Jaꞌ Tzet Albꞌilcan Yin Conobꞌ Tiro Cꞌal Sidón Yu Jehová
23
Jaꞌ wan kꞌane tiꞌ jix al-le yin conobꞌ Tiro:Jex iꞌom bꞌey barco chi tit bꞌey Tarsis, el ojabꞌ je yaw yu bꞌiscꞌulal, yutol tuxa jix uchle ey conobꞌ Tiro, cꞌamxa na eyaoj, tam wal eyto bꞌey chi oc kꞌalan teꞌ barco. Jaꞌ yet ey jex ecꞌ bꞌey conobꞌ Chipre, jaꞌ tituꞌ jix al-le je yabꞌe.
2 Jex caan jex bꞌey stiꞌlaj jaꞌ mar, cꞌal jex txonwom a Sidón, tzꞌin cꞌal je chi, jaꞌton jex tol che chejtoj je manwom bꞌey skꞌaxepal ecꞌtoj jaꞌ mar.
3 Chi apni oc ebꞌ manwom tuꞌ bꞌey Egipto yu smanon ixim tiriw ebꞌ, chi el ebꞌ bꞌey stiꞌlaj jaꞌ Nilo, catuꞌ chi xonon ebꞌ bꞌey wanxa conobꞌlaj. Jaꞌton yin wan tuꞌ che yiꞌ yuneꞌ je tumin.
4 Jex a Sidón, qꞌuixwanej, jex tol bꞌinabꞌil je conobꞌ ey bꞌey stiꞌ jaꞌ mar yu je jelanil. Oj je yakꞌle je yalon jaxca junoj ix ix tol man cꞌaltaꞌ yotaj oj syaꞌil yali unin, quey jon tuꞌ, je chi.
5 Jaꞌ yet oj apnoj oc skꞌaneal jun tuꞌ bꞌey Egipto, caw oj oc ebꞌ ánima tuꞌ yin bꞌiscꞌulal yu tzet jix yun bꞌey conobꞌ Tiro.
6 Oj yal ebꞌ jaxca tiꞌ: Kꞌaxbꞌojonwej ecꞌtoj bꞌey Tarsis. El ojabꞌ je yaw yu cuscꞌulal, jantaj jex caan jex bꞌey stiꞌlaj jaꞌ mar, ẍi ebꞌ.
7 ¿Tumi jaꞌ jun je conobꞌ tiꞌ tol ey cꞌaltaꞌ yet peyxa, jun tol kꞌin cꞌaltaꞌ ye masanil tiempo? ¿Jaꞌ mi yu jun tuꞌ, yuxan jix too tacꞌal naat yin swaꞌnen a wanojxa conobꞌ cꞌal scaey ecꞌoj?
8 ¿Mactxequel jix naꞌon jun tiꞌ yin Tiro, jun conobꞌ tol yet ebꞌ rey yeocoj? Jaꞌ ebꞌ txonwom tituꞌ, mimej winaj cꞌal yeoc ebꞌ, caw bꞌinabꞌil ebꞌ txonwom tuꞌ bꞌey yul yibꞌankꞌinal tiꞌ.
9 Jaꞌ Jehová, Naj ey yipalil, jaꞌ jix naꞌoni, yu yiꞌle ey masanil ebꞌ chi smeyne sbꞌa, cꞌal yeyqꞌuey ebꞌ jelan chi yute sbꞌa sat txꞌotxꞌ tiꞌ.
10 Jex a conobꞌ Tarsis, tuxa jix lawi el jun conobꞌ bꞌey chex bꞌet txonwoj. Jaꞌ tinaniꞌ, mulnaanwej sat je txꞌotxꞌ, jaxca chi yute sbꞌa ebꞌ a Egipto.
11 Tuxa jix yatoj skꞌabꞌ Jehová yibꞌan jaꞌ mar, jix yakꞌon bꞌilwoj masanil nacionlaj, jix yalon pax oj tol chi makꞌle ey wejna smuroal wan conobꞌ ey yul yet Canaán.
12 Jix yalon Dios tet ebꞌ a Sidón jaxca tiꞌ: Bꞌejwej je yaon oc kꞌin jex a Sidón, yutol tuxa jix jex etex el jaxca junoj ix kꞌopo ix chi mulwi. Caxcꞌal mi chex too caey ecꞌ bꞌey Chipre, tam wal tol oj jex toj xew niꞌoj tituꞌ, ẍi Dios.
13 Ilwej tzet jix yun cantoj txꞌotxꞌ xꞌotxꞌ ebꞌ a Babilonia. Manxa txequeloj bꞌey eyoc jun conobꞌ tuꞌ, jix oc can scalubꞌaloj noꞌ xol-laj teꞌal noꞌ. Oj swaꞌne oc swalubꞌ ebꞌ yinlaj conobꞌ Babilonia tuꞌ, oj yuchon ey mimej na ebꞌ.
14 Jex iꞌom bꞌey barco bꞌey Tarsis, el ojabꞌ je yaw yu bꞌiscꞌulal, yutol jix uchcha ey jun conobꞌ eyoc yipoj je cꞌul.
15 Jaꞌ yet jun tiempoal tuꞌ, jaꞌ conobꞌ Tiro oj tojcan qꞌueycꞌulal yin 70 abꞌil, jaxca stiempoal skꞌinal junoj rey. Jaꞌ yet oj lawoj 70 abꞌil tuꞌ xin, catuꞌ oj jul yibꞌan conobꞌ Tiro jaxca tzet chi yal jun bꞌit chi bꞌitnele yin jun ix amul ix, bꞌey chi yal jaxca tiꞌ:
16 Jaach amul ix, cꞌamxa mac chach naꞌoni, iꞌtoj ja warpa, catuꞌ chach ecꞌ xol conobꞌ tiꞌ, watxꞌ chi yun ja tenon teꞌ, catuꞌ cha bꞌitnen ecꞌaloj bꞌit, tala cꞌuxan chach naꞌletej, ẍi jun bꞌit tuꞌ.
17 Jaꞌ yet oj lawoj jun 70 abꞌil tuꞌ, jaꞌ Dios oj ẍaꞌ scꞌul, oj el pax yich jun conobꞌ tuꞌ junelxa, catuꞌ oj ẍaꞌon pax el yich xonwi ebꞌ a Tiro junelxa, cꞌal yoc pax ebꞌ yin yunen spenail yetoj ebꞌ rey bꞌey masanil sat yul yibꞌankꞌinal tiꞌ. 18 Jaꞌ jantaj tzet oj yiꞌ ebꞌ yin xon tuꞌ, yet Jehová oj yun can ocoj. Cꞌam cꞌal tzet oj cꞌubꞌale ecꞌoj, tol masanil oj akꞌle tet ebꞌ chi akꞌon servil Jehová, yet watxꞌ chi sman mimanoj sloꞌbꞌe ebꞌ, cꞌal smanon spichil ebꞌ tol caw watxꞌ.