj oj tzet cha wunne, tumi taꞌ ẍi txꞌotxꞌ tet.

18 Jaꞌ yet jun cꞌual tuꞌ, jaꞌ ebꞌ cꞌam cꞌaltaꞌ chi skeꞌ yabꞌeni, oj skeꞌ yabꞌen ebꞌ ta oj awtele a junoj juun yabꞌ ebꞌ. Jaꞌ ebꞌ cꞌam chi skeꞌ yilwani, jaxca tol xol kꞌejkꞌinal eyecꞌoj, jaꞌ ebꞌ tuꞌ oj skeꞌ yilon ebꞌ.

19 Jaꞌ ebꞌ yeynajil caw oj tzalabꞌoj a ebꞌ yin Jehová. Jaꞌ ebꞌ caw mebꞌa, oj tzalabꞌoj a ebꞌ yin sDiosal Israel, jaꞌton jun Dios tol ey yipal.

20 Jaꞌ ebꞌ cꞌam yeloc apnoj yet animail yul sat, oj lawoj ey ebꞌ. Jaꞌ ebꞌ chꞌaan chi yute sbꞌa, cꞌamxa junoj ebꞌ oj can yin yiquisal. Oj qꞌueycan el masanil ebꞌ tol asan cꞌal spenail chi snaꞌ,

21 jaꞌton mactxequel chi naꞌon a kꞌane yin yet animail, catuꞌ chi tenchanele yu ebꞌ juez yet chi ale oc syaꞌilal yibꞌan ebꞌ penawom, catuꞌ chi yakꞌon lekꞌtiꞌal ebꞌ yet watxꞌ cꞌam chi yun sjichanil yibꞌan ebꞌ watxꞌ.

22 Yu jun tuꞌ, yuxan jaꞌ Jehová sDiosal Israel, Naj jix colon can el Abraham, jaꞌ chi alon jaxca tiꞌ: Jaꞌ tinaniꞌ jex jin conobꞌ, jex yicꞌaal Jacob, cꞌamxa bꞌey oj jex qꞌuixwoj aoj, cꞌamxa bꞌey oj sajbꞌoj el je sat yu xiwcꞌulal.

23 Yutol jaꞌ yet oj yilon ebꞌ je yicꞌaal wan tzetyetal oj wun xol ebꞌ tuꞌ, oj yotajne el ebꞌ tol asanxane jin ocoj, catuꞌ ey weloc apnoj yul sat ebꞌ, jain je Diosal jaex Israel jex tiꞌ.

24 Jaꞌ mactxequel tol eyoc yin somcꞌulal, oj cuycha el jelanilal yu, jal ebꞌ bꞌuchwawom, oj ẍaꞌ yabꞌ cuybꞌanile ebꞌ, ẍi Jehová.