2 Jaꞌ ebꞌ ix ix caan bꞌey Moab, bꞌey chi cu ecꞌtoj bꞌey Arnón, laan xacꞌal oj yun ebꞌ jaxca noꞌ tzꞌiquin chi xiweltoj yul sweyubꞌ.

3 Oj yalon ebꞌ tet ebꞌ a Sión jaxca tiꞌ: Naꞌwej tzet chi yun je colwa kin jon. Colwaanwej ketoj, jaxca yenel junoj teꞌ yet chuman cꞌu; quey ojabꞌ tuꞌ chi yun je colwa kin jon. Jaxca junoj tzetyetal yet akꞌbꞌalil, man txequeloj, quey ojabꞌ tuꞌ chon je yute jon, cꞌam ojabꞌ chon je txꞌox tet ebꞌ chi cu ujten ecꞌ tiꞌ jon.

4 Chaꞌonwej apnoj caan je xol, cꞌubꞌa jonwej el tet ebꞌ chi cu seyon ecꞌ tiꞌ jon, ẍi ebꞌ a Moab tuꞌ.

Jaꞌ yet oj lawoj ecꞌ jun syaꞌilal tuꞌ, yet oj el jun chi akꞌon lawoj ey nación tiꞌ,

5 jaxa jun yicꞌaal David, jaꞌ oj ale oc yin reyalil, oj yakꞌ yaawilal xol ánima yin camcꞌulal cꞌal yin sjichanil. Oj yaon oc yin scꞌul swaꞌnen yeoc junoj jowal xol ebꞌ ánima yin sjichanil.

6 Kotaj wal sicꞌlebꞌil, tzet wal jix yute smeynen sbꞌa ebꞌ a Moab, caw chi yiꞌa can sbꞌa ebꞌ, eyxa smey skꞌanabꞌ ebꞌ. Jaꞌ tinaniꞌ cꞌamxa yeloc apnoj niꞌoj tzet jix yal ebꞌ tuꞌ.

7 Yu jun tuꞌ, yuxan masanil ebꞌ caan bꞌey Moab tuꞌ oj okꞌ ebꞌ. Masanil xacꞌal ebꞌ oj oc yin cuscꞌulal yu jantaj loꞌbꞌe manxa swatxꞌiloj chi tit yet yalantoj bꞌey Quir-haréset.

8 Jaꞌ masanil an uva bꞌey Hesbón, yetoj cꞌal bꞌey Sibmá oj etextoj teꞌ masanil yu ebꞌ mimej winaj bꞌey nacionlaj. Tol chi apni tacꞌal oc skꞌabꞌlaj an bꞌey Jaser, chi too tacꞌal bꞌey txꞌotxꞌ cusiltaj txꞌotxꞌ, chi apni taꞌcꞌal oc bꞌey stiꞌ jaꞌ mar.

9 Yu jun tuꞌ, yuxan chin okꞌ yu an uva ey bꞌey Sibmá, jacꞌalaꞌ cꞌal pax yu an bꞌey Jazer, catuꞌ chi el cꞌal pax tej yal jin sat yu an bꞌey Hesbón, cꞌal bꞌey Elealé. Yutol jaꞌ xol yawo ebꞌ tuꞌ, jaꞌ tituꞌ oj el aw yet jowal.

10 Jaꞌ bꞌey chi oc mulnail, cꞌamxa aw yet tzalacꞌulal oj ocoj, cꞌamxa mac oj el yaw yu tzalacꞌulal, cꞌamxa mac oj bꞌitnoj xol an uva, cꞌamxa mactxequel oj tecꞌwoj el yal uva. Jaꞌ masanil aw chi oki, oj akꞌle lawoj yu Jehová.

11 Caw wal cusiltaj xacꞌal jin cꞌul yu Moab, cꞌal yu Quir-haréset, jaxca scusiltajil yoc snukꞌ teꞌ arpa.

12 Caxcꞌal mi chi too ebꞌ a Moab tuꞌ bꞌey sjolomlaj wonan, catuꞌ chi oc ebꞌ yin eyilal tet sdiosal ebꞌ tituꞌ, caxcꞌal mi chi cꞌuumbꞌi a ebꞌ, caxcꞌal mi chi too ebꞌ txaloj bꞌey templo, cꞌamxa cꞌal tzetyetal oj yiꞌ ebꞌ yin.

Yet wal oxebꞌ abꞌil tinaniꞌ, jaxca wal chi yun sbꞌison scꞌual yelol sat yawo junoj mulnawom, queytuꞌ oj yun sjul scꞌual slawi ey sbꞌeomal ebꞌ a Moab. Caw miman sbꞌisil ebꞌ ánima tuꞌ oj lawoj eloj. Jaꞌ yet jun tiempoal tuꞌ, tzenxane bꞌisil ebꞌ ánima oj cancanoj, caw cꞌamxa yip ebꞌ scolon sbꞌa tet jowal, ẍi Jehová.