2 Chi yatoj ẍejabꞌ ebꞌ ey yopiso bꞌey yibꞌan jaꞌ miman Nilo tuꞌ, chi too ebꞌ yibꞌan jaꞌ yetoj wan teꞌ jaxca yili teꞌ aa kꞌalbꞌil oc yin stopanil. Jex chejabꞌwom, meltzaanwej yin eymanil bꞌey ebꞌ je yet conobꞌ tol mimej steel, ebꞌ chi kopopi yoc smimanil, tol ey smey sbꞌina ebꞌ bꞌey masanil conobꞌ. Caw ey yip ebꞌ, chi eyqꞌuey nacionlaj yu ebꞌ, jaꞌ bꞌey jun txꞌotxꞌ tol poꞌoquiẍtaj yu jaꞌ miman jaꞌ, jaꞌ tituꞌ caan ebꞌ.

3 Je masanil jaex caan jex bꞌey yul yibꞌankꞌinal tiꞌ, ilwej yet oj iꞌle a bandera bꞌey sjolomlaj wonan, abꞌwej yet oj xuꞌle chꞌen trompeta.

4 Jaꞌ Jehová jix alon jaxca tiꞌ: Jaꞌ bꞌey ey jin ecꞌoj, watxꞌ wilontej ebꞌ, tzꞌin cꞌal jin chi, jaxca sjowal yajan cꞌu yet waresma, jaxca yal akꞌbꞌal chi ey yet chi yambꞌale a sat awo.

5 Jaꞌton yet tuxa chi lawi ecꞌ xumac teꞌ uva, yet chi txeclo can a sat an, jaxa yet cꞌamto chi jul scꞌual syambꞌale a sat an, jaꞌ ebꞌ chi jowi ocoj, jaꞌ ebꞌ oj akꞌon lawoj el ebꞌ a Etiopía. Subꞌo xacꞌal oj yun slawi ey ebꞌ jaxca chi yun skꞌuple el skꞌabꞌlaj teꞌ uva, ma jaxca chi yun yiꞌle el stajinal skꞌabꞌ teꞌ.

6 Jaꞌ masanil smimanil ebꞌ tuꞌ, oj cancan bꞌey sjolomlaj wonan, bꞌey ey noꞌ miij yetoj cꞌal noꞌ chiꞌwawom noꞌ. Jaꞌ yet waresma, oj jul noꞌ miij yin ebꞌ, jaxa yet nabꞌilkꞌinal, oj jul noꞌ chiꞌwawom noꞌ yin ebꞌ, ẍi Jehová.

7 Jaꞌ yet jun tiempoal tuꞌ, oj yiꞌtej yofrenda ebꞌ ánima sattaj Jehová Naj ey yipalil, yu jun conobꞌal ánima mimej steel tuꞌ, ebꞌ chi kopopi yoc smimanil, jaꞌton jun nación ey smey sbꞌina bꞌey masanil conobꞌ, caw wal ey yip ebꞌ, tol chi eyqꞌuey nacionlaj yu ebꞌ, caan ebꞌ bꞌey jun txꞌotxꞌ tol poꞌoquiẍtaj yu jaꞌ mimej jaꞌ. Jaꞌ yofrenda ebꞌ tuꞌ, oj yiꞌtej ebꞌ bꞌey wonan Sión, bꞌey chi oc eyilal tet Jehová, Naj Yaaw yibꞌan masanil.