Jaꞌ Tzet Jix Al-le Can El Yibꞌan Conobꞌ Jerusalén
22
Jaꞌton wan kꞌane tiꞌ jix al-le can el yibꞌan conobꞌ Jerusalén,bꞌey chi txꞌoxle el tzet naꞌbꞌil yu Jehová, yet jix yalon jaxca tiꞌ: ¿Tzet chex ioni, yuxan chex atoj je masanil yibꞌanlaj na?
2 Tuxa cꞌal chi wejlabꞌi yel je yaw yu taccꞌulal. Jaꞌ ebꞌ ánima jix cam je xol, man tol oj jix makꞌle cam ebꞌ yu chꞌen espada xol jowal, jaꞌ ebꞌ jix cam tuꞌ, ey ebꞌ jix cam yu wail cꞌal yu yaꞌbꞌil.
3 Masanil ebꞌ yaaw yeoc je xol, oj ela ebꞌ, catuꞌ oj michꞌcha ey ebꞌ yet cꞌamto chi julwa ebꞌ. Caxcꞌal mi caw naat oj toj ebꞌ soldado tol caw jelan yakꞌon jowal, oj michꞌcha cꞌaltaꞌ ey ebꞌ masanil catuꞌ oj ale oc ebꞌ yul preso.
4 Yu jun tuꞌ, chi walon jaxca tiꞌ: Elanwej jin cꞌatan, tol chi woche chin okꞌ sicꞌlebꞌil. Cꞌam ojabꞌ che yakꞌ smimanil jin cꞌul yu jantaj syaꞌtajilal oj jul yibꞌan cu conobꞌ tiꞌ.
5 Yutol jaꞌ Jehová, Naj ey yipalil, jix yalaꞌ tol oj jul jun scꞌual yet ey mimej xiwcꞌulal, yet ey uchlebꞌail, cꞌal somcꞌulal bꞌey spananil sjobꞌeal bꞌey chi txꞌoxle el tzet naꞌbꞌil yu Dios. Oj uchle ey smuroal, oj abꞌle yel yaw ebꞌ conobꞌ masantaꞌcꞌal bꞌey sjolomlaj wonan.
6 Jaꞌ ebꞌ a Elam, lalan swaꞌnen sjulbꞌal ebꞌ, eyxa oc ebꞌ yul-laj scarruaje yet jowal, cꞌal yibꞌan che. Jaxa ebꞌ a Quir, lalan yiꞌon eltej smajbꞌal sat julbꞌal ebꞌ.
7 Jaꞌ masanil wan spananil sjobꞌeal bꞌey watxꞌ yili je yinlaj, nonaj xacꞌal el yu carruaje yet jowal; jaꞌ ebꞌ eyoc yibꞌan che, lalan yoc yakꞌon jowal ebꞌ bꞌey stiꞌ spuertail je conobꞌ.
8 Jaꞌ wan bꞌey chi scol sbꞌa Judá, tuxa jix lawi eyoj.
Jaꞌ yet jun cꞌual tuꞌ, jix je yaoc je naꞌbꞌal yin wan mitxꞌkꞌabꞌe yet jowal yaman ecꞌ bꞌey jun teꞌ miman na chi yij sbꞌi, snail teꞌ teꞌ yet Líbano. 9 Jix je yiloni, tol ecꞌal bꞌey ey spoꞌoilal smuroal sconobꞌ David. Jix je yakꞌon noel jun bꞌey chi yambꞌale jaꞌ jaꞌ bꞌey yalan eytoj tuꞌ. 10 Jix cꞌoli je yilon wan na bꞌey Jerusalén; jix je yuchon ey wan na yu je yaon oc yipomaloj smuroal. 11 Jaꞌ bꞌey snan xol caabꞌ muro jix je waꞌne jun scꞌuanbꞌal jaꞌ jaꞌ, jatuꞌ jix toocan jaꞌ jaꞌ ey yul jun sneetal jaꞌ tol peyxa taxa. Ma cam je naꞌoni, yutol jaꞌ Dios jix waꞌnen masanil wan tuꞌ, yutol peyxa tax cꞌal naꞌbꞌil wan tuꞌ yu Dios, caw cꞌam niꞌoj yeloc apnoj Naj yul je sat.
12 Jaꞌ yet jun cꞌual tuꞌ, jaꞌ Jehová Naj Yaaw yin Masanil, jaꞌ jix jex awteni yu je yokꞌi, cꞌal yu je cusi, cꞌal yin je tzujon el xil je jolom, cꞌal je yaon oc an eel pichile, yu je txꞌoxon el je cuscꞌulal yu je penail.
13 Jaꞌ tiꞌ je yet, tol asanne tzalacꞌulal che yun yin je kꞌin. Che makꞌon cam noꞌ wacax cꞌal noꞌ meꞌ, chi oc loꞌo je yu cꞌal je yuqꞌuen vino. Che yalon jaxca tiꞌ: Lowojonwej, kucꞌwej an, yutol tala jaꞌ yet yecal chi cu cami, je chi.
14 Jaꞌ Jehová, Naj ey yipalil, jaꞌ jix xꞌox sbꞌa ey jin, catuꞌ jix yalon ey jin jaxca tiꞌ: Jaꞌ jun spenail chi yun ebꞌ ánima tiꞌ, man oj wakꞌ mimancꞌulal yu spenail chi yun ebꞌ tuꞌ, masantaꞌcꞌal tol oj cam ebꞌ, ẍi Dios.
Kꞌane Yin Naj Yilomal Mulnail Bꞌey Spalacio Naj Rey
15 Jaꞌ Jehová, Naj ey yipalil, jaꞌ jix alon ey jin jaxca tiꞌ: Asiꞌ il naj Sebná, naj eyoc yilomaloj mulnail bꞌey spalacio naj rey, catuꞌ cha walon tet jaxca tiꞌ:
16 ¿Tzetyetal cha waꞌne titiꞌ? ¿Mactxequel jix akꞌon ja wopiso yet cha waꞌne a jun smujbꞌanil camom tiꞌ, cꞌal yet cha waꞌnen jun jolan bꞌey jun tzalan tiꞌ, catuꞌ cha jolon octoj jun jolan bꞌey satlaj chꞌen bꞌey oj jaach can ja naꞌoni?
17 Caxcꞌal miman ja weloc apnoj ja waloni, jaꞌ Jehová naat oj jaach skꞌojtoj. Oj jaach mitxꞌle ey yu yetoj masanil yip, oj jaach mitxꞌle ey yu yetoj yipalil,
18 oj jaach skꞌojtoj pil-labꞌoj jaxca junoj pelota, naat oj jaach skꞌojcantoj bꞌey jun txꞌotxꞌ caw miman sat. Jaꞌ tituꞌ oj jaach camoj, oj oc tucan wan ja carruaje eyoc yipoj ja cꞌul cꞌal ja mimanbꞌilal, caw oj ja wakꞌ sqꞌuixwiloj naj ja waawil bꞌey spalacio, jaꞌton naj ja reyal.
19 Jix yalon Jehová ey jin jaxca tiꞌ: Jain oj jaach wiꞌel yin ja wopiso bꞌey ey jaach oc tiꞌ, catuꞌ oj jaach jin kꞌojon el bꞌey ey jaach ecꞌ tiꞌ.
20 Jaꞌ yet jun cꞌual tuꞌ, oj wawte naj jin chejabꞌ Eliaquim, naj scꞌaal Hilquías, jaꞌton oj oc ja qꞌuexeloj.
21 Jaꞌ ja pichil cha waoc yin ja wopiso, cꞌal ja kꞌalil yet chach bꞌinalei, catuꞌ oj wakꞌon can ja wopiso tuꞌ tet naj Eliaquim. Jaxca wal junoj mame oj yun can oc xol ebꞌ caan bꞌey Jerusalén, yetoj cꞌal xol conobꞌ Judá.
22 Jaꞌ yul skꞌabꞌ jun yicꞌaal naj rey David, oj waoc slaweal sna ebꞌ rey; cꞌam mac oj skeꞌ smajchen puerta ta tol jaꞌ oj jajonoj, tam wal ey mactxequel oj skeꞌ sjajoni, ta tol jaꞌ oj majchenoj.
23 Caw watxꞌ oj wute waon oc yin yopiso tuꞌ. Laan jaxca chi yun smakꞌle ey yestacail junoj na yet watxꞌ cꞌam chi bꞌilwi bꞌey eyocoj, oj bꞌinale can ecꞌ yu syaawil yican smam.
24 Jaꞌ masanil ebꞌ yican smam, yetoj cꞌal ebꞌ yicꞌaal, ebꞌ uninale cꞌal ebꞌ itxiquine, jaꞌton wan tuꞌ, eyoc yibꞌan yin yilontoj masanil mitxꞌkꞌabꞌe, jaxca bꞌey chi locbꞌale a masanil neet.
25 Oj apnoj oc scꞌual jaꞌ naj Eliaquim oj oc spenail yetoj cꞌal masanil ebꞌ yican tol chi yaoc scꞌul yin naj, jain oj jin naꞌoc yin ebꞌ, yuxan pilan oj tan el masanil tzet eyoc yibꞌan yilontoj, jaxca chi yun yiꞌle el slawuẍal junoj na catuꞌ chi ey bꞌulnaoj, ẍi Jehová.