2 Jaꞌ ebꞌ yakꞌomal xaambꞌal, laan xacꞌal oj yun can ebꞌ jaxca ebꞌ comon ánima, laan xacꞌal oj yun ebꞌ naj patrón yetoj ebꞌ eyoc yin yakꞌomaloj servil, jaꞌ ebꞌ ix ix tol patrón yeoc xol yet ixal, laan cꞌal oj yun can yetoj ebꞌ ix eyoc yin yakꞌomaloj servil, cꞌal ebꞌ chi manwi, yetoj cꞌal ebꞌ chi txonwi, cꞌal ebꞌ chi akꞌon maanil, yetoj ebꞌ chi oc maan, yetoj cꞌal ebꞌ chi akꞌon junoj tzetyetal yin jecbꞌilal, cꞌal yetoj ebꞌ chi oc sjec tet junojxa, laan cꞌal oj yun ebꞌ masanil.

3 Tuxa cꞌal oj el tꞌiran jun yul yibꞌankꞌinal tiꞌ, yutol oj iꞌletoj masanil tzetyetal watxꞌ ey sat txꞌotxꞌ. Jaꞌton wan tiꞌ jix yal Jehová.

4 Jaꞌ jun yul yibꞌankꞌinal tiꞌ oj tajtoj, catuꞌ manxa watxꞌoj oj yun yili. Catuꞌ oj lawoj ey masanil ebꞌ mimej winaj.

5 Jix etextoj txꞌotxꞌ txꞌotxꞌ yu ebꞌ caan sat txꞌotxꞌ tiꞌ, yutol ma sjije sleyalil ebꞌ, ma sjije ẍejbꞌanil Dios ebꞌ, caw jix yetnetoj jun swa kꞌane ebꞌ jix swaꞌne yetoj Dios, jaꞌton jun wa kꞌane waꞌnebꞌil tol ey cꞌal yin tobꞌalkꞌinal.

6 Yu jun tuꞌ, yuxan jix tit can syaꞌtajilal yibꞌan txꞌotxꞌ txꞌotxꞌ tiꞌ. Jaꞌ masanil ebꞌ caan sat txꞌotxꞌ, chi yabꞌ syaꞌil ebꞌ yu tzetyetal jix sloctej yibꞌan. Yu jun tuꞌ, yuxan lalan sqꞌueya ebꞌ, jaywanxane mactxequel eyecꞌoj.

7 Cꞌamxa yal uva chi waꞌxi, jix tajtoj an uva. Ey mactxequel jix eecꞌ yin tzalacꞌulal, jaxa tinaniꞌ, yin xacꞌal cuscꞌulal eyocoj.

8 Cꞌamxa waabꞌ cꞌal arpa chi oc bꞌey kꞌin, cꞌamxa mac chi yakꞌ tzalabꞌoj scꞌul.

9 Cꞌamxa mac chi ucꞌwi vino yet chi oc son cꞌal yet chi oc bꞌit. Jaꞌ teꞌ an tuꞌ, kꞌaꞌxa yuqꞌui chi yabꞌ ebꞌ chi ucꞌwi cꞌaltaꞌ an.

10 Jaꞌ wan conobꞌ pit chi yute sbꞌa, uchquiltaj xacꞌal yeocoj, cꞌamxa mac chi skeꞌ yoctoj yul junoj na.

11 Jaꞌ ebꞌ ánima, tuxa cꞌal chi okꞌ ebꞌ yul-laj calle, yutol cꞌamxa vino chi waꞌxi. Tuxa jix lawi ey masanil tzalacꞌulal; jaxa cꞌal cuscꞌulal jix jul sat txꞌotxꞌ txꞌotxꞌ tiꞌ.

12 Jaꞌ jun conobꞌ tuxa jix etextoj, jix poꞌotoj spuertail masanil.

13 Jaꞌ bꞌey masanil nacionlaj ey bꞌey sat txꞌotxꞌ txꞌotxꞌ tiꞌ, jaywanxane ánima oj canoj. Jaxca chi yun scancan junjunojxa sat teꞌ olivo chi cancan yet xax makꞌle eytej sat teꞌ yet scaelal, jaxca cꞌal pax chi yun scancan junjunojxa an uva yet xax ecꞌ uxle yet scaelal, queytuꞌ oj yun canoj.

