Yet Oj Meltzotej Ebꞌ Israel Eycantoj Yin Presowomal
14
Jaꞌ Jehová oj xꞌox scamcꞌulal yin ebꞌ Israel junelxa. Oj sicꞌle pax el ebꞌ yu junelxa, yu yoc can ebꞌ sconobꞌoj; yuxan oj caey ecꞌ ebꞌ bꞌey sat xꞌotxꞌ junelxa. Jaꞌ ebꞌ txꞌoj conobꞌal oj jul caan xol ebꞌ yicꞌaal Jacob. 2 Caw ecꞌal nación oj colwa yin ebꞌ Israel yet oj meltzo ebꞌ bꞌey sconobꞌ junelxa. Oj oc can ebꞌ txꞌoj conobꞌal ẍejabꞌoj ebꞌ Israel tuꞌ bꞌey txꞌotxꞌ txꞌotxꞌ jix yakꞌ Jehová. Jaꞌ ebꞌ inentoj ebꞌ Israel tuꞌ yin yakꞌomaloj servilal yet yalantoj, jaxa ebꞌ oj oc yin yakꞌomaloj servilal yu ebꞌ Israel, catuꞌ oj yakꞌon yaawil yibꞌan ebꞌ jix etnen ebꞌ yet yalantoj.Chi Bꞌuchle Naj Sreyal Babilonia
3 Jex conobꞌ Israel, jaꞌ yet oj jex col-le el yu Jehová xol je cuscꞌulal, cꞌal yin syaꞌtajilal bꞌey ey jex oc yin yakꞌomaloj servilal tuꞌ, 4 oj je yaloꞌtane jun bꞌit kꞌane tiꞌ yin sbꞌuchbꞌaniloj naj sreyal Babilonia, oj je yal jaxca tiꞌ:
Ilaꞌ wal tzet jix yun cantoj jun jix cu etnen tuꞌ, ilaꞌ wal jix yun cantoj smeynebꞌail.
5 Jaꞌ Jehová jix akꞌon lawoj ey yipalil yopiso, jix makꞌle can kꞌatoj skꞌojoch yet yopiso,
6 jaꞌton naj jix aon oc syaꞌilal ebꞌ nacionlaj yetoj sjowal scꞌul, cꞌamxa chi oc tucan yetnen ánima. Okꞌbꞌal cꞌul xacꞌal jix yun ebꞌ conobꞌ yu sjowal scꞌul. Cꞌam cꞌal chi sbꞌej yetnen ánima.
7 Jaꞌ tinaniꞌ, masanil ebꞌ ánima cꞌamxa tzet chi snaꞌ ebꞌ, yuxan chi bꞌitni ebꞌ yin tzalacꞌulal.
8 Jaꞌ teꞌ qꞌuisis, cꞌal teꞌ kꞌuteꞌ bꞌey Líbano, jaxca tol jaꞌjun teꞌ chi tzala yetoj ebꞌ jin conobꞌ tuꞌ, yutol jix jaach eyqꞌueyi. Jaxca wal tol chi yal teꞌ jaxca tiꞌ: Yet tax jix jaach eyqꞌueyi, tumi eyto mac chon kꞌajon a jon, ẍi teꞌ.
9 Jaꞌ bꞌey eyecꞌ spixan ebꞌ camom, tuxa cꞌal chi bꞌul-labꞌi ebꞌ sjul ẍaꞌon naj sreyal Babilonia tuꞌ. Jaxca tol chi el sweyan spixan ebꞌ camom tuꞌ. Jaꞌ ebꞌ yaaw yeoc bꞌey sat txꞌotxꞌ txꞌotxꞌ tiꞌ yet peyxa, jix a waan ebꞌ yul ẍila yet chi jul chaꞌle naj yu ebꞌ.
10 Masanil xacꞌal wan tuꞌ chi kꞌanabꞌ ebꞌ tet naj, chi yalon ebꞌ jaxca tiꞌ: ¿Tumi jaach cꞌal pax jun jix jaach tita, tumi cꞌamxa niꞌoj ja wip? ¿Tumi laan jaach xacꞌal ketoj jon?
11 Jaꞌ yet peyxa caw wal bꞌinabꞌil jaach, caw cha waoc teꞌ arpa. Jaxa tinaniꞌ, ey jaachxa ecꞌ cu xol jaon camnajonxa tiꞌ. Eyxa ey ja weyubꞌ xol noꞌ yaax jaꞌ us, jaꞌ noꞌ eyoc ja kꞌaanoj cꞌal ja txoowoj, ẍi ebꞌ camnaj tuꞌ tet.
12 Jaach weycan tol caw chach tzejeji yet skꞌinibꞌalil, ¿tzet jix yun ja kꞌojle eytej bꞌey satcan tuꞌ, yuxan ey jaachxa ecꞌ sat txꞌotxꞌ txꞌotxꞌ tiꞌ?
13 Yutol jix ja naꞌ jaxca tiꞌ: Jain tiꞌ oj jin atoj bꞌey satcan tuꞌ. Jaꞌ tituꞌ oj jin waꞌne ey jin despacho bꞌey yibꞌan weycanlaj yet Dios. Jaꞌ tituꞌ oj jin ey chotan bꞌey jun wonan ey bꞌey yetcꞌulal norte, bꞌey chi oc syambꞌabꞌail ebꞌ dios.
14 Jaꞌ yibꞌan asun tol naat eyatoj, ja tituꞌ oj jin aapnoj. Laan xacꞌal oj wun yetoj Dios, Naj Tol Jaxa Cꞌal Ocoj, ja chi yin ja naꞌbꞌal.
15 Tutun caw yel, tuxa jix jaach eytoj bꞌey ey spixan ebꞌ camom, jata cꞌal bꞌey snaatil yich jolan xabꞌ, jaꞌ tituꞌ jix jaach ey apnoj.
16 Jaꞌ ebꞌ chach iloni, tuxa cꞌal chi qꞌueya scꞌul ebꞌ ja win, chi yalon ebꞌ ja win jaxca tiꞌ: Tol jaꞌ jun winaj tiꞌ chi akꞌon bꞌilwoj txꞌotxꞌ txꞌotxꞌ, catuꞌ chi yakꞌon lawoj masanil nacionlaj.
17 Tzꞌinini xacꞌal jix yun cantoj bꞌey yul yibꞌankꞌinal tiꞌ yu, cusiltaj xacꞌal jix yun cantoj masanil conobꞌ yu, cꞌamxa junoj ebꞌ majan oc yul preso jix jajle el yu, ẍi ebꞌ camom tuꞌ.
18 Masanil xacꞌal ebꞌ rey lalan xew ebꞌ, joyan xacꞌal oc bꞌeomal yinlaj ebꞌ, junjun xacꞌal jix yun stoo can ebꞌ bꞌey smujbꞌanil.
19 Jal jaach, jaach tiꞌ, naat tacꞌal jix jaach kꞌojle can el jaxca junoj kꞌalem tol cꞌamxa yopiso. Jaꞌ ja mimanil, jatuꞌ jix kꞌojle cantoj xol smimanil ebꞌ tejbꞌil camoj, jaxca tol tecꞌbꞌil eytoj smimanil ebꞌ yul-laj chꞌen jolan xabꞌ.
20 Ma jaach mujle jaxca jix yun smujle wanxa ebꞌ rey, yutol jix ja wetnetoj ja conobꞌ, manxa jantajoj ebꞌ ja conobꞌ jix ja makꞌ camoj. Yu jun tuꞌ, yuxan cꞌamxa bꞌakꞌin oj bꞌinale ecꞌ ja wicꞌaal, yutol penawom jaach.
21 Waꞌnele ojabꞌ bꞌey chi makꞌle cam ebꞌ yuninal naj, yu cꞌal jantaj spenail jix yun smam icham ebꞌ, yet watxꞌ cꞌamxa chi etnele masanil ebꞌ ánima bꞌey yul yibꞌankꞌinal tiꞌ, tam wal yakꞌon noel jun yul yibꞌankꞌinal tiꞌ ebꞌ yetoj yicꞌaal.
22 Jaꞌ Jehová Naj Yaaw yibꞌan Masanil, jaꞌ chi alon jaxca tiꞌ: Oj jin oc wal ian yin ebꞌ ánima tinaniꞌ. Oj jin qꞌueyel conobꞌ Babilonia tiꞌ, cꞌamxa bꞌakꞌin oj bꞌinale ecꞌoj. Cꞌamxa mac oj caey ecꞌoj, tam wal yuninal ebꞌ, tam wal yitxiquin ebꞌ oj cancanoj.
23 Junelne paam jaꞌ yetoj sokꞌom oj wute cantoj conobꞌ Babilonia tuꞌ, jaxa cꞌal noꞌ tonton oj eyecꞌ tituꞌ, qꞌuisisi wal oj wute wakꞌon can lawoj masanil, ẍi Dios.
Oj Qꞌueyle El Conobꞌ Asiria
24 Jaꞌ Jehová Naj Yaaw yibꞌan Masanil, jaꞌ jix alon can jaxca tiꞌ: Jaꞌ masanil tzetyetal tol jix jin naꞌ wuneni, sowalil oj wunne.
25 Oj jin qꞌueyel ebꞌ Asiria bꞌey sat jin txꞌotxꞌ tiꞌ, oj wakꞌon eyqꞌuey ebꞌ bꞌey sjolomlaj wonan, txꞌotxꞌ bꞌey chi wakꞌ yaawil, catuꞌ oj wiꞌon el syaꞌilal eyoc yibꞌan ebꞌ jin conobꞌ yu ebꞌ, yet watxꞌ manxa oj etex ebꞌ jin conobꞌ junelxa yu ebꞌ.
26 Jaꞌ jun tuꞌ, eyxa ecꞌ yin jin naꞌbꞌal tzet oj wute jun yul yibꞌankꞌinal tiꞌ. Tuxa jix jin naꞌ tol oj waoc tenchebꞌal yibꞌan masanil nación yetoj wipalil, ẍi Jehová.
27 Ta tol jix snaꞌ Jehová jaxca tuꞌ. ¿Macto wal txequel oj skeꞌ stenon oc tucanoj? Ta watxꞌ xa yeoc yin xolilal yu Naj ¿Macto wal txequel oj skeꞌ sqꞌuexoni?
Jaꞌ Tzet Jix Al-le Can Yin Ebꞌ Filisteo
28 Jaꞌ yet jun abꞌil yet jix cam naj rey Ahaz, jaꞌ yet tuꞌ jix yalon can el wan kꞌane naj Isaías jaxca tiꞌ:
29 Jex Filisteo, cꞌam ojabꞌ to chex tzala tinaniꞌ, caxcꞌal mi jix kꞌatoj teꞌ jin kꞌojoch jix aon oc syaꞌilal je yibꞌan. Jaꞌ yinatil junoj noꞌ comon labꞌa, jaꞌ yin noꞌ tuꞌ oj pitzcꞌu a junoj noꞌ tol caw ey svenenoal, jaꞌton noꞌ caw jow, jun txolan chi too jululoj.
30 Jaꞌ ebꞌ conobꞌ Israel jaxca tol caw mebꞌail yeoc ebꞌ, caw oj low ebꞌ sicꞌlebꞌil yetoj yuninal jaxca chi yun slow noꞌ meꞌ; cꞌal ebꞌ ánima cꞌam sbꞌeomal oj wey ebꞌ yin tzalacꞌulal. Jaxa je yibꞌan jaex Filisteo jex tiꞌ, oj aletoj wail je xol yu Jehová, yuxan jaꞌ jaywanojxa jex oj jex can tuꞌ, wail oj jex iꞌon camoj.
31 Jex Filisteo, el ojabꞌ cꞌuyuyoj je yaw je yokꞌ yu syaꞌil cꞌal yu xiwcꞌulal. Yutol jaꞌ bꞌey norte chi tit jun miman bꞌulan ebꞌ soldado, laan xacꞌal stit jaxca mucꞌ, cꞌam junoj soldado chi elcan xol ebꞌ.
32 ¿Tzet oj yun cu takꞌwi tet ebꞌ chejbꞌiltej ey jon yu jun nación tuꞌ? Oj yal ebꞌ jaxca tiꞌ: Jaꞌ Jehová jix akꞌon stecꞌanil ebꞌ a conobꞌ Sión; jaꞌton ebꞌ sconobꞌ eyoc yin bꞌiscꞌulal, jaꞌ bꞌey wonan Sión oj scol sbꞌa ebꞌ.