2 Jaꞌ ebꞌ ánima caan bꞌey Dibón, oj atoj ebꞌ okꞌ bꞌey wan templo waꞌnebꞌil a bꞌey wan tzalan. Caw wal yaꞌ oj yabꞌ ebꞌ a Moab yet oj eyqꞌuey conobꞌ Nebo, yetoj cꞌal Medebá. Masanil ebꞌ winaj oj stzujel xil sjolom ebꞌ, cꞌal xil stiꞌ yu xꞌoxon el scuscꞌulal ebꞌ.

3 Jaꞌ an eel pichile eyoc yu ebꞌ yet oj ecꞌ ebꞌ yul-laj bꞌe. Jaꞌ bꞌey yibꞌanlaj na oj el yaw ebꞌ yu syaꞌilal. Masanil xacꞌal ánima oj oc yin cuscꞌulal bꞌey txombꞌal. Oj tan xacꞌal yal sat ebꞌ yu okꞌil.

4 Jaꞌ ebꞌ a Hesbón, yetoj ebꞌ a Elealé, oj el yaw ebꞌ yu skꞌanon scolwal junojxa mactxequel; oj apnoj oc yel yaw ebꞌ bꞌey Jahas. Oj el yaw ebꞌ soldado yet conobꞌ Moab, oj pax yip ebꞌ yu xiwcꞌulal.

5 Caw wal chi cus jin cꞌul yu ebꞌ a Moab; jaꞌ ebꞌ ánima ey bꞌey jun conobꞌ tuꞌ, oj ela ebꞌ yu xiwcꞌulal. Jata cꞌal bꞌey Sóar, oj toj scol sbꞌa ebꞌ, catuꞌ oj apnoj tacꞌal oc ebꞌ bꞌey Eglat-selisiya. Oj atoj ebꞌ okꞌ bꞌey jun tzalan chi yij sbꞌi Luhit, cꞌal bꞌey chi too sbꞌeal Horonaim. Caw wal oj wekꞌekꞌoj yel yaw ebꞌ yokꞌ yu syaꞌilal oj jul yibꞌan ebꞌ.

6 Oj tantoj jaꞌ ucꞌbꞌal jaꞌ yet Nimrim, oj tajtoj masanil an cꞌultaj. Cꞌamxa junojxa an cꞌultaj yaax xaj oj cancanoj.

7 Yu jun tuꞌ, oj syambꞌatoj sbꞌeomal ebꞌ ánima tuꞌ, oj yiꞌontoj ebꞌ sattajto sjobꞌeal bꞌey ey teꞌ bꞌajmam.

8 Oj abꞌle yel yaw ebꞌ ánima tuꞌ masanil bꞌey chi ecꞌtoj smoonal conobꞌ Moab. Oj apnoj yel yaw ebꞌ yu syaꞌilal bꞌey conobꞌ Eglaim yetoj cꞌal bꞌey Beer-elim.

9 Jaꞌ jaꞌ ucꞌbꞌal jaꞌ yul yet Dimón, cajin xacꞌal yili oj yuntoj jaꞌ yu ẍiqꞌuil ebꞌ ánima, man asanne oj cꞌal wan tuꞌ, eyto cꞌal wanxa mimej syaꞌilal oj jul yibꞌan ebꞌ yu Dios. Oj jul noꞌ bꞌalam xol ebꞌ, catuꞌ oj chiꞌle eytoj ebꞌ ánima oj tojcan bꞌey conobꞌ Moab, yetoj cꞌal ebꞌ ánima oj to cancan sat txꞌotxꞌ txꞌotxꞌ tuꞌ.