14 Jaꞌ ebꞌ oj to colcha can tuꞌ, oj el yaw ebꞌ yu tzalacꞌulal, oj bꞌitnoj ebꞌ sattaj Jehová, jaꞌ ebꞌ ey yetcꞌulal bꞌey chi too cꞌu, oj abꞌle yel yaw ebꞌ tet Jehová,

15 yetoj cꞌal pax ebꞌ bꞌey chi aol cꞌu, cꞌal wan nacionlaj ey bꞌey skꞌaxepal jaꞌ mar, tol oj yal watxꞌ kꞌane ebꞌ yin Jehová, sDiosal Israel.

16 Oj abꞌle sbꞌitni ebꞌ masanil bꞌey stiꞌlaj el txꞌotxꞌ txꞌotxꞌ bꞌey slawubꞌal yul yibꞌankꞌinal tiꞌ, jaꞌton bꞌit tet jun caw watxꞌ snaꞌbꞌal.

¡Ay, caw okꞌbꞌal jin cꞌul, lalan jin lawi ey chi wabꞌe! ¡Yutol caw eyto ebꞌ chi yetne yet animail, jaꞌton ebꞌ pena snaꞌbꞌal tuꞌ, caw pena tzet chi yun ebꞌ!

17 Jaꞌ ebꞌ caan sat txꞌotxꞌ txꞌotxꞌ tiꞌ, caw oj xiw ebꞌ jaxca noꞌ noꞌ ujtebꞌil oc yu mac chi ujten noꞌ. Ey smey yeyqꞌuey noꞌ yul junoj jolan, ma yul junoj yaal.

18 Jaꞌ noꞌ noꞌ chi elcan yul skꞌabꞌ mac chi ujten ecꞌoj, jaxa yul junoj jolan chi eyqꞌueyi; jal noꞌ noꞌ chi atej yul junoj jolan tuꞌ junelxa, jaxa yul junoj yaal chi eyqꞌueyi. Oj eyqꞌuey jun miman yaax nabꞌ, catuꞌ oj bꞌilwoj cimientoal yich txꞌotxꞌ txꞌotxꞌ tiꞌ.

19 Yel xacꞌal ey smey oj yun sbꞌilwoj yul yibꞌankꞌinal tiꞌ, oj tzicoꞌtanele sicꞌlebꞌil, catuꞌ oj poꞌotoj.

20 Tuxa cꞌal oj ecꞌ tzꞌeytzꞌon txꞌotxꞌ jaxca uqꞌuem an, tuxa cꞌal oj wacxoj a jaxca chi yun swacxi a junoj yaliẍ pat yu kajxuchum. Yutol jaꞌ spenail ebꞌ ánima, jix ecꞌ xacꞌal yibꞌan, yuxan oj telcꞌo xacꞌaltoj, catuꞌ cꞌamxa bꞌakꞌin oj a waanoj.

21 Jaꞌ yet jun cꞌual tuꞌ, jaꞌ Jehová oj aon oc syaꞌilal yibꞌan ebꞌ pena espíritu chi ecꞌ yul yibꞌankꞌinal tiꞌ, yetoj yibꞌan ebꞌ rey bꞌey sat txꞌotxꞌ tiꞌ. Oj ale oc syaꞌilal ebꞌ titiꞌ.

22 Oj yambꞌale oc ebꞌ jaxca chi yun syambꞌale oc junoj bꞌulan ebꞌ tol eyoc preso yul junoj jolan. Miman tiempo oj maji oc ebꞌ, catuꞌ oj ale oc syaꞌilal yibꞌan ebꞌ.

23 Jaꞌ yet jun cꞌual tuꞌ, jaꞌ Jehová oj yakꞌ yaawil, Naj Yaaw yeoc bꞌey wonan Sión, jaꞌton bꞌey Jerusalén. Jaꞌ yet tuꞌ cajin xacꞌal oj yun can el xꞌaaw cꞌal yetoj cꞌu, yutol caw chi tzejeji yili yipalil Jehová, yutol oj yakꞌ yaawil sattaj ebꞌ yaaw yeoc yul conobꞌ.