Jaꞌ Tzet Albꞌilcan El Yibꞌan Conobꞌ Egipto
19
Jaꞌ wan kꞌane jix al-le el yin Egipto:Ilwej ton abꞌ sjul Jehová yibꞌan jun asun, yelcꞌulal chi bꞌey stoo bꞌey Egipto. Caw wal chi bꞌilwi a wan comon dios sattaj Naj, catuꞌ chi xiw cꞌal pax a ebꞌ ánima a Egipto tuꞌ.
2 Chi yalon Jehová jaxca tiꞌ: Oj wakꞌ spoꞌole sbꞌa ebꞌ ánima a Egipto tuꞌ, catuꞌ oj yakꞌlen a jowal ebꞌ yuẍtaj sbꞌa. Jaꞌ ebꞌ yamigo sbꞌa oj yakꞌ jowal ebꞌ, jaxa wan conobꞌlaj oj smitxꞌle sbꞌa yin jowal, yetoj cꞌal pax nacionlaj oj yakꞌle jowal.
3 Oj wakꞌ etex el snaꞌbꞌal ebꞌ, catuꞌ oj etextoj masanil tzetyetal naꞌbꞌil yu ebꞌ, yuxan oj yal sbꞌa ebꞌ tet comon dios, cꞌal tet ebꞌ atxum, yetoj tet spixan camom, cꞌal tet ebꞌ naꞌom el kꞌane.
4 Jain ton Jehová Yaaw jin yin Masanil, jain chi walaꞌ, tol oj waoc junoj rey bꞌey Egipto tol pena snaꞌbꞌal, caw okꞌbꞌal cꞌul oj yun ebꞌ ánima yu, ẍi Dios.
5 Oj lawoj a jaꞌ miman Nilo, tajin xacꞌal oj yun cantoj yul sbꞌe jaꞌ masanil.
6 Tuxa cꞌal oj a sabꞌ bꞌey sbꞌe jaꞌ tuꞌ, yutol masanil jaꞌ jaꞌ chi el sne bꞌey Egipto, oj eytej jaꞌ masantaꞌcꞌal oj tantoj jaꞌ. Oj tajtoj teꞌ aa, cꞌal an akꞌteꞌ ey stiꞌlaj jaꞌ.
7 Masanil an akꞌteꞌ ey bꞌey stiꞌlaj jaꞌ Nilo, yetoj cꞌal masanil tzet awoal awbꞌil bꞌey stiꞌlaj jaꞌ tuꞌ, oj tajtoj masanil.
8 Masanil ebꞌ mitxꞌom pescado bꞌey stiꞌ jaꞌ Nilo tuꞌ, yetoj ebꞌ chi skꞌojeytoj xim yul jaꞌ, oj el yaw ebꞌ yu cuscꞌulal, yutol lalan stantoj jaꞌ.
9 Oj yakꞌ caabꞌcꞌulal ebꞌ chi xion an txꞌal lino. Jaꞌ ebꞌ chi chemon an, tuxa cꞌal oj somcha can el snaꞌbꞌal ebꞌ.
10 Tuxa cꞌal oj tac can el scꞌul ebꞌ chi waꞌnen an kꞌap, catuꞌ oj somcha xacꞌal el snaꞌbꞌal ebꞌ mulnawom masanil.
11 Yel xacꞌal cꞌam snaꞌbꞌal ebꞌ yaaw yeoc bꞌey conobꞌ Soan. Jaꞌ ebꞌ aom oc naꞌbꞌale bꞌey Egipto, junelne cꞌamxa niꞌoj yeloc apnoj snaꞌbꞌal ebꞌ tuꞌ. Caxcꞌal mi chi xij yal ebꞌ tet naj sreyal Egipto jaxca tiꞌ: Jaon tiꞌ jon, yicꞌaal jon ebꞌ jelan snaꞌbꞌal, yicꞌaal jon ebꞌ rey yet tax cꞌal peyxa, ẍina ebꞌ.
12 Jaach Faraón, ¿bꞌeytuꞌ ey ebꞌ chi akꞌon ja naꞌbꞌal tinaniꞌ, yet watxꞌ chi xꞌox ebꞌ, cꞌal yalon el ebꞌ ey jaach tzetyetal naꞌbꞌil yin Egipto tiꞌ yu Jehová, jaꞌton Naj ey yipalil?
13 Jaꞌ ebꞌ yaaw bꞌey conobꞌ Soan, cꞌam snaꞌbꞌal ebꞌ; jaꞌ ebꞌ yaaw yeoc bꞌey conobꞌ Menfis, jix yakꞌ sbꞌa ijbꞌale qꞌueytoj ebꞌ. Jaꞌ ebꞌ yaaw tuꞌ, jix ijbꞌantoj ebꞌ a Egipto yin pena bꞌeybꞌale.
14 Jaꞌ Jehová jix akꞌon somcha a snaꞌbꞌal ebꞌ yaaw yeoc xol ebꞌ, jaꞌton ebꞌ chi ijbꞌantoj ebꞌ a Egipto yin bꞌeybꞌale man watxꞌoj. Masanil tzetyetal chi yun ebꞌ, laan wal jaxca junoj uqꞌuem an tol chi xabꞌi, catuꞌ chi telcꞌotoj.
15 Cꞌamxa ebꞌ a Egipto chi skeꞌ scolon el sconobꞌ, caxcꞌal bꞌeom ma mebꞌa, caxcꞌal miman yeloc apnoj, ma man otajbꞌiloj, cꞌamxa chi skeꞌ scolwa ebꞌ.
16 Jaꞌ yet jun cꞌual tuꞌ, masanil ebꞌ a Egipto, laan xacꞌal oj yun can el ebꞌ jaxca ebꞌ ix ix, caw oj bꞌilwoj a ebꞌ yu xiwcꞌulal yet oj yilon ebꞌ sjul syaꞌilal oj aletej yu Jehová, jaꞌton Naj Yaaw yin Masanil. 17 Caw oj xiwa ebꞌ a Egipto tuꞌ sattaj ebꞌ a Judá. Asan yet oj snaꞌon ebꞌ a Egipto tuꞌ tzet oj yun skꞌanbꞌalnele ebꞌ a Judá yu Jehová, catuꞌ oj xiwa ebꞌ. 18 Jaꞌ yet jun cꞌual tuꞌ, ey joebꞌ conobꞌ bꞌey Egipto oj skeꞌ skꞌanabꞌ yin Hebreo, catuꞌ oj yakꞌon stiꞌ ebꞌ tet Jehová, jaꞌton Naj ey yipalil. Jaꞌ junoj wan conobꞌ tuꞌ oj yij sbꞌi, conobꞌ Cꞌu.
19 Jaꞌ yet jun cꞌual tuꞌ, ey jun yet xaambꞌal yet Jehová oj waꞌxoj yul yet Egipto tuꞌ. Jaꞌ bꞌey scawilal smoonal conobꞌ Egipto tuꞌ, jatuꞌ oj waꞌxoj a linan junoj chꞌen chꞌen yu yiꞌle a can sbꞌi Jehová. 20 Jaꞌ jun tuꞌ oj oc yin txꞌoxbꞌanileal yu Jehová, tol jaꞌ bꞌey Egipto ey mac chi oc yin eyilal tet Jehová. Jaꞌ yet oj el yaw ebꞌ yu ebꞌ chi etnen ebꞌ tuꞌ, oj skꞌan scolwal Dios ebꞌ, oj yatej jun colwawom tet ebꞌ, yet oj col-le el ebꞌ yu. 21 Oj xꞌox wal sbꞌa Jehová tet ebꞌ a Egipto, oj yotajne el Jehová ebꞌ, oj oc ebꞌ yin eyilal tet, catuꞌ oj yakꞌon tzꞌaꞌ xaambꞌal cꞌal yofrenda ebꞌ. Oj yakꞌon stiꞌ ebꞌ tet Naj cꞌal sjijen ebꞌ tzet chi yalaꞌ. 22 Yutol oj aletej junoj miman syaꞌilal bꞌey Egipto yu Jehová, oj lawoj tuꞌ, oj antele ebꞌ. Oj meltzotej ebꞌ yul skꞌabꞌ Jehová, catuꞌ oj camcꞌulnele ebꞌ yu Naj.
23 Jaꞌ yet jun cꞌual tuꞌ, ey jun miman bꞌe oj toj tacꞌal bꞌey Egipto masantaꞌcꞌal oj apnoj oc bꞌey Asiria, yuxan jaꞌ ebꞌ a Asiria tuꞌ, oj skeꞌ yapni oc ebꞌ bꞌey Egipto, jacꞌalaꞌ ebꞌ a Egipto, oj skeꞌ yapni oc ebꞌ bꞌey Asiria, yuxan jaꞌ caabꞌ conobꞌ tuꞌ junne xacꞌal oj yun yoc ebꞌ yin eyilal tet Jehová.
24 Jaꞌ yet jun cꞌual tuꞌ, jaꞌ ebꞌ Israel, junxane oj yute sbꞌa ebꞌ yetoj ebꞌ a Egipto, cꞌal yetoj ebꞌ a Asiria. Jaꞌ yu oxebꞌ conobꞌ tuꞌ, yuxan oj yakꞌ swatxꞌcꞌulal Jehová bꞌey masanil yul yibꞌankꞌinal tiꞌ. 25 Jaꞌ Jehová, Naj Yaaw yibꞌan masanil oj yakꞌ watxꞌcꞌulal yibꞌan ebꞌ, catuꞌ oj yalon jaxca tiꞌ: Jain chi wakꞌ watxꞌcꞌulal yibꞌan jin conobꞌ Egipto, cꞌal yibꞌan Asiria, jaꞌton jin mulnabꞌal, cꞌal yibꞌan Israel, tol wet yeocoj, ẍi Dios.