Jix sjije Isaías yunen jaxca tuꞌ, jix yiꞌon el xanabꞌ cꞌal spichil, jaxa cꞌal yet yul spichil jix cani. 3 Jix lawi tuꞌ xin, jix yalon Jehová: Jaꞌ naj jin chejabꞌ Isaías tiꞌ, oxebꞌ abꞌil jix bꞌeyecꞌ yin cꞌam xanabꞌ eyocoj, jaxa cꞌal yet yul spichil eyocoj, yu xꞌoxbꞌanilal yin conobꞌ Egipto, cꞌal yin Etiopía. 4 Yutol jaꞌ sreyal Asiria oj iꞌontoj ebꞌ a Egipto, yetoj cꞌal ebꞌ a Etiopía jaxca yin presowomal, oj iꞌletoj ebꞌ icham winaj cꞌal ebꞌ achꞌe, oj iꞌletoj ebꞌ yin cꞌam xanabꞌ ebꞌ eyocoj, cꞌal yin tol tꞌiran el ebꞌ, tol tax txequel ẍop ebꞌ, yet watxꞌ chi el sqꞌuixwil ebꞌ. 5 Jaꞌ ebꞌ a Egipto, cꞌal ebꞌ a Etiopía, eyoc yipoj scꞌul ebꞌ Filisteo, tuxa cꞌal oj xiwcan a ebꞌ, yutol caw qꞌuixwiltaj oj utele caabꞌ conobꞌ tuꞌ. 6 Jaꞌ yet jun tiempoal tuꞌ, masanil ebꞌ caan bꞌey stiꞌlaj jaꞌ mar, jaꞌton ebꞌ Filisteo oj yalon ebꞌ jaxca tiꞌ: Ilwej wal tzet jix yun can mactxequel tol eyoc yipoj cu cꞌul, mac bꞌey chi kal cu bꞌa tinaniꞌ, catuꞌ chi cu kꞌanon scolwal ketoj, yet chi cu scolon el tet naj sreyal Asiria tuꞌ: ¿Tzet to wal oj yun cu colon cu bꞌa jaon tiꞌ? ẍi ebꞌ, ẍi Dios.