2 Jajwej spuertail cu conobꞌ Jerusalén tiꞌ, yet chi octoj jun nación tol caw jijem, catuꞌ tol watxꞌ sbꞌeybꞌal.

3 Jaꞌ Jehová cu Diosal, ey cꞌal ecꞌ yin watxꞌcꞌulal yetoj mactxequel tol eyoc scꞌul yin, yutol asanne Naj eyoc yipoj scꞌul ebꞌ.

4 Ey ojabꞌ cꞌal oc Jehová yipoj cu cꞌul, yutol jaꞌ Naj chi skeꞌ cu scolon eloj.

5 Jaꞌ Jehová chi akꞌon eyqꞌuey ebꞌ chi smeyne sbꞌa, catuꞌ chi yiꞌon ey ebꞌ conobꞌ tol pit chi yute snaꞌbꞌal, chi ey wejna ebꞌ sat txꞌotxꞌ,

6 yet watxꞌ chi tecꞌle ey ebꞌ yu ebꞌ yeynajil ánima, cꞌal yu ebꞌ mebꞌa, ẍi jun bꞌit tuꞌ.

7 Jaach jin Diosal, caw cha teyne cꞌal ebꞌ watxꞌ snaꞌbꞌal, jaꞌton ebꞌ jichan yeoc sbꞌeybꞌal, yutol jaach cha waꞌne oc sbꞌeybꞌal ebꞌ.

8 Jaach Jehová jin Diosal, jaon tiꞌ jon, caw chi kaoc yin cu cꞌul jon tol jichan keoc yin ja chejbꞌanil, yin ja naꞌon oc yin ebꞌ conobꞌ. Jaꞌ tzet chi yoche cu cꞌul tol chi jijele tzet chi yal ja chejbꞌanil, cꞌal yoc eyilal ey jaach.

9 Junjun cꞌal akꞌbꞌal ey cꞌal oc jin naꞌbꞌal ja win. Jaꞌ yet cha naꞌon oc yin ebꞌ ánima bꞌey yul yibꞌankꞌinal tiꞌ, oj naꞌcha el yu ebꞌ, tol cha naꞌoc yin ánima yin sjichanil.

10 Caxcꞌal mi ey ja watxꞌcꞌulal yin ebꞌ penawom, cꞌam pax chi sjije yunen sjichanil ebꞌ. Caxcꞌal mi jaꞌ xol ebꞌ ánima watxꞌ snaꞌbꞌal caan ebꞌ, jacꞌalaꞌ sbꞌeybꞌalnen spenail ebꞌ. Tumi ey yeloc apnoj ja watxꞌcꞌulal yul sat ebꞌ.

11 Jaach Jehová jin Diosal, watxꞌ xa yeoc syaꞌilal ebꞌ ja wu, cꞌam chi naꞌcha el yu ebꞌ. Jaꞌ yet oj ja txꞌoxon ja camcꞌulal yin ebꞌ ja conobꞌ, jaꞌton yet tuꞌ oj ja waon oc syaꞌilal yin ebꞌ penawom tuꞌ, tuxa cꞌal oj qꞌuixwoj can a sat ebꞌ. Oj ton lawoj el ebꞌ yu sjowal ja cꞌul, yutol watxꞌ xa yeoc syaꞌilal yibꞌan ebꞌ ja wu.

12 Jaach jin Diosal, jaach cha wakꞌ cu watxꞌcꞌulal jon. Yu ja colwal, yuxan chi yiꞌ sbꞌa masanil tzet chi cu waꞌne jon.

13 Jaach jin Diosal, caxcꞌal mi ey wanoj ebꞌ ket animail jix oc cu yaawiloj jon, asanne cꞌaltaꞌ jaach chach kiꞌa can.

14 Jaꞌ ebꞌ tuꞌ, jix camtoj ebꞌ, tumi oj to pitzcꞌu a ebꞌ junelxa. Cꞌamxa bꞌakꞌin oj txeclo a ebꞌ junelxa, yutol jix ja waoc syaꞌilal yibꞌan ebꞌ, jix ja wakꞌ lawoj ey ebꞌ yin junelne, cꞌamxa bꞌey oj naꞌletej ebꞌ.

15 Jaach Jehová jin Diosal, jaach jix ja wakꞌ chꞌibꞌ jun cu conobꞌ tiꞌ. Jix ja wakꞌ chꞌibꞌoj yet watxꞌ chi iꞌle a can ja bꞌi yu ebꞌ, jaach jix a jitzcꞌaltoj smoonal cu majul txꞌotxꞌ jon.

16 Jaach jin Diosal, jaꞌ snan xol cu yaꞌilal jix cu txali ey jaach, jaꞌton yet jix ja waon oc syaꞌilal kibꞌan yu jon ja wakꞌon cuenta.

17 Jaxca wal junoj ix ix tol mimejalxa, tol lalanxa yapni scꞌual swaꞌxi scꞌul, lalanxa yoc taccꞌulal yin ix yu syaꞌilal, queywal tuꞌ jix kun ja sattaj jaach jin Diosal.

18 Jaxca wal syaꞌil junoj unin, queywal tuꞌ oj yun kabꞌen syaꞌil jon, tumi ey pax tzet chi ali kin jon. Tumi ey niꞌoj colbꞌanile yul yibꞌankꞌinal tiꞌ jix yiꞌ sbꞌa cu jon, tumi ey sbꞌisil ánima jix chꞌibꞌ cu jon.

19 Jal pax ebꞌ camnajxa, ebꞌ tol ja wet xacꞌaltaꞌ yeocoj, oj pitzcꞌu a ebꞌ. Oj el sweyan ebꞌ eyecꞌ xol spojojal txꞌotxꞌ txꞌotxꞌ, catuꞌ oj a yaw ebꞌ yin tzalacꞌulal. Jaxca wal chi yun yaol junoj awo yu yal akꞌbꞌal chi ey yibꞌan txꞌotxꞌ txꞌotxꞌ, queyton tuꞌ oj yun ja waontej ja sajkꞌinal yibꞌan ebꞌ yet oj a waan ebꞌ camnajxa tuꞌ.

20 Jex wet conobꞌ, ocanwejtoj yul je na, catuꞌ che majchen can eltej je puerta je yintaj. Cꞌubꞌawej el je bꞌa, masantaꞌcꞌal oj lawoj yecꞌtoj sjowal scꞌul Jehová.

21 Yutol oj eltej Jehová yul sdespacho, yu yaon oc syaꞌilal yibꞌan masanil ebꞌ ánima caan bꞌey sat txꞌotxꞌ txꞌotxꞌ tiꞌ. Jantaj ebꞌ makꞌbꞌil camoj, manxa oj ewbꞌale el ebꞌ yu txꞌotxꞌ txꞌotxꞌ tiꞌ, yutol oj txeclo a masanil jantaj spenail jix yun ebꞌ bꞌey yul yibꞌankꞌinal tiꞌ.