2 Oj cancan tzꞌinan masanil wan conobꞌ ey yinlaj conobꞌ Aroer yin junelne, jaxca xacꞌal bꞌey chi low noꞌ jobꞌbꞌeal noꞌ oj yun can ocoj, cꞌamxa cꞌal tzet oj xibꞌten noꞌ yet oj ecꞌ noꞌ low tituꞌ.

3 Masanil wan conobꞌ ey yul yet Efraín, oj cancan yin tol cꞌamxa smuroal eyocoj. Jaꞌ conobꞌ Damasco cꞌamxa syaawil eyocoj. Jaꞌ ebꞌ Siria chi cancan tituꞌ caw qꞌuixwiltaj xacꞌal oj yun can ebꞌ jaxca ebꞌ Israel, ẍi Jehová, Naj ey yipalil yibꞌan masanil.

5 Jaꞌ sconobꞌ ebꞌ tuꞌ, laan xacꞌal oj yun can jaxca bꞌey chi kꞌuple a ixim tiriw yu ebꞌ kꞌupom tiriw, jaxca chi yun can bꞌey sjobꞌeal yet Refaim yet chi ecꞌ sicꞌle a ixim sjolom tiriw chi cani.

6 Jaywanxane ebꞌ oj cancan yul sconobꞌ tuꞌ, jaxca cꞌal chi yun scancan junoj teꞌ sat olivo chi makꞌle eytej sat, caabꞌ oxebꞌxane sat teꞌ chi can bꞌey xaamlaj skꞌabꞌ teꞌ, ma asanxane canebꞌ joebꞌojxa chi cancan yin junoj teꞌ steꞌal tuꞌ. Queytuꞌ oj yun canoj, ẍi Jehová cu Diosal jaon Israel jon tiꞌ.

7 Jaꞌ yet jun cꞌual tuꞌ, oj toj tꞌanan ebꞌ ánima junelxa yin jun mac jix waꞌneni, jaꞌton cu Diosal jaon Israel jon tiꞌ.

8 Manxa oj yaoc scꞌul ebꞌ yin wan comon dios waꞌnebꞌil yu ebꞌ. Cꞌamxa yeloc apnoj wan teꞌ teꞌ yaꞌ yili yechel Aserá yul sat ebꞌ, tam wal wan yet xaambꞌal waꞌnebꞌil yu ebꞌ bꞌey chi yakꞌ tzꞌaꞌ incienso ebꞌ.

9 Jaꞌ yet jun cꞌual tuꞌ, jaꞌ wan conobꞌ caw watxꞌ yeoc smuroal, cusiltaj xacꞌal oj yun cantoj ebꞌ, yutol oj bꞌejlecanoj. Jaxca jix yun scancan sconobꞌ ebꞌ Heveo yetoj ebꞌ Amorreo yu ebꞌ ket Israelal yet peyxa, queytuꞌ oj yun canoj.

10 Yutol jix too qꞌueycꞌulal cu Diosal je yu, cꞌamxa che naꞌ ta tol jaꞌ chi cu colon eloj. Tumi cꞌamxa chi tit yul je cꞌul, ta tol asan yin Naj watxꞌ cu colon cu bꞌa. Yu jun tuꞌ, caxcꞌal che yaw wan je yawo manxa jantajoj swatxꞌil yili tet wan comon dios, jaꞌton uva titnaj bꞌey txꞌoj conobꞌal,

11 caxcꞌal mi chi chꞌibꞌa je yawo tuꞌ yin jun cꞌu, caxcꞌal mi jaꞌ yet jun cꞌual tuꞌ chi elol xumac, cꞌam cꞌaltaꞌ niꞌoj sat oj yakꞌa, asan tol oj jul tzꞌabꞌ yibꞌan tol cꞌamxa yanil.

12 Caw okꞌbꞌal cꞌul ebꞌ soldado chi bꞌilwi stit nililoj bꞌey junojxa nación, jaxca chi yun sbꞌilwi jaꞌ mar. Caw wal chi el yaw ebꞌ nacionlaj tuꞌ, jaxca sbꞌilwi jaꞌ mimej jaꞌ yet chi bꞌeyi.

13 Caxcꞌal mi eyxa smey sbꞌilwi stit ebꞌ, jaxa wal yet oj tzule ebꞌ yu Dios, oj ela ebꞌ yu xiwcꞌulal, jaxca chi yun yijletoj smatzꞌical ixim tiriw yu kaꞌeꞌ yet chi xuꞌle el ixim bꞌey sjolom junoj wonan. Jaxca chi yun yijletoj pojoj yu cajxuchum, queytuꞌ oj yun ebꞌ.

14 Caxcꞌal mi eyxa smey yili ebꞌ chi jowi tuꞌ yet yeycꞌualil, jaxa yet eyto sajbꞌi yet junxa cꞌual cꞌamxa mactxequel eyecꞌoj. Queyton tuꞌ oj yun ebꞌ chi cu elkꞌanentoj, Queyton tuꞌ oj yun ebꞌ chi cu etneni.