Kꞌane Jix Al-le Can Yu Tzet Oj Yun Yeyqꞌuey Babilonia
21
Jaꞌ wan kꞌane jix al-le can el yin txꞌotxꞌ cusiltaj txꞌotxꞌ bꞌey stiꞌ jaꞌ mar.Jaxca wal junoj jow kaꞌeꞌ chi ecꞌ yul yet txꞌotxꞌ Négueb, queytuꞌ oj yun sqꞌueyle el txꞌotxꞌ cusiltaj txꞌotxꞌ, jaꞌton txꞌotxꞌ caw ey smey.
2 Eyxa smey jun tzetyetal jix txꞌoxle wil yin weyicheal yu Dios tiꞌ: Jaꞌ mactxequel pena chi yute snaꞌbꞌal yin yet animail, pena chi yunne. Jaꞌ mactxequel chi makꞌwi cam ánima, ey cꞌaltaꞌ mac chi smakꞌ camoj. Jex soldado a Elam, asiꞌwej yin jowal. Jex a Medos, ocanwej joyan yin conobꞌ Babilonia. Jain Jehová jin tiꞌ, oj waoc syaꞌilal yibꞌan jun conobꞌ tiꞌ, jaxca wal jix yun yaon oc syaꞌilal je yibꞌan.
3 Caw yaꞌ jin mimanil chi wabꞌe, tuxa cꞌal chin ecꞌ txꞌumumoj yu syaꞌil jaxca chi yun ix ix yet chi waꞌxi scꞌul yu unin. Chin oc yin bꞌiscꞌulal yu tzet chi wabꞌe, chin xiwa yu tzet chi wilaꞌ.
4 Caw chi somcha el jin naꞌbꞌal, caw wal pena xacꞌal jin cꞌul chi wabꞌ yu ey smey. Cꞌam taꞌle tzet chin naꞌ yet junjun yeycꞌualil; jaxa tinaniꞌ, xiwcꞌulal xacꞌal jix yute oc sbꞌa win.
5 Jix swaꞌne ey meẍa ebꞌ, cꞌal swaꞌnen ey chem ebꞌ; bꞌey chi ey wojan ebꞌ ánima lowoj cꞌal yuqꞌuen jaꞌ ebꞌ, lalanto wal tuꞌ, catuꞌ chi oc jun aw jaxca tiꞌ: Jex yaawil jex soldado, aanwej waanoj, akꞌwej lista je mitxꞌkꞌabꞌ yet jowal cꞌal je majbꞌal sat julbꞌal, ẍi jix wabꞌe.
6 Yutol jaꞌ Jehová jix alon ey jin jaxca tiꞌ: Oc ojabꞌ junoj yilomal, yet watxꞌ chi yal masanil tzet chi yilaꞌ.
7 Ta tol chi yil stit carruaje tokꞌbꞌil oc yu cacꞌonoj che, ma ánima eyoc yibꞌan noꞌ bꞌuru, ma yibꞌan noꞌ camello, chi cam wal yiloni, tzet utbꞌil yili, ẍi Dios.
8 Jaꞌ jun chi majon tuꞌ, jix el yaw jix yalon jaxca tiꞌ: Jaꞌ bꞌey chin majwa tiꞌ an, ey jin cꞌal ecꞌ junjun cꞌu, cꞌal junjun akꞌbꞌal yin jin majoni.
9 Jaꞌ tinaniꞌ, chi wil stit jun carruaje tokꞌbꞌil oc yu cacꞌon noꞌ che, ẍi jun majwawom tuꞌ. Jix yalon jun mactxequel jaꞌjun yetoj carruaje tuꞌ jaxca tiꞌ: Jix eyqꞌuey conobꞌ Babilonia, jix lawi eyoj. Masanil yechel wan comon dios jix poꞌotoj ebꞌ, jaxca xacꞌal chi yuney wejan spoꞌoil txꞌotxꞌ xi, ẍi naj majwawom tuꞌ.
10 Abꞌwej jex wet conobꞌ, tol jix jex tecꞌle ey yu ebꞌ a Babilonia, jaxca chi yun stecꞌle el ixim tiriw cꞌal xayele eloj. Lalan walon ey jex tzetyetal jix wabꞌe tzet jix yal Jehová, Naj ey yipalil, jaꞌton cu Diosal jaon Israel jon tiꞌ.
Jaꞌ Tzet Jix Al-le Can El Yibꞌan Conobꞌ Edom
11 Jaꞌ wan kꞌane tiꞌ jix al-le can el yin conobꞌ Edom: Ey jun mactxequel jix awitej ey jin bꞌey Edom, jix yalon jaxca tiꞌ: Jaach majwawom; ¿jantaj to sajbꞌi tinaniꞌ cha wilaꞌ? ẍi.
12 Jix jin takꞌwi tet jaxca tiꞌ: Tuxa chi sajbꞌi, asan xin, oj kꞌejbꞌoj pax junelxa. Ta cha woche cha kꞌanle junelxa, meltzaan jul ja kꞌanle, jin chi tet.
Jaꞌ Tzet Jix Al-le Can El Yibꞌan Conobꞌ Arabia
13 Jaꞌ wan kꞌane tiꞌ jix al-le can el yin conobꞌ Arabia: Jex txonwom a Dedán, tol chi ecꞌ akꞌbꞌal je yu bꞌey cusiltaj txꞌotxꞌ bꞌey Arabia,
14 elanwejtoj je chaꞌon jun mac ey stajin tiꞌal, catuꞌ che yakꞌon jaꞌ yuqꞌueꞌ. Jantaj jex caan jex bꞌey conobꞌ Temá, elanwejtoj bꞌey chi ecꞌtoj ebꞌ chi elaoj, catuꞌ che yalten loꞌbꞌe tet ebꞌ.
15 Yutol lalan yela ebꞌ tet chꞌen espada, jaꞌton tet chꞌen espada caw eel yee, cꞌal tet julbꞌal tol watxꞌ xa yeoc yet chi jul-letoj, jaꞌton bꞌey jow yakꞌon jowal.
16 Jaꞌ Jehová jix alon ey jin jaxca tiꞌ: Jaꞌ yet jun abꞌil tinaniꞌ, jaxca chi yun sbꞌison scꞌu junoj mulnawom yu Jantajxa tiempo chi mulnai, queytuꞌ sbꞌisil scꞌual oj yun slawi ey masanil sbꞌinabꞌilal conobꞌ Quedar.
17 Jaꞌ ebꞌ a Quedar lalan yakꞌon jowal, jaywanxane ebꞌ oj canoj. Queytuꞌ chi yun walon jain Jehová je Diosal jin tiꞌ, jaex Israel jex tiꞌ, ẍi Dios.