2 Jaxca xacꞌal junoj bꞌulan chꞌen chꞌen jix yun cantoj wan conobꞌ tuꞌ ja wu. Jaꞌ wan conobꞌ caw watxꞌ yeoc smuroal, pilan jix poꞌocantoj. Jix ja wakꞌ lawoj ey spalacio ebꞌ chi jowi oc kin jon, cꞌamxa bꞌakꞌin oj caꞌ waꞌnele a junelxa.

3 Yu jun tuꞌ xin, jaꞌ wan conobꞌ chi yiꞌa can sbꞌa yul yet, ey ja weloc apnoj yul sat ebꞌ tinaniꞌ, jaꞌ ebꞌ cꞌam smimancꞌulal oj xiw ebꞌ ey jaach.

4 Yutol jaꞌ ey jaach chi skeꞌ scolon sbꞌa ebꞌ yeynajil ánima, yutol cha colcan el ebꞌ eyoc yin syaꞌtajilal. Jaꞌ ebꞌ ánima pena snaꞌbꞌal, laan ebꞌ jaxca sjowal yaax nabꞌ, ma jaxca skꞌakꞌal yajan cꞌu yet chuman cꞌu. Jal jaach xin, jaach chon ja webꞌa el jaxca yenel junoj chꞌen chꞌen; chon ja colcan el tet junoj jow yaax nabꞌ, cꞌal tet sjowal yajan cꞌu.

5 Queyton tuꞌ chi yun ja wiꞌon ey smeynebꞌail ebꞌ chi jowi oc kin jon. Jaxca wal chi yun sicbꞌi sjowal yajan cꞌu yet chi oc enel yu asun, queytuꞌ chi yun sbꞌejon yel yaw ebꞌ pena snaꞌbꞌal.

6 Jaꞌ Jehová, Naj ey yipalil, oj swaꞌne junoj miman loꞌbꞌe bꞌey wonan Sión. Oj yakꞌ low masanil nación, manxa jantajoj swatxꞌil jun loꞌbꞌe oj yakꞌa, cꞌal vino tol caw watxꞌ scawxi.

7 Jaꞌ bꞌey jun tzalan tuꞌ, jatuꞌ oj yiꞌel Jehová masanil cuscꞌulal eyoc yibꞌan masanil nación, jaxca junoj kꞌap bꞌakꞌan oc yin junoj ánima.

8 Oj akꞌle lawoj camich yin junelne yu Jehová. Oj joꞌole tan yal sat masanil ánima yu Jehová. Oj yakꞌon qꞌueyel masanil qꞌuixwanil yin masanil ebꞌ conobꞌ bꞌey yul yibꞌankꞌinal tiꞌ, yutol queytuꞌ yalon canoj.

9 Jaꞌ yet jun cꞌual tuꞌ oj kalwej jaxca tiꞌ: Jaꞌton Jehová cu Diosal tiꞌ, asanne Naj jix kaoc yipoj cu cꞌul, yutol jaꞌ jix cu colon eloj. Kakꞌwej tzalabꞌoj cu cꞌul, yutol jaꞌ Naj jix cu coloni, cu chi ojabꞌwej.

10 Jaꞌ Jehová oj teynen txꞌotxꞌ tzalan Sión tiꞌ. Jaxa Moab, lalan stecꞌle eytoj yu Naj jaxca chi yun stecꞌle eytoj an chꞌim bꞌey yul junoj jolan yet kꞌalem.

11 Caxcꞌal mi oj to el jenan skꞌabꞌ conobꞌ Moab tuꞌ, jaxca chi yun junoj chi makꞌon jaꞌ jaꞌ; caxcꞌal chito yakꞌ yip, man xacꞌaltaꞌ oj colcha eloj, yutol oj lawoj ey smeynebꞌail tuꞌ yu Dios.

12 Oj eyqꞌuey wejlabꞌoj mimej smuroal sconobꞌ ebꞌ yu Jehová. Oj yucheyoj, tuxa cꞌal oj ey can wejan sat txꞌotxꞌ.