2 Jaꞌ yet jun cꞌual tuꞌ oj yal Jehová jaxca tiꞌ: Bꞌitnewej an awbꞌeal uva tol manxa jantajoj swatxꞌil yili.

3 Jain Jehová jin tiꞌ, jain chin teyne an, kocꞌtaj cꞌal chi waoc yal an. Chin teyne an yet cꞌualil, cꞌal yet akꞌbꞌalil, yet watxꞌ cꞌam tzet chi ion an.

4 Cꞌam cꞌal bꞌey chi tit sjowal jin cꞌul yin an. Toloj wal taꞌ ey teꞌ qꞌuix, ma pena cꞌultaj eya jin sattaj, chim jin tecꞌ eyoj, chi wakꞌon tzꞌaꞌ yin junelne.

5 Ta chi yoche ebꞌ chin colwa yetoj, sowalil chi oc ebꞌ yin watxꞌcꞌulal wetoj, queytuꞌ oj yun yoc watxꞌcꞌulal snan jin xol yetoj ebꞌ, ẍi Dios.

6 Ey jun cꞌual cu sattajto tuꞌ, jaꞌ ebꞌ conobꞌ yicꞌaal Jacob, oj yiꞌ pax yip ebꞌ junelxa; jaꞌ conobꞌ Israel tiꞌ, jaxca wal tol oj woloj jaxca junoj teꞌ teꞌ chi aol swol, catuꞌ oj yakꞌon pax xumac, oj yakꞌon pax noel yul yibꞌankꞌinal tiꞌ junelxa yu sat oj yakꞌa.

7 Jaꞌ ebꞌ conobꞌ Israel, ma ale oc syaꞌilal yibꞌan ebꞌ yu Dios jaxca jix yun yale oc syaꞌilal yibꞌan wan scajat ebꞌ. Yutol man masaniloj ebꞌ Israel jix makꞌle cam yu Naj, man jaxca oj jix yun smakꞌle cam masanil ebꞌ chi makꞌon cam ebꞌ Israel.

8 Jaꞌ Dios jix yaoc syaꞌilal yibꞌan ebꞌ sconobꞌ yin stoo can ebꞌ yin yakꞌomaloj servilal bꞌey junojxa txꞌoj conobꞌal. Jaxca chi yun xuꞌletoj smatzꞌical ixim tiriw yu cajxuchum kaꞌeꞌ chi tit yetcꞌulal bꞌey chi aol cꞌu, queytuꞌ jix yun yijletoj ebꞌ conobꞌ tuꞌ.

9 Queyton wal tuꞌ xin, oj yun yakꞌle mimancꞌulal yibꞌan spenail ebꞌ yicꞌaal Jacob, asantane tol chi smakꞌ poꞌotoj masanil wan yet xaambꞌal wan comon dios yu ebꞌ, jaxca chi yun smakꞌle poꞌotoj chꞌen taan yet chi poltenele chꞌen, cꞌam ojabꞌ xacꞌal junoj teꞌ teꞌ yechel Aserá chi cancanoj, tam wal jun yet xaambꞌal yet incienso yu yiꞌle a can sbꞌi comon sdiosal ebꞌ tuꞌ. Ta jaxca tuꞌ oj yun ebꞌ, oj joꞌole qꞌuey masanil spenail ebꞌ.

10 Jaꞌ junoj conobꞌ tol caw watxꞌ ye scawxi, oj lawoj ey masanil, jaxca xacꞌal junoj teꞌ na tol cꞌamxa yaaw, jaxca xacꞌal bꞌey cꞌam ánima, tzꞌinini xacꞌal yili. Slowbꞌal noꞌ noꞌ oj yun can oc yul-laj calle, pilan oj lawoj el xajlaj teꞌ teꞌ yu noꞌ, tajin kꞌaax xacꞌal chi yun cantoj skꞌabꞌlaj teꞌ teꞌ yu noꞌ.

11 Jaꞌ yet tajin xa skꞌabꞌlaj teꞌ, catuꞌ chi jul ebꞌ ix ix yu syambꞌan a skꞌabꞌlaj teꞌ teꞌ tuꞌ, catuꞌ chi yaon oc skꞌakꞌ ebꞌ ix. Jaꞌ ebꞌ conobꞌ tuꞌ, caw cꞌam chi naꞌcha el niꞌoj yu ebꞌ, yuxan jaꞌ Dios jix waꞌnen yeoc ebꞌ, cꞌamxa chi cusoc scꞌul yin ebꞌ, tam wal chi too xꞌox scamcꞌulal yin ebꞌ.

12 Jaꞌ yet jun cꞌual yet cu sattajto tuꞌ, ey wal tzet oj yun Jehová, jaxca tol oj tecꞌwoj tiriw, oj toj tacꞌal bꞌey jaꞌ Éufrates masantaꞌcꞌal bꞌey jaꞌ jaꞌ chi tit bꞌey Egipto. Oj yambꞌale oc ebꞌ conobꞌ junelxa. Jaꞌ jaex Israel jex tiꞌ xin, yin junjunal oj yun je sicꞌle a yu Dios.

13 Jaꞌ yet jun cꞌual tuꞌ, oj xuꞌle jun miman trompeta caw naat oj abꞌle yoc yul snukꞌ chꞌen. Jaꞌ mactxequel qꞌueynaj cantoj bꞌey Asiria, yetoj cꞌal ebꞌ iꞌbꞌilcantoj bꞌey Egipto, oj jul ebꞌ yu yiꞌon ey sbꞌa tet Jehová bꞌey Jerusalén, bꞌey jun wonan yet eyilal.