Skꞌaneal Conobꞌ Samaria
28
Okꞌbꞌal cꞌul conobꞌ Samaria,jaꞌton jun miman conobꞌ yeoc yul sat ebꞌ uqꞌuem vino yul yet Efraín. Jun yelawil jun acꞌal caw yaax sat yeoc bꞌey Samaria; jaꞌ tinaniꞌ laan yili jaxca junoj tajin xumac teꞌ, yutol jaꞌ ebꞌ conobꞌ qꞌueynaj ebꞌ yin uqꞌue vino.
2 Jaꞌ Jehová jix sicꞌon el jun winaj caw ey yip, yet chi yakꞌon jowal yin conobꞌ Samaria. Oj jul Naj yetoj masanil yipal, jaxca chi yun sjul yaax nabꞌ yetoj sajbꞌat, ma jaxca cajxuchum kaꞌeꞌ, jaxca wal yakꞌon sjowal jaꞌ jaꞌ chi bꞌey stoi, catuꞌ chi el jaꞌ yul sbꞌe. Yu yipalil jun tuꞌ, yuxan oj uchchacantoj conobꞌ Samaria.
3 Jaꞌ jun conobꞌ miman yeloc apnoj yul sat ebꞌ uqꞌuem an, oj steqꞌuey Naj ey yip tuꞌ.
4 Jaꞌ jun an xumac teꞌ corona eyoc yelawiloj jun acꞌal yaax sat tuꞌ, oj tajeloj, oj qꞌueyle eloj, jaxca wal sat teꞌ higo chi pet eloloj, tol eyman chi loꞌle eytoj yu mactxequel chi iloni.
5 Jaꞌ yet jun cꞌual tuꞌ, jaꞌ Jehová Naj ey yipal yibꞌan masanil tzetyetal, jaxca junoj corona oj yun can oc xol ebꞌ sconobꞌ yet oj colcha can eloj, oj smeynen sbꞌa ebꞌ jaxca junoj mactxequel chi yiꞌ scorona.
6 Jaꞌ Jehová oj aon oc yin snaꞌbꞌal ebꞌ juez, yet watxꞌ yin sjichanil oj naꞌle oc yin junoj mactxequel, oj akꞌle cꞌal pax yip ebꞌ soldado chi teynen conobꞌ.
Kꞌane Chi Al-le Yin Conobꞌ Jerusalén
7 Ey wanxa ebꞌ chi ecꞌ tzeytzꞌon yu an, catuꞌ chi sicbꞌi el ebꞌ yu sjowal teꞌ vino tuꞌ, jaꞌton ebꞌ yakꞌomal xaambꞌal cꞌal ebꞌ ẍejabꞌ Dios. Jaꞌ yet uqꞌuem an ebꞌ, chi weyichli ebꞌ; chi somcha el snaꞌbꞌal ebꞌ yet chi too an sjolom ebꞌ, cꞌamxa chi naꞌcha el yu ebꞌ tzet chi yal Dios, manxa yin oj xolilal chi yun swaꞌxi yeoc junoj skꞌane ebꞌ ánima yu ebꞌ, yutol ukꞌem an ebꞌ.
8 Masanil smeẍa ebꞌ, nonaj yibꞌan yu xaaw ebꞌ, cꞌamxa bꞌey watxꞌ yili niꞌoj, ey xacꞌal sabꞌ masanil yu ebꞌ.
9 Chi yalon ebꞌ ánima wu jain tiꞌ: ¿Mactxequel chi yoche jun winaj tuꞌ chi scuyuꞌ? ¿Tumi yaliẍ unin jon to chi yilaꞌ?
10 ¿Tzet wal yu, yuxan yin niẍtejal cꞌal chi yun scuywai, jacꞌalaꞌ cuybꞌanile chi yalaꞌ, jacꞌalaꞌ bꞌeybꞌale chi yalaꞌ, jacꞌalaꞌ chejbꞌanile chi yalaꞌ? ẍi ebꞌ.
11 Yu jun tuꞌ xin, ta tol cꞌam chi yoche ebꞌ tzet chi walaꞌ, jaꞌ junoj txꞌoj conobꞌal oj jin kꞌanbꞌalne yu yalon el jun skꞌaneal tiꞌ tet ebꞌ. Txꞌoj conobꞌal oj alon el tet jun conobꞌ tiꞌ yin txꞌoj tiꞌeal.
12 Jaꞌton tet ebꞌ tiꞌ yalnaj can Dios jaxca tiꞌ: Ti ey je xewilal tiꞌ, jaꞌ mactxequel chi cꞌuumbꞌi, xew ojabꞌi. Akꞌwej sicbꞌoj je cꞌul, ẍi Dios. Ma pax yal scꞌul ebꞌ jix ẍaꞌ yabꞌe.
13 Yu jun tuꞌ, jaꞌ Jehová jix cuyon ebꞌ jaxca tol yaliẍ unin ebꞌ, cꞌamto chi yil juun ebꞌ. Yu jun tuꞌ, yuxan pacꞌan oj yun yeyqꞌuey ebꞌ sat txꞌotxꞌ, oj yasitoj ebꞌ, oj oc can ebꞌ yul yaal, catuꞌ oj iꞌletoj ebꞌ yin yakꞌomaloj servilal bꞌey junojxa txꞌoj conobꞌal.
14 Jex yaaw je yeoc bꞌey conobꞌ Jerusalén tiꞌ, caw bꞌuchwawom jex, yuxan abꞌwej wal yalon skꞌane Jehová.
15 Yutol jix je yal jaxca tiꞌ: Ey jun cu wa kꞌane jix kal yetoj yaaw camich, yuxan jaꞌ yet oj jul uchlebꞌail, cꞌam tzet oj jul kibꞌan; yutol jaꞌ lekꞌtiꞌal jix kaoc yipoj cu cꞌul, oj cu col cu bꞌa yu cu lekꞌtiꞌal tuꞌ, je chi.
16 Yu jun tuꞌ xin, yuxan chi yal Jehová jaxca tiꞌ: Jain jix wa can oc jun chꞌen chꞌen yet yichbꞌanil bꞌey Sión, tol miman yeloc apnoj, tol sicꞌbꞌil el chꞌen wu yet chi oc can yopiso yu yeycan yipomaloj xeꞌ na. Cꞌam bꞌakꞌin chi qꞌueyel jun yich ey can ey tuꞌ: Jaꞌ mactxequel chi yaoc yipoj scꞌul, cꞌam cꞌal tzet chi snaꞌ.
17 Jaꞌ bꞌey jun na oj waꞌxoj tuꞌ, jaꞌ jin jichanil oj wakꞌbꞌalne yet chi jichlo ocoj. Jaꞌ sjichanilal oj wakꞌbꞌalne jaxca chꞌen plomo, ma nivel, ẍi Dios.
Jaꞌ lekꞌtiꞌal, yetoj jantaj tzet man yeloj, jaꞌton bꞌey jix je sey je colbꞌanil, jaꞌ chꞌen sajbꞌat oj qꞌueyon el jun eyoc yipoj je cꞌul, jaꞌton lekꞌtiꞌal. Jaꞌ jun jaxca elom jaꞌ, jaꞌ oj ecꞌ ijontoj bꞌey jix je col je bꞌa tuꞌ.
18 Oj lawoj ey jun je wa kꞌane jix je yal yetoj yaaw camich tuꞌ. Oj jex qꞌueyle eloj, oj jul camich je yibꞌan, oj jex cancan yalan yu.
19 Jaꞌ yet oj jul je yin junjuntaj el, oj jex ijletoj yu. Junjun cꞌal skꞌinibꞌalil oj jul je yin. Jaꞌ yet cꞌualil cꞌal yet akꞌbꞌalil, jaꞌ yet oj je yabꞌen skꞌaneal oj jex bꞌilwoj a yu xiwcꞌulal.
20 Laan oj je yun jaxca junoj mac chi wey sat junoj txꞌat tol txenne steel, catuꞌ txenne pax sat junoj txoowe eya yibꞌan.
21 Jaxca wal jix yute yakꞌon jowal Jehová yetoj ebꞌ Filisteo bꞌey txꞌotxꞌ sjolom wonan Perasim, cꞌal yetoj ebꞌ Cananeo bꞌey yul yet Gabaón, queytuꞌ oj yute mulna sbꞌa yin tzet chi yoche scꞌul, tol qꞌueyubꞌtaj xacꞌal oj yunne.
22 Jaꞌ tinaniꞌ xin, cꞌam ojabꞌ chex bꞌuchwai, yet watxꞌ cꞌam chi jowbꞌi cꞌal syaꞌilal je yibꞌan. Jix wabꞌ tzet jix yal Jehová, Naj Yaaw yibꞌan masanil. Tol jix snaꞌ tol oj yakꞌ lawoj el masanil jantaj tzet ey yul jun conobꞌ tiꞌ.
23 Majwej je yabꞌ tzetyetal oj walaꞌ, chi cam wal je yabꞌen jin kꞌane:
24 Jaꞌ yet chi too junoj mulnawom yawon yawo, man asanne oj cꞌal kꞌuo txꞌotxꞌ chi yun yetoj chꞌen kꞌubꞌal txꞌotxꞌ, man tucꞌal oj chi slatxꞌone sat txꞌotxꞌ yetoj chꞌen txalbꞌal txꞌotxꞌ tuꞌ.
25 Asanne cꞌal chi lawi swaꞌxi el sat txꞌotxꞌ yu, catuꞌ chi yawontoj an eneldo cꞌal an comino, catuꞌ chi yawon cꞌal pax toj tiriw yin xolilal; jaxa bꞌey stiꞌlaj chi awle ey ixim cebada cꞌal chꞌim tiriw, jatacꞌalaꞌ junjun tujan jinat.
26 Jaꞌ Dios chi txꞌoxoni tzet chi yun swaꞌxi junjun tujan mulnail.
27 Yutol jaꞌ an eneldo tuꞌ cꞌam chi tecꞌle eltej an, tam wal chi ecꞌ junoj carreta yibꞌan an comino tuꞌ. Tucꞌal chi tenle el an eneldo yetoj junoj teꞌ, jal an comino xin, chi makꞌle el yetoj junoj kꞌaaxteꞌ.
28 Yotaj naj mulnawom chi yiꞌel sbꞌakꞌ ixim tiriw yetoj junoj carreta chi ecꞌ yibꞌan, cꞌam cꞌal chi oc cꞌal ian yecꞌ cꞌal yibꞌan, yet watxꞌ cꞌam chi poꞌotoj ixim sbꞌakꞌ tiriw tuꞌ yu.
29 Jaxca ton tuꞌ chi yun yaon oc xolilal Dios yin tzet chi yunne. Qꞌueyubꞌtaj xacꞌal yoc tzetyetal chi snaꞌbꞌalne el Dios, catuꞌ chi yun masanil yetoj sjelanil